Pesikeshü 11 - Angami Naga CL (Re-edited) Bible (BSI)

Zhapumia Kenie

¹ Süsie mha kemejüsei tuoikecü kethe puo pie a tsü di sie a ki, “Vor di Ukepenuopfü rüsuokiu mu ruosuobau tsiu sünu rüsuokezhako mejücie,

² derei rüsuoki kitie tsatieko we mejü hie; süu khapie balie, süu pie seyieko tsüwaketa la, mu ukoe khrü hiediaekenie nadi kemesau kedetuo.

³ Ae gakhropfhe dziekecü a zhapumia kenie ketseshü di sünie bu zha nyie puo krie kenie di hiesorou siedzedie puketuo kekuo khashütuo.”

⁴ Hanieha kijü Niepuu mhodzü thayakezha olivbonie mu mitunie zo.

⁵ Mu miapuonie sünie pechütuo üro, unie me nunu mi par di unie ngumvüko pekawaya; süla kehoupuorei unie pekawa kenyümia hamhie di dukhriwatuo.

⁶ Unie teiu khalieketuo kekuo ba, süla unie siedzedie kepu ki teirü motatuo, tsiu unie dzüko chü kedipie thezie mevilie kevi kekuo ba; mu unie medo chü di tsiekenuo, thepetheruo kehoupuorei se kijüu pechülie vi.

⁷ Siro sünie zhapu chü tseikewa sie, thekhe kesou nunu kepar nhachüu sünie ze kegeituo sidi unie penyüwa mu unie dukhriwatuo,

⁸ mu unie kesiamo khapie nadi kezha, siedzedie nu Sodom mu Ijipt üyakecü, unie Niepuu pie goukewa nadiu chaü nu zhüwatuo.

⁹ Themia neiüko, mu seyieko tsiu dieko mu seyieko teisozha se di puotie unie kesiamo mehotuo mu unie khru mvütatuo;

¹⁰ tsiu kijü gei themiakoe unie se la u nei phi di nyituo siro mha methuo pie ketsütuo, siedzekesi hanie-e kijü nu kelhouko pechü phikewa la.

¹¹ Siro zha se di puotie sie, Ukepenuopfü kinu kerhei thesüu unie gei vorlie, sitse unie siethalie, mu unie kenguko pete kedethewa.

¹² Süsie unie mhapfhe puo shiekhoui di teigei nu unie ki, “Hagei sierlie!” icü si. Sidi unie ngumvüko unie meho ketha nu unie kimhou geinu teigei sieta.

¹³ Süki kiükishü kemerieta, mu nadiu ker-zapuo pekawa, kiükikeshü sünu mia nyie thenie biekhriwa, mu lhiekelieko michie phi di teigei ketuo Ukepenuopfü tsheürhuta.

¹⁴ Ce, icü va kenieu vote. Siro ce, icü va seu mhai vorzhie.

Ketsü Thenieu

¹⁵ Süsie teigeidielie thenieu puo tsüu khoushü, mu teigei nu mhapfhe kemerie chü di sie, “Cüsie kijü kedi kechü sü u Niepuu mu puo Khristau vie chüte, mu puo telhekechachie ditatuo,” ishü.

¹⁶ Süsie phichümia mepfüediako Ukepenuopfü kediba mhodzünu u kediba gei bayakezhako zeretsu di Ukepenuopfü rüsuota,

¹⁷ mu keli di, “Niepuu Kepenuopfü Kuokejokejüu, tsiedo mu thiedzü rei ketuou hie n tsheya, no n kekuo kezha se di di sedeketa la.

¹⁸ Seyieko mehiemehüpfü ba, derei n noupfhü vorte, kesiako nyie kecüketuo teiu, n kituoko, siedzekesiko mu n za preiyakezha, kecükezha pete, zhakhra chüpie tsüketuo, mu kijüu pekayakezhako pekaketuo teiu vorte.”

¹⁹ Sitse teigei Ukepenuopfü rüsuokiu khrüshü, siro dietseidiekhobouu puo rüsuokiu nu ba di ngu, sitse teimela vavai, mhapfhe mu teikese pfhe, kiükishü, tsiu prü krü kemerie chü vorta.