Nuolhoutsüphrü 8 - Angami Naga CL (Re-edited) Bible (BSI)

Mitubou Thenieko

¹ Süsie Jihovae Mosa ki:

² Aron ki pushülie, no mitubau petukeshü ki, mitubou thenie bu mitubau mhodzütsa va pezietuo.

³ Aron-e sükemhie chüshü. Jihovae Mosa ki diekhakeshü tuoi, puoe mitubou petupie mitubau mhodzütsatie va pezieshü.

⁴ Siro mitubau suna ketsapie chü; puo ba nunu puo nyiepouko ketso, suna ketsapie chü; Jihovae Mosa ki puorhi thakeshü mhie di, puoe mitubou bako chülie.

Leviko Chü Kemesakecü

⁵ Siro Jihovae Mosa ki:

⁶ Israelko donunu Leviko zelie, di uko chü kemesaliecie.

⁷ Mu no hakemhie di uko chü kemesalietuo: Chü kemesayakezha ruosuo dzüu kegepie uko vashülie, di uko bu tsüpfü pie uko mo pete thiewalie, sidi u pfhenei menyiwa, mu u thuo u chü kemesalietuo.

⁸ Süsie uko bu thudonuo puo mu süu lhacülhale ruosuo la thou kevitho tier pie reikecü selie, mu no kephouma ruosuo la thudonuo kekrei puo selie.

⁹ Siro no Leviko ze vor rüsuopfhekiu mhodzünu balie, di no Israelko pete kie kengulie.

¹⁰ No Leviko pie Jihova mhodzünu keshü, Israelkoe u dzie pie Leviko tsü gei shütuo.

¹¹ Sidi Israelko donunu Leviko bu Jihova lie chüketuo la, Aron bu kegekecü ruosuo puo khapie Jihova mhodzü shütuo.

¹² Süsie Leviko bu u dzie pie thudonuonie tsügei shütuo, sidi no sünie puo pie kephouma ruosuo mu kekreiu pie kethe ruosuo chüpie Leviko ruotho la Jihova ki shütuo.

¹³ Süsie no Leviko pie Aron mu puo nuonuoko mhodzünu thalie di uko pie Jihova ki kegekecü ruosuo chüshütuo.

¹⁴ Hamhie di no Israelmia donunu Leviko kelakreipie uko bu a vie chülietuo.

¹⁵ Süsie Leviko bu rüsuopfhekiu nu le di uko sünu mhathoko chütuo, sidi no uko chü kemesalie di uko pie kegekecü ruosuo khashütuo.

¹⁶ Kekreilamonyü Israelmiako donunu uko pie a tsü tseiwate, u zuo va nunu kepar pete, Israelmiako donu nuorieu pete sou nu, ae uko lieliete.

¹⁷ Themia rei khunuo rei Israelmiako donu nuorieko sü a vie zo. Kekreilamonyü ae Ijipt nunu nuorieko pete dukhrikewa nhie a a thuo uko chü kemesaliete.

¹⁸ Siro Israelmiako donu nuorieu pete sou nu a Leviko lieliete.

¹⁹ Israelmiako kemesachüu penuo kevor ki, Israelmiako gei thepe bu vor molieketuo la; mu Israelmiako la ruotho chülie di Israelmiako bu rüsuopfhekiu nu mhathoko chüketuo la, Israelmia donunu ae Levimia pie Aron mu puo nuonuoko tsüwate.

²⁰ Jihovae Mosa ki Israelko la diekhakeshü tuoi Mosa mu Aron tsiu Israelmia mechükehou pete-e Leviko gei chüshülie, Israelkoe Leviko gei sükemhie chülie.

²¹ Mu Leviko uko kephouma nunu u thuo u chü kemesalie di u pfheneiko menyiwa, sidi Aron-e Jihova mhodzü uko piesie kegekecü ruotho chüshü mu uko chü kemesaketuo la ruosuo chüshü.

²² Süsie rüsuopfhekiu nu mhathoko chüketuo la Levikoe Aron mu puo nuonuoko mhodzü leta. Sidi Jihovae Mosa ki Leviko la diekhakeshü mhie Israelmiakoe uko gei chüshü.

²³ Süsie Jihovae Mosa ki:

²⁴ Leviko mhathoe haha: u kelhouzha cie mepfüepengou nunu sümhoko bu rüsuopfhekiu mhathoko chütuoü letuo;

²⁵ u kelhouzha cie hiepengou ketako bu mhachü sa motatuo.

²⁶ Ukoe u siezeko ze di rüsuopfhekiu meholietuo, mu mhatho kekrei we chü lho. Leviko bu mhachü morokesuoko dze no uko gei hakemhie chüshütuo.