Pesikeshü 1 - Angami Naga CL (Re-edited) Bible (BSI)

Kelukeshü

¹ Jisu Khrista kinu pesikeshü, Ukepenuopfüe mhachü pezitaketuoko se puo kituoko pesishünukecü la kha puo tsükeshü; puoe puo dielieu ketsepie Johan ki shü di mha hako pie puo kituou pesipengushüte,

² puoe Ukepenuopfü dieu mu Jisu Khrista zhapu chüshü tsiu mha kengu pete rei pushü.

³ Kehoupuorei siedzekesi dieko phrü peto tsiu süko rünyülie di sünu thupie kezhüko chüüzeyakezhamia thejakepfütho; kekreilamonyü puoteiu penuoteiketa la.

⁴ Johan kinu thupie Asia nu kehou thenieko ki keshü: Ngukemezhie mu noune bu tsiedo mu thiedzü ketuou mu thiesie vorketuou kinu, mu puo kediba mhodzünu ketha ruopfü thenieko kinu,

⁵ mu kijü nu kediko mhokezhau, kesiako donunu rheisiekelie kerietho-u, kedietho zhapuu Jisu Khrista kinu nie gei vorcie. U khriekezhau mu puo zie pie u kephoumako nunu u rhakeshüu,

⁶ u chüpie kedirüvie puo mu puo Kepenuopfü tsiu puo puo lie kechü zievoko chükeshüu, telhekechachie zayie mu kekuo bu puo gei bakelieu chücie. Amen.

⁷ Lere-i! Puo kimhouko ze tsurzhie; themhi pete puo ngutuo, rüngou pie puo zekeshüko rei, mu puo la kijü nu seyie pete kratuo. Süu si zotuo. Amen.

⁸ “Ae Alfau mu Omegau,” Niepuu Ukepenuopfüe siya, tsiedo mu thiedzü ketuou, mu thiesie rei tuoketuou, Kuokejokejüu.

Khrista Kengu

⁹ A, Johan, nieko zeu mu Jisu geinu nieko ze mezhie kezakecüu nu mu kedi kechüu nu, shügeshühiekecü nu nie ze kepekroyakezhau, Ukepenuopfü dieu mu Jisu zhapu kechü la Patmos kijü rüchütsokemo nu ba.

¹⁰ Niepuuzha puo nhie a Ruopfüu nu tuo ru a sietsa nu ketsü kekhou pfhe tuoi di shie petokeshü si,

¹¹ sidi sie, “No ngukecüko thulie di pie kehou thenieko ki shücie, süko Efesa, Smurna, Pergamam, Thiatira, Sardis, Filadelfia mu Laodikia.”

¹² Sitse a rüchü ketha pfheu mehotuoü reipra, sidi rüreikeshü ki suna pie kechü mituba thenie ngu,

¹³ mu mituba süko donu puo ngupie Themia Nuou tuoi, puo pfhenei rütshuse-i mu suna chiepha pie puo merü rhapfü tha.

¹⁴ Puo tsü mu puo tsütha krapie chümie kekra tuoi; krapie pekrie tuoi; tsiu puo mhi miü tuoi,

¹⁵ puo phi-e mesapie mese kemeva tuoi, miü nunu the keyharapie kezhü tuoi, mu puo pfhe liro dzüdi krukezhü tuoi.

¹⁶ Puo dzie puo zatsa themvü thenie thezepie, mu puo me nunu zhiecha lutsahatsa puoü kechü puo par, mu puo zie niaki kezie puo raki tuoi zo.

¹⁷ A puo ngushü tse, a tetsu puo phi nu kesiamia tuoi zhüta. Derei puoe puo dzie puo zatsa pie a bie di sie, “No michie hiecie; A therieu mu thelau,

¹⁸ mu rheituoyakezhau. A siata ru harie, a tsie kechachie mu kechachie rhei tuote; tsiu a Kesia mu Hades cabiko seya.

¹⁹ No kengu, tsie vieko, siro hasie chü vorketuoko thuliecie.

²⁰ No ngu ketha mha kesou a dzie a zatsa themvü thenieko, tsiu suna pie kechü mituba thenieko: Themvü theniekoe kehou thenieko dielieko, mu mituba theniekoe kehou thenieko zo.