Pesikeshü 2 - Angami Naga CL (Re-edited) Bible (BSI)

Thupie Efesa Kehou ki Keshü

¹ “Thupie Efesa nu kehou teigeidielieu ki keshü: Hako mia puoe puo zatsa themvü thenie thezepie kethau mu suna pie kechü mitubako donu tuo phi mu phi kethau kinu kevor dieko:

² “A n mhathoko si, n rhiechükecü mu shügeshühie phikecü. Kesuo kechümia n medelie kenjücü a si; mu no huomia u thuo uü apostelmia ükezhako rüli rie di sükoe moketa tsiu uko tijü silie.

³ No shügeshühielie, mu a za la kemezhielie, siro no süu la n nyieta mokecü a si.

⁴ Derei no n kekhrie therieu khawaketa hau la a n petsouya.

⁵ Süla no kedipuo nunu tetsute shiü le lalie; sidi thenou kedilie, mu no therie ki chü kevor mhathoko chü lalie. No thenou kedilie moliro, a n ki vor di n mituu puo ba geinu chüsetatuo.

⁶ Sirei n keviyo sü: A rütseyakezha tuoi Nikolaitanko mhatho no rei rütseya.

⁷ Süla kehoupuorei u nyie kenyimia bu Ruopfüue kehouko ki kepuu rünyüliecie. A kuolieyakezhamia bu Ukepenuopfü kerüüchü nu keba kerheiprü bo-u geinu puo si cülie kevi khashütuo.

Thupie Smurna Kehou ki Keshü

⁸ “Thupie Smurna nu kehou teigeidielieu ki keshü: Hakoha therieu mu thelau, siata di rheilasieketau kinu kevor dieko:

⁹ “A n mezhieko mu no mhajükecü si, no mhanyi phi ba zo ürei. Siro mia tha di u thuo uü Judamia üdi pu derei mo zo, ukoe Satan sinagog zocü a si.

¹⁰ Kemezhiekecü n gei phirtuoü kebako la michie hiecie. Harie, nie kedoketuo la terhuokesuou nieko huomia tepie kedieki nu shütuo, mu nieko bu zha ker kemezhietuo. Kesia ketso rei dietho tha zolie, sitse a kerhei tsüre khashü n tsütuo.

¹¹ Süla kehoupuorei u nyie kenyimia bu Ruopfüue kehouko ki kepuu rünyüliecie. Kehoupuorei kuolieyakezhamia kesia kenieu bu u pechülie lho.

Thupie Pergamam Kehou ki Keshü

¹² “Thupie Pergamam nu kehou teigeidielieu ki keshü: Hako zhiecha lutsahatsa puoü kechü pie kethau kinu kevor dieko;

¹³ “A n kebachü si, süu Satan kedibau zo. Sishierei nieko a zau theze kemetei thalie, mu a zhapuu Antipas a gei dietho kethau, Satan kebachüu nu nieko donu puo kedukhri teiki zorei nie a gei nie kepeleu khawa mo.

¹⁴ Derei a mha huoyo la n petsouya: Nie donu Balak cha thapie Israelko mhodzünu thephi kemesü puo chü, sidi uko bu terhuorhiko rüsuokewa ca cü mu pierüü chüketau Balaam kepetha siedzi chüyakezha huomia ba.

¹⁵ Süsü tuoi nieko donu Nikolaitanko kepetha die siedzi chüyakezha huo ba.

¹⁶ Thenou kediliecie. Moliro, a mhai nieko ki vor di a me zhiechau se süko ze kegeituo.

¹⁷ Süla kehoupuorei u nyie kenyimia sümia bu Ruopfüue kehouko ki kepuu rünyüliecie. Kehoupuorei kuolieyakezhamia a keviepieketuo manna huo pie tsütuo, mu a ketsie kekra puo khashütuo, mu ketsie kekrau gei, süu ngukelieu zo kemosie miapuorei siya kemo theza kesa puo thupie tuotuo.

Thupie Thiatira Kehou ki Keshü

¹⁸ “Thupie Thiatira nu kehou teigeidielieu ki shücie: Hako Ukepenuopfü Nuou, puo mhi miü tuoi, mu puo phinie mese kemeva tuoikecüu kinu kevor dieko:

¹⁹ “A n mhathoko, n kekhrie, kepele, lietho kechü, mu shügeshühiekelie si ba. N mhatho thelako therietsa ki rei zhakuotacü a si.

²⁰ Derei a hau la n petsouya: No puo thuo puo ü siedzekesipfü üdi puo kepetha die geinu a kituoko cha tha kekrüpie pierüü chü mu terhuorhiko rüsuokewa ca cüyakezha Jezebelpfü gei shügeyakezha la.

²¹ A puo bu thenou kedilieketuo tei khashüwate, derei puoe puo pierüü nunu rüreilie mo.

²² Süla a puo pie thezhü puo gei shü di puo mu puo ze pieü chüyakezhako bu kemezhie phituo, uko mhathoko nunu thenou kedilie kemosie sishütuo;

²³ mu a puo nuonuoko dukhriwatuo. Sidi kehouko pete bu ae mia kelekemedo tsiu mia melouko silieyakezhau ücü silietuo, mu nie mia puopuo mhatho geinu zhakhra chü lapie tsütuo.

²⁴ Derei Thiatira nu keba nieko kekreiko we, kepetha die hau siedzi chüta mo, nieko we mia ‘Satan die kesouko’ isiyakezhako zeta mo. Süla a thepie kekrei puorei pie nie gei shülie lho;

²⁵ derei a vor kemochie, nieko mha baketau thezetsase ba zolie.

²⁶ Kehoupuorei kuolie mu a mhathoko chü zo tha thela tsokecümia, a seyieko mho kekuo kha puo tsütuo;

²⁷ Tsiu rünyoli pro phatayakezha tuoi u bu thegi the se süko kekhatuo.

²⁸ A rei a Puou kinu kekuo ngukelie kemhie. Kehoupuorei kuokelieu a teiziepfü kha puo tsütuo.

²⁹ Kehoupuorei u nyie kenyimia bu Ruopfüe kehouko ki kepuu rünyüliecie.