Nuolhoutsüphrü 7 - Angami Naga CL (Re-edited) Bible (BSI)

Krütako Ruosuo Khakeshü

¹ Mosae rüsuopfhekiu chü tseilie di tier pie kenhelie mu mhanya pete chü kemesalie; tsiu ruosuobau gei mhabouko pete tier pie kenhelie di chü kemesakelie nhie;

² Israelmia krütakoe, u puonuo thekrüko uko nuolhou kephrü ki seyie krütakoe,

³ ruosuo khakeshüko se Jihova mhodzünu vor, bagei puo ki whekecü sorou mu thudo kerekenie, bagei puo krüta kenie la, mu thudo puo mia puopuo lala idi hako khapie rüsuopfhekiu mhodzü ruosuo chüshü.

⁴ Sitse Jihovae Mosa ki:

⁵ Rüsuopfhekiu nu mhachüketuo la, uko kinu hako lieliecie, di se Leviko tsüshülie, mia puopuo mhatho-u lala idi.

⁶ Süla Mosae bagei mu thudoko liepie Leviko tsüshü.

⁷ Gershon nuoko la bagei kenie mu thudo dia khashü, uko mhatho-u medzi di;

⁸ siro Merari nuoko la puoe bagei dia mu thudo thetha khashü uko mhatho-u medzi di, hakoe Aron zievo-u nuou Ithamar khro ba.

⁹ Derei puoe mhapuorei pie Kohat nuonuoko we tsü mo, kekreilamonyü uko bu kemesachüu nu vieko, pfü mu piekecü uko mhathokecü la.

¹⁰ Siro krütakoe ruosuobau kenhekelie nhie süu chü kemesaketuo la ruosuo khashü, sidi krütakoe ruosuobau mhodzü nunu ruosuoko khashü.

¹¹ Sitse Jihovae Mosa ki: Ruosuobau chü kemesaketuo la, krütako bu khunhie mia puopuo idi ruosuo khashütuo.

¹² Sitse zha therie nhie, Juda yiemia Aminadab nuou Nahshon bu puo ruosuou khashü.

¹³ Mu puo ruosuo rakachü pie kechü mekhou puo, süu kemesachüu shekel nu lekecü puo mesi shekel krie puo di ser mu puo mesi shekel hiethenie rakachü pie kechü tehie puo, lhacülhale ruosuo chüketuo la thou kevitho pie kerei di sünie kenienie ketshu se vor.

¹⁴ Cietha kethengupfü shekel ker pie kechü suna hie puo ketshu;

¹⁵ kethe ruosuo la thudonuo puo, tekuochü puo mu cie puoketa tekuonuochü puo,

¹⁶ kephouma ruosuo la mvüdo puo,

¹⁷ tsiu kezekevi ruosuo la thudo kenie, tekuonuochü pengou, mvüdo pengou, cie puoketa tekuochü pengou; hakoe Aminadab nuou Nahshon ruosuo.

¹⁸ Zha kenie nhie, Zuar nuou Nethanel Isakar krütau bu ruosuo khashü;

¹⁹ puo ruosuo chükecü la rakachü pie kechü mekhou puo, süu kemesachüu shekel nunu lekecü puo mesi shekel krie puo di ser mu puo mesi shekel hietheniekecü rakachü pie kechü tehie puo, lhacülhale ruosuo la thou kevitho pie kerei di sünie kenienie ketshu se vor.

²⁰ Cietha kethengupfü shekel ker pie kechü suna hie puo ketshu;

²¹ kethe ruosuo la thudonuo puo, tekuochü puo, cie puoketa tekuonuochü puo;

²² kephouma ruosuo la mvüdo puo;

²³ mu kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou se vor; hakoe Zuar nuou Nethanel ruosuo.

²⁴ Zha se nhie, Helon nuou Eliab, Zebulun nuomia krütau bu ruosuou khashü:

²⁵ Puo ruosuoe rakachü pie kechü mekhou puo, süu kemesachüu shekel nu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo la thou kevitho tier pie kerei di sünie kenienie ketshu se vor;

²⁶ cietha kethengupfü, shekel ker pie kechü suna hie puo ketshu;

²⁷ kethe ruosuo la thudonuo puo, tekuochü puo, cie puoketa tekuonuochü puo;

²⁸ kephouma ruosuo la mvüdo puo;

²⁹ tsiu kezekevi ruosuo la thudo kenie, tekuochü pengou, mvüdo pengou. Hako Helon nuou Eliab ruosuo.

