Pesikeshü 15 - Angami Naga CL (Re-edited) Bible (BSI)

Teigeidielieko mu Thepe Thelako

¹ Süsie a teigei nu zasi kekrei puo ngu la, zha mu u ngo zokecü puo: Teigeidieliemia thenie thepe thenie se tha, süko thepe thelako, süko geinu Ukepenuopfü noupfhüu chü tseiwa.

² Süsie a khrüva mu mi kereikecü dzükezha tuoikecü puo ngu, siro nhachüu mu süu miarhiu tsiu süu za khuu keseko mho kuokelieko, sükoe Ukepenuopfüe pie uko tsükeshü harpko pie di khrüva tuoikecü dzükezha khieki tha.

³ Tsiu ukoe Ukepenuopfü kituou Mosa tsaliu, mu Tekuonuo tsaliu chü tha! “Kuokejokejüu, Niepuu Ukepenuopfü, n mhathoko zha mu u ngo zalie! N chako sü mezhü mu ketho phre, seyieko Kediu!

⁴ Niepuu, supuonie n khrüprei mota mu n za tshe mo ta? N rübei kemesau zocü la. Seyie pete n mhodzünu vor n rüsuotuo, n capiko pie mia pesipengushüwaketa la.”

⁵ Hau sie a mehoshü ru teigei zhapu pfheki rüsuokiu khrüshü,

⁶ mu rüsuokiu nunu teigeidieliemia thenie thepe thenie se di par, linen pfhe mesapie phriephriei zocü se, tsiu suna chiepha pie u merü rhapfü.

⁷ Sitse khunuo kerhei diako puoe sie telhekechachie rhei tuoyakezha Ukepenuopfü noupfhüu tshukecü suna khou thenieko pie teigeidielie thenieko tsü.

⁸ Siro Ukepenuopfü kekuo mu zayie nunu kevor mikhuu thuo rüsuokiu tshuta, sidi teigeidielie thenie-e thepe thenie se kevorko chü tseiwa kemochie miapuorei rüsuokiu nu lelie kenjüta.