Pesikeshü 19 - Angami Naga CL (Re-edited) Bible (BSI)

Teigei u Kenei

¹ Hau sie a teigei nu mia krodi pfhe tuoi meyiemeluokecü puo si, süu sie, “Haleluya! Kelakelie mu zayie tsiu kekuo Ukepenuopfü vie zo,

² puo capiko sü ketho mu puotou; puoe thethenu kezhapfü puo pieüpiera se kijüu va perhuketuopfü nyie pepiwate, mu puoe süpfü geinu puo kituoko khepuwate,” si.

³ Süsie uko shiekhoui la di, “Haleluya! Puo geinu kepar mikhuu kechachie khu seizhü zote.”

⁴ Süsie phichümia mepfüediako mu khunuo kerhei diako zeretsu kediba gei kebau Ukepenuopfü rüsuo, sidi sie, “Amen, Haleluya!” isi.

⁵ Sitse kedibau geinu mhapfhe puo vor di sie, “Ukepenuopfü tsheliecie, nie puo kituoko pete, mu puo preiyakezha pete, kecükezha pete rei,” si.

⁶ Süsie a mia krodi pfhe tuoi, dzü kekra pfhe mu teise sekecü pfhe mhiekecü si, süu shiekhoui di, “Haleluya! Niepuu, Kuokejokejüu Ukepenuopfü sü dite.

⁷ U nei mu u noumvülie khe, di zayie pie puo tsü khe, Tekuonuou nuyie tei sü tsote, mu puo yasapfü sü puo dojülieketa la;

⁸ puo bu seketuo la linen pfhe kemesa mu phriephrieikecü pie puo tsüwate.” Linen pfhe kemene sü kemesako kemiatho mhathokocü la.

⁹ Sitse teigeidielieu sie a ki, “Hau thuliecie: Tekuonuou nuyie heu nu vonu di kiekelieko thejakepfütho.” Siro puoe a ki, “Hako Ukepenuopfü die ketho zo.”

¹⁰ Sitse a puo phi nu zeretsu puo rüsuotuoü sie, sirei puo a ki, “No ci hie! A rei Jisu zhapu zeyakezha, no mu n zeko mhie kituomia puo zo. Ukepenuopfü rüsuolie! Kekreilamonyü Jisu zhapuue siedzedie kepu ruopfüu zocü la.”

Kier Kekra Puo Gei Ketuou

¹¹ Ae tei kokeshü ngu, sitse kier kekra puo tha! Süu gei ketuou üse Kedietho-u mu Ketho-u üya, mu puo kemezhüu se mia capi chü mu terhü chü tuoya.

¹² Puo mhi-e mi tu keba miü puo tuoi, mu puo tsü gei keditsüre kekra pfütuo, siro puoe theza puo thupfü tuo, puo rübei sie mia kekreimia puorei si mo.

¹³ Puoe thezie pie dakecü pfhenei rütshuse-ikecü puo se, mu puo za Ukepenuopfü Dieu.

¹⁴ Tsiu teigei rüpfhünuoko linen pfhe kemene, kekra mu kemesa dzie tsiu kier rei krakecü se puo siemedzi tuo.

¹⁵ Puo bu se seyieko duketuo la puo me nunu zhiecha puoü hekecü puo par, mu puo thegithe se di süko mho dituo tsiu puoe Kuokejokejüu Ukepenuopfü noupfhü kemeriekecü khube kegebouu kedetuo.

¹⁶ Puo pfheneiu mu puo do geinu theza puo, “kediko mho Kediu mu niepuko mho Niepuu,” icü thupfü tuo.

Nhachüu mu Rüpfhünuoko Penyükewa

¹⁷ Süsie a teigeidieliemia puo niaki nu tha di ngu, ru puo melie peto phi di sie teimeluo nu pruo ketuo perako ki, “Vorlie, Ukepenuopfü he kezhau nu kengu phrelie.

¹⁸ Kediko chü, kezhamia chü, kekuomia chü, kierko chü mu süko gei ketuoko chü, themia pete chü, miadiemia rei mu kemo rei, kecükezha chü cüketuo la,” si.

¹⁹ Süsie ae nhachüu mu kijü nu kediko siro uko rüpfhünuoko kengulie di kier gei ketuou mu puo rüpfhünuoko ze terhü chütuoü ketha ngu.

²⁰ Sitse nhachüu, mu ketijü siedzekesiu, süu mhinguki nu zasiko chüpie nhachüu zasi ngukelieko tsiu puo miarhi kerüsuoko sekelieu rei sa telie. Sidi sünie perhei kelhoupie mitsie tukezhü mizieu nu shüwa.

²¹ Siro lhiekelieko we kier gei kebau tie nunu zhiecha kepar-u pie dukhriwa. Sidi pera peteko süko chü cü kenyü de cülie.