Pesikeshü 10 - Angami Naga CL (Re-edited) Bible (BSI)

Teigeidielieu mu Leshütshü Kecüyo

¹ Süsie a teigeidieliemia kemecakemekhro kekrei puo teigei nu tsurkecü ngu, kimhou bu puo zepfü tsiu pfhesei japie puo tsü houpfü; puo zie ngupie niaki tuoi, mu puo phiko liro mi co tuoi.

² Puo dzie nu leshütshü kecü yopuo lhapie tuo, puo phi puo zatsa pie dzükezha gei mu puo vitsa pie kijü prapfü tha,

³ puoe losha mehokecü tuoi shie peto phishü. Mu puo shiekeshü sie, teikese thenieko u pfhe chüshü.

⁴ Siro teikese thenieko u pfhe chüshü tse, a thulietuo üsie, derei teigei nu mhapfhe puo sie a ki, “Teikese thenieko mha pukeshüko zasi pie vüwalie, mu süko thu hiecie.”

⁵ Süsie a ngukecü dzükezha mu kijüu gei ketha teigeidielieu, puo dzie puo zatsa yhapie teigei shü.

⁶ Sidi kechachie mu kechachie rheituoyakezhau za se rüse, teigei siro sügei ketuo pete chükeshüu, kijü mu sünu ketuo pete chükeshüu tsiu dzükezha mu sünu ketuo pete chükeshüu; sidi “Ge sa balie lhote,

⁷ derei teigeidielie thenieu puo tsüu khoukeshü zhanhie Ukepenuopfü puo kituo siedzekesiko pesishüwaketa tuoi puo pekhrepie ketuou chü tseishütuo,” sita.

⁸ Süsie a teigei nu mhapfhe sikecüu la sie, a ki, “Vo di dzükezha mu kijü prapie ketha teigeidielieu dzie nu lhapie ketha leshütshüyo pieliecie.”

⁹ Süla a teigeidielieu ki phi di puo bu leshütshü kecüyo pie a tsünu cha; mu puo a ki, “Pielie, di cülie; süu n va nu zowe pfhütuo, derei n me nu zowe mepfhidzü tuoi moutuo.”

¹⁰ Süla ae teigeidielieu dzie nunu leshütshü kecüyo pielie di süu cülie; süu a me nu moupie mepfhidzü tuoi, derei a süu cülie tse a va nu zowe pfhüta.

¹¹ Sitse uko a ki, “Noe themiako siro seyieko tsiu dieko mu kediko kekra ki siedzedie pu lashü morosuote.”