Pesikeshü 18 - Angami Naga CL (Re-edited) Bible (BSI)

Babilon Tetsuketa

¹ Hau sie a teigei nu teigeidieliemia kekrei puo tsurkezhü ngu, puo kekuo nyi phi, tsiu puo kezie thuo kijüu pete va pezie zota.

² Puo melie shiekhoui di sie, “Kate, Babilon kezhapfü kate! Sidi puo terhuokesuoko kebachü, kerhu ruopfü neiüko kebachü, pera kerhuko kebachü, kerhu neiüko tsiu ngukemecü nhachü khe kebachü chüte.

³ Kekreilamonyü seyie neiüko hapfü pierüü noupfhü zuu krie meze, mu kijüu kediko puo ze pierüü chü, tsiu kijüu thelhitheü kechüko hapfü u theguo kechü kekuo nunu mhanyi philie.”

⁴ Süsie a mhapfhe kekrei puo teigei nu kepu si, “Hapfü ki nunu partacie, a themiako, sitse nieko puo ze kephoumako nu puo ze puo chü molietuo, mu puo thepe kenguko ngu molietuo;

⁵ puo kephoumako pfhepie tei rükrie tuoi bacü la, tsiu Ukepenuopfüe puo kejoko rükra bate.

⁶ Puoe mia gei chükeshü touu chüpie puo gei lashücie, mu puo mhathoko de kenie rei chüpie puo tsü lashücie; tsiu tehieu nu puo pie reikeshü de kenie pie rei lashücie.

⁷ Puo thuo puo tshe mu puo theguo chü lhoukecü tuoi, kemezhiekecü mu thenou kesuo süde mejüpie puo tsücie. Puo thuo puo nou nu, ‘A kedimiapfü zo; A samimiapfü mo, mu a mhakipuorei nousuo ngulie lho,’ iya;

⁸ süla khunhie vachü thepeko puo gei vortuo, kechükesia mu thekrü kechü tsiu pekriekecü, sidi mi pie puo the pejüwatuo, süpfü nyie pepikewau Niepuu Ukepenuopfüe kuokecü la.”

⁹ Siro kijüu gei puo ze pierüü mu chüüphou mengu chükecü kediko miü nunu puo kethe mikhuu kenguki puo la kra mu thekrü chütuo;

¹⁰ sidi ukoe kepecie nu thatuo, tsiu süpfü mezhie ngu michie di sie, “Hou, hou, nadi kezhapfü, Babilon, nadi kekuou! Bavüdo puo nu n capi kechü vorketa la.”

¹¹ Tsiu kijü gei lhithomiako hapfü la kra mu thekrü chütuo, miapuorei uko vienyako khrü sa moketa la,

¹² uko suna, rakachü, ketsie puoma kere siro mukut, linen pfhe keviko, pfhe meriemegekecü, lutsa mu merieyharakecü pfhe, kethengu sei pete, tsoke pie kechü mhaneiüko, sei puoma kere vienya pete, mese, thegi mu marbel tsiepfü,

¹³ seicü, moshola, tehoutsa, mür, kethengu theyakezhako, zu, oliv tier, thou mu thoulha kevithoko, kicükiri, tekuo, kier tsiu kierbageiko, kediemia mu themia phou rei miapuorei mhapuorei khrü sa moketa la.

¹⁴ “N ruopfüe mengutuoyakezha nhasiu n therhiete, mu n vie kevi pete tsiu n zayie kechü n kinu tuote, mhakipuorei ngu salie lhote!”

¹⁵ Siro puo ze thelhitheü chü di mhanyikelieko rei puo kepechüu la u kedepfü di kepecie nu thatatuo, kra mu thekrü chü di,

¹⁶ “Hou, hou, nadi kezhapfü, linenpfhe kemene, pfhe meriemege mu meriekecü, suna pie kechü cümenyie, ketsie puoma kere, mu mukut se puo ketsopfü tuoya ru!

¹⁷ Bavüdo puo nu puo kinyi süko pete pekaperuowate!” si. Tsiu rou mhokezhako mu rüvemiako, routhumiako mu dzükezha nunu thelhi chüyakezha pete, kepecie nu tha,

¹⁸ di miü bu süu the keba mikhu ngukeshü ki shiekhoui di sie, “Nadi kikecüpuonie nadi kezhau mhie ga?”

¹⁹ Mu uko nyophe kelhoupie u tsügei shülie tsiu kra mu thekrü chü di, “Hou, hou, nadi kezhapfü, dzükezha nu rou kenyimiako puo kinyi la mhanyikelie ze! Ru bavüdo puo nu puo pekaperuowate.”

²⁰ Harie, tei, puo la n neiliecie, nie kemesako mu apostelko tsiu siedzekesiko nie neiliecie! Ukepenuopfüe puo kepejo nu nieko la capi chüshüte.

²¹ Süsie teigeidielie kekuomia puo mha kegetsie dekecü ketsie puo kelhoupie dzükezhau nu shü di sie, “Hahi di zhosuo nu Babilon nadi kezhapfü kelhouwatuo, mu puo ngu sa motatuo;

²² tsiu harp kekhou mu themia pfheko siro luoü mu ketsü kekhou pfheko mhakipuorei n kinu si la salie lhote; mu mhakehoupuorei chü sikecümia, n donu ngu salie lhote, siro mha kegetsie pfhe rei n kinu si salie lhote;

²³ mu n ki nu mitu kezie ngu salie lhote; tsiu n ki nu yasamia mu yasapfümia pfhe si sa motatuo; n lhithomiako sü kijü nu kezhathoko zo, sidi n themou se seyie pete sewate,

²⁴ siro n geinu siedzekesiko mu kemesako zie, tsiu kijü gei mia u dukhrikewa pete zie ngulie.”