Nuolhoutsüphrü 9 - Angami Naga CL (Re-edited) Bible (BSI)

Sinai nu Ciekevo Nyikecü

¹ Uko Ijipt kijü nunu parketa sie cie kenie cie, khrü kerieu nu, Jihovae Sinai nhatsa nunu Mosa ki:

² Israelko bu puotei ki ciekevonyi hau nyi melie.

³ Khrülhou zha keredia nhie, thevatie, nieko nyinyituo, puo cako mu puo zhoko pete ze tou di nyinyituo.

⁴ Süla Mosae Israelko ki ciekevonyiu nyi morokesuo pushü.

⁵ Süla Sinai nhatsa nunu thekhrü kerieu zha keredia nhie, thevatie ukoe ciekevonyiu nyi: Jihovae Mosa ki diekhakeshü mhie di Israelkoe ciekevo-u nyi.

⁶ Siro kesiamo puo biekewa la mia huoe mesa mota di sünhie ciekevonyiu nyilie mota tse ukoe sünhie Mosa mu Aron unie ki vor,

⁷ sidi themia sükoe puo ki, “Hieko kesiamo biewa di mesa mote; kiüdi hieko bu Israelko donu vor di puotei ki Jihova rüsuolie lho üta ga?”

⁸ Sitse Mosae uko ki, “Pfhe balie, a bu Jihova die kikecüpuo khashütie shiü rüsarünyüketuo la.”

⁹ Jihovae Mosa ki:

¹⁰ Israelko ki pushücie: Nieko morei nie nuosenuoyie kehoupuorei kesiamo biewa di mesa mota morei rüverüvü chü kepecie nu tuota shierei ukoe Jihova ki ciekevonyi hau nyituo.

¹¹ Khrü kenieu zha keredia nhie thevatie uko bu nyituo, uko bu khreiüshükemo niekhrüda mu gapfhü sa di cütuo.

¹² Ukoe puorei khapie ba khise tso lho, morei puoru puorei dutshedutsha lho: ciekevonyiu zhoko pete ze di nyituo.

¹³ Derei mia puoe mesa ba zo mu rüverüvü chü mo ba di ciekevonyiu nyi mota ro, themia süu puo themiako donunu puo khawatuo, kekreilamonyü süue puotei ki Jihova ki ruosuo chülie moketa la. Sikecüu bu puo kephouma pfütuo.

¹⁴ Siro solhimia puoe vor nie donu lhoutuo di ciekevonyiu nyipie Jihova ki shütuo üro, puo bu ciekevonyi zho nanyüko ze di nyituo. Nieko solhimia la rei mu khenu kelhoumia la rei thezho puo se zotuo.

Kimhouu mu Miu

¹⁵ Siro rüsuopfhekiu pethoukelie nhie, kimhouue rüsuopfhekiu süusü dietseidiekhobou pfhekiu üyakezhau whepfülie, mu thevatie nu khise ketso kimhou süu rüsuopfhekiu mhogei mi kemhie ngu bata.

¹⁶ Sükemhie di kimhouue süu whepfü sei bata, mu theva gei mi kemhie di ngu.

¹⁷ Siro rüsuopfhekiu geinu kimhouu chüse sieketa ki Israelkoe uko rüve la tuoshüya, kimhouu thechüu nu bata ro ukoe pfhekiu pethoulieya.

¹⁸ Jihovae diekhakeshü ki ze di Israelko tuoshüya, mu puo diekhakeshü ze di uko pfhekiko pethouya. Kimhoue rüsuopfhekiu mhogei keba chie thechü sünu razhü chüya.

¹⁹ Teisozha kekra kimhoue rüsuopfhekiu mhogei bata rei Israelko Jihovae chünukeshüu ze di tuoshüya mo, derei Jihovae chünukeshüu chüya.

²⁰ Huokipuo kimhouue rüsuopfhekiu mhogei zha huoyo rübei ba ro, ukoe Jihova diekhakeshü ze di zha huoyo rübei baya, mu Jihova diekhakeshü ze di uko tuoshüshüya.

²¹ Siro huoki kimhouue thevatie nu süsieduü ketso ba di khise kimhou chüse sieta, tse ukoe tuoshüya. Morei khinhie shierei theva shierei kimhouu chüse sieketa ki uko tuoshüshüya.

²² Zha kenie morei khrü puo morei cie puo shierei kimhouu rüsuopfhekiu mhogei keba chie Israelmiako tuoshü mo di razhüchüu nu baya, derei kimhouu chüse sieketa ki ukoe tuoshüya.

²³ Jihovae diekhakeshü ze di uko razhüchü nu baya mu Jihovae diekhakeshü ze di uko tuoshüshüya. Siro Jihovae Mosa ki diekhakeshüko ze di, Jihovae uko bu chünukeshüko chüya.