Pesikeshü 16 - Angami Naga CL (Re-edited) Bible (BSI)

Ukepenuopfü Noupfhü Khouko

¹ Süsie a rüsuokiu nunu mhapfhe puo meyie phi di teigeidielie thenieko ki, “Vo di Ukepenuopfü noupfhü khouko rupie kijüu gei shücie!” icü kepu si.

² Süla teigeidielie kerieu vo di puo khouu rupie kijüu gei shü, sitse nhachüu zasi pfüketuoko mu süu miarhi rüsuoyakezhako gei kechüpfü kemerie chü parta.

³ Süsie teigeidielie kenieu puo khouu rupie dzükezha nu shü, sitse dzü pete kesiamia zie tuoita, mu dzükezha nu lhou ketuo khunuo pete siata.

⁴ Süsie teigeidielie seu puo khouu rupie kerüko mu dzümhidzürüko nu shü, sitse süko thezie mevita.

⁵ Sitse dzüko mho teigeidielieue kepu a si, “Noe mezhü, he-i Kemesau, tsiedo rei mu thiedzü rei ketuou, noe mha hako nyie pepishüte eru;

⁶ kekreilamonyü ukoe kemesako mu siedzekesiko zie pekru, noe thezie khashü uko bu krie. Süue uko ngulie kesüu zo!”

⁷ Sitse ae ruosuobau nunu mha pu lakecü si, “Uwe, Niepuu, Kepenuopfü, Kuokejokejüu, n capiko sü ketho mu mezhü zo!”

⁸ Siro teigeidielie diau puo khouu rupie niakiu gei shü, sidi mi kekuo bu themiako theketuo khashü;

⁹ sidi kele kemeriekecü bu uko thewa, sizorei ukoe thepe hako mho kekuo kebau Ukepenuopfü zau rüseta, sidi ukoe thenou kedi mvü mu zayie se puo tsü mvüta.

¹⁰ Süsie teigeidielie pengouu puo khouu rupie nhachü kedibau gei shü, sitse puo kedirüvie nu zeiboui vorta; themiako u kechü toupfü u meü ta zota,

¹¹ sidi uko kechü mu kechüpfüko la teigei ketuo Ukepenuopfü rüseta, sirei uko mhathoko nunu rüreilie mo.

¹² Süsie teigeidielie sorouu puo khouu rupie Eufrat rüdiu nu shü, mu niathutsa kediko bu vorlieketuo cha kesepie tsüketuo la süu rüko sota.

¹³ Siro a kerhu ruopfü se, guorünuo tuoikecü, tinyhüu me nunu, nhachüu me nunu mu ketijü siedzekesiu me nunu parkezhü ngu.

¹⁴ Sükoe ungomhatho chüyakezha terhuokesuoko ruopfüko zo, hakoe Kuokejokejü Ukepenuopfü teisozha kezha nhie puo ze terhükegeiketuo la kijü nu kediko pete pfhü kengutuoü prata.

¹⁵ (“Harie, ae kerügumia mhie di voryie. Methuo di mia bu puo kemenga ngu molieketuo la, pfhenei se, di pfheüla bakeliemia thejakepfütho!”)

¹⁶ Mu ukoe süko pfhü kengu ze Ibri die nu Harmagedon ükecü thechü puo nu vota.

¹⁷ Süsie teigeidielie thenieu puo khouu rupie teikhrie nu shü, mu rüsuokiu kedibau nunu mhapfhe puo shiekhoui di sie, “Süu chüwate!”

¹⁸ Sitse teimela phriephriei, mhapfhe kekra, teise krakrai mu kiükishü kemerie chüta, sidi themia lhou kevor nu mhakipuorei, kiükishü kemeriekecü sükemhie si chie kemo sierta.

¹⁹ Sidi nadi kezhau pro se chüta, tsiu seyieko nadiko tetsu phreta. Siro Ukepenuopfüe Babilon kezhapfü rükralie di süpfü bu puo noupfhü zu hieu krietuoü khashü.

²⁰ Mu kijü rüchütsokemoko ta phreta mu kijüthouko ngu mo phreta,

²¹ siro prü kezhazha, puo zorei puo mesi sher hiepengou mese teigei nu krütsur themia vata, siro prü la thepe hau vorketa geinu themiako Ukepenuopfü rüseta, süu thepe kemeriekecü puoketa la.