³⁰ Zha dia nhie, Shedeur nuou Elizur, Reuben nuomia krütau bu ruosuo khashü:

³¹ Puo ruosuoe, rakachü pie kechü mekhou puo, süu kemesachüu shekel nu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo chüketuo la thou kevitho tier pie kerei di sünie kenienie ketshu se vor;

³² cietha kethengupfü shekel ker pie kechü suna hie puo ketshu;

³³ kethe ruosuo la thudonuo puo, tekuochü puo, cie puoketa tekuonuochü puo;

³⁴ kephouma ruosuo la mvüdo puo;

³⁵ tsiu kezekevi ruosuo la thudo kenie, cie puoketa tekuonuochü pengou, hakoe Shedeur nuou Elizur ruosuo.

³⁶ Zha pengou nhie, Zurishadai nuou Shelumiel, Simeon nuomia krütau bu ruosuou khashü:

³⁷ Puo ruosuoe rakachü pie kechü mekhou puo, süu kemesachüu shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo chüketuo la thou kevitho tier pie kerei di sünie kenienie ketshu se vor,

³⁸ cietha kethengupfü shekel ker pie kechü suna hie puo ketshu;

³⁹ kethe ruosuo la thudonuo puo, tekuochü puo, cie puoketa tekuonuochü puo;

⁴⁰ kephouma ruosuo la mvüdo puo;

⁴¹ kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou. Hakoe Zurishadai nuou Shelumiel ruosuo.

⁴² Zha sorou nhie Deuel nuou Eliasaf, Gad nuomia krütau bu ruosuo khashü:

⁴³ Puo ruosuoe rakachü pie kechü mekhou puo, süu kemesachüu shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü hie puo, lhacülhale ruosuo chüketuo la thou kevitho tier pie kerei di sünie kenienie ketshu se vor;

⁴⁴ cietha kethengupfü shekel ker pie kechü suna hie puo ketshu;

⁴⁵ kethe ruosuo la thudonuo puo, tekuochü puo, cie puoketa tekuonuochü puo;

⁴⁶ kephouma ruosuo la mvüdo puo;

⁴⁷ tsiu kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou: Hakohae Deuel nuou Eliasaf ruosuo.

⁴⁸ Zha thenie nhie Amihud nuou Elishama, Efraim nuomia krütau bu ruosuo khashü:

⁴⁹ Puo ruosuoe rakachü pie kechü mekhou puo, süu kemesachü shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo la thou kevitho tier pie kerei di sünie kenienie ketshu se vor;

⁵⁰ cietha kethengupfü shekel ker pie kechü suna hie puo ketshu;

⁵¹ kethe ruosuo la thudonuo puo, tekuochü puo, cie puoketa tekuonuochü puo,

⁵² kephouma ruosuo la thudonuo puo;

⁵³ tsiu kezekevi ruosuo chüketuo la thudo kenie, tekuochü pengou, mvüdo pengou, cie puoketa tekuonuochü pengou, haha Amihud nuou Elishama ruosuo.

⁵⁴ Zha thetha nhie Pedahzur nuou Gamaliel, Manasseh nuomia krütau bu ruosuo khashü:

⁵⁵ Puo ruosuoe, rakachü pie kechü mekhou puo, süu kemesachüu shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo la thou kevitho tier pie kerei di sünie kenienie ketshu se vor;

⁵⁶ cietha kethengupfü shekel ker pie kechü suna hie puo ketshu;

⁵⁷ kethe ruosuo la thudonuo puo, tekuochü puo; cie puoketa tekuonuochü puo;

⁵⁸ kephouma ruosuo la mvüdo puo,

⁵⁹ tsiu kezekevi ruosuo la thudo kenie, tekuochü pengou, mvüdo pengou, cie puo keta tekuonuochü pengou, haha Pedahzur nuou Gamaliel ruosuo.

⁶⁰ Zha thepfü nhie, Gideoni nuou Abidan, Benjamin nuomia krütau bu ruosuo khashü:

⁶¹ Puo ruosuoe rakachü pie kechü mekhou puo, süu kemesa chüu shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo la thou kevitho tier pie kerei di sünie kenienie ketshu se vor;

⁶² cietha kethengupfü shekel ker pie kechü suna hie puo ketshu;

⁶³ kethe ruosuo la, thudonuo puo, tekuochü puo, cie puoketa tekuochü yopuo;

⁶⁴ kephouma ruