Obadia 1 - Angami Naga CL (Re-edited) Bible (BSI)

Kemiakokecü Edom Bie Kerünuowatuo

¹ Obadia ziemho. Niepuu Jihovae Edom dze pucü: Hie Jihova kinu dielie puo siliete, mu seyieko ki dieliemia puo ketseshüte; “Sieliecie! Úko sie terhü chü süu petsou khe!”

² A nieko pie seyieko donu kecütho-u chüwatuo; mia nie ngumecü phi zotuo.

³ N nou kemiakokecüu thuo n sewate, nie tsiekrie gei lhou kebako, puo chü rükriekecü nu kebako. Noe n melou nunu, “Supuonie a pie ker kijü shülie ta?” ibaya.

⁴ N thuo tsüüra tuoi thu rükrie khota zorei, n kru chüpie themvü donu ba zorei, sünunu a n teshü kerwatuo, Jihovae siya.

Edom Zho Kesuo la Siazha

⁵ Kerügumia n ki vor ro, kepekamia theva vor ro, kimhie di n pekawa shi! uko lie kenyüko rübei rügu lho me? Khubesi pfhü kenguyakezhamia n ki vor üro, uko huoyo peshashü lho me?

⁶ Kimhie di Esau vie vawa, tsiu puo kinyiko pfhüwate shi?

⁷ N ze kere kesierko pete n sewate, uko n whuopie therie nu shüwate; n ze kere kesieko n petsou di kuolietuo; n niekhrüda cükelieko n la kebie pethoupie bate, süu ca silieketuo ba mo.

⁸ Jihovae puya, sünhiesü, a Edom nu mhakesimiako, tsiu Esau kijüthou gei kesikele pekawatuo.

⁹ N terhümiaviko u ziekejü chütatuo, he-i Teman, sidi Esau kijüthou geinu kevor mia pete dathewatuo.

Edom-e Puo Siezeu Pesekecü

¹⁰ Noe n siezeu Jakob dukhri, mu kemvü chükecüko la thenga thuo n zepfülietuo, tsiu kechachie n kelhiwatuo.

¹¹ No rürei thaketa nhie, sikemomiae puo kinyi chüseketa nhie, tsiu chazoumia puo kharuko nu le di, Jerusalem se dapekecü nhie, sünhie no rei uko mhiete.

¹² Derei n siezeu puo ruosuokelie nhie n mepfhü rha puo kie mo tse vituomu ru; Juda themiako kaketa nhie; no n neikecü mese mo; uko noukesuo nhie no kemelhakecü mese mo.

¹³ Noe a themia kakezhü nhie puo kharu nu le zhü mo; nie Juda kakezhü nhie vo puo keka kre kebako ze puo kre zhü mo; puo kakezhü nhie puo nyaürako rügu zhü mo.

¹⁴ Puo themia takelieko biewatuo üdi no chatietshü nu tha zhü mo; kemezhie keba nhie puo themia lhiepie kebako tepie mia tsüwa zhü mo.

¹⁵ Kekreilamonyü seyie pete petsoutuo ükecü Jihova teisozhau penuo bate. No chükeshü tuoikecü chüpie n gei lashütuo; n mhathoko n tsü gei la vortuo.

¹⁶ Kekreilamonyü no a kemesa kijüthou geinu kriekelie tuoi, seyie nie khie nie mhou keba pete rei krietuo; uko krielie tsiu mezulietuo, sidi uko mhakipuorei sümhieya kemo tuoitatuo.

Thela nu Israel Kuolietuo

¹⁷ Derei takelieko Zion kijüthou gei batatuo, tsiu süu mesatatuo; sidi Jakob kiue mia uko vie peviekelieko we lalietuo.

¹⁸ Jakob kiu mi tuoitatuo, Josef kiu miü mhietatuo, tsiu Esau kiu mha do chütatuo; ukoe süko thewatuo, sidi süko the pejüwatuo, sidi Esau kiu nu lhiekelie puorei balie lho; kekreilamonyü Jihovae pushüwate.

¹⁹ Negebmiakoe Esau Kijüthou pevielietuo, mu Shefela miakoe Filistinko kijü pevielietuo; ukoe Efraim mu Samaria kijü pevielietuo, mu Benjamin-e Gilid pevielietuo.

²⁰ Israel Halanu miadie chüketuoko Foinisia nunu vo Zarefat ketso pevielietuo, tsiu Sefarad nu Jerusalem nu miadie chü ketuoko Negeb rünako pevielietuo.

²¹ Kelalieketako Zion kijüthou gei kho di; Esau kijüthouko mho kekhatatuo; sidi kedirüvieu Jihova vie chütatuo.