Pesikeshü 12 - Angami Naga CL (Re-edited) Bible (BSI)

Thenupfü mu Tinyhüu

¹ Teigei nu zasi kezha puo ngu: Thenumiapfü puo niaki dzie, khrüu kedepfü, mu puo tsü gei themvü kerekenie keditsüre pfü.

² Puo nuonipfü tuo mu penuoketuo la nuonuovachü chü ruorüi tha.

³ Süsie zasi kezha puo teigei la par: Tinyhü kemerie kezha puo, puo tsü thenie mu puo kia ker, mu puo tsü gei keditsüre thenie ba.

⁴ Puo meiu pie teigei themvüko se-zapuo tshopie kijü shüwa. Siro tinyhüu thenu penuotuoükezhüpfü mhodzünu tha, thenupfüe penuoshü ro puo nuou mezulietuoü.

⁵ Mu puo thepfunuomia yopuo penuolie, nuo süyo thegi the se themia lhouketuo pete kekhatuo. Derei süpfü nuoyo sese Ukepenuopfü mu puo kedibau nu vota;

⁶ tsiu thenupfü tase rayha nu vota, thechü süu Ukepenuopfü thuo puo la kesepie ba, sidi mia bu zha nyie puo krie kenie di hiesorou puo thekeketuo la.

Mikael Tinyhüu Penyükewa

⁷ Süsie teigei terhü chü sierta; Mikael mu puo dielieko tinyhüu ze kegei. Siro tinyhüu mu puo dielieko rei mia ze kegeita,

⁸ derei uko mia lhota, tsiu teigei uko la thechü puorei ba sa mota.

⁹ Siro tinyhü kezhau, kerieki tinyhüu, puo üse Terhuokesuou mu Satan üya, kijü pete seketsikezhau, puo kelhoupie kijü shüwa, puo sa di puo dielieko kelhouwa.

¹⁰ Süsie a teigei nu mhapfhe kemeyie se puo si: “Tsie we Ukepenuopfü kinu kelakelie mu kekuo tsiu Ukepenuopfü kedi mu puo Khrista kekuou vorte ho, kekreilamonyü teizeiteiso rülei mo di, Ukepenuopfü mhodzünu u zeko tha mu pejo kezhau chü kelhouwate:

¹¹ Derei Tekuonuo zieu mu uko zhapu dieu se puo penyüliete, uko kesiatie nu rei u phou khrieta kemo la.

¹² Süla teiko mu sünu lhou ketuo pete, nie neiliecie. Derei kijü mu dzükezha we ce, chülietie, terhuokesuou puotei tsaketa si di, puo nou rüpe se di nieko ki tsurketa la!”

Tinyhüu Kijü nu Mia Ze Kegei Lakecü

¹³ Süsie tinyhüe puo kelhoupie kijüu gei shüwaketa ngulie tse, thenupfü thepfunuomia puo penuokeshüpfü whuota.

¹⁴ Derei thenupfü bu tinyhüu kinu ta rayha nu vota di, puotei puo la, mu puotei huo la, mu puoteipuotie la, mia bu puo theketuoü pruotaketuo la tsüüra kezhapfü shü kenie pie puo tsü.

¹⁵ Sitse dzüdi bu süpfü zoupfütaketuo la tinyhüu puo me nunu dzü kepfhüpie kerü tuoishü.

¹⁶ Derei kijüu vor thenupfü khruohilie, süu mekuoshü di tinyhüu me nunu kerü kepar-u mezulie.

¹⁷ Süsie tinhyüu thenupfü ngu puo noumeyiecü pfü vo süpfü nuonuo lhiekelieko, Ukepenuopfü diekhakeshü chüüzeyakezhako mu Jisu zhapu zeyakezhako ze kegeituoü prata.

Nhachü Kerieu

¹⁸ Süsie tinyhüu vo dzükezha khieki huocanyo nu thata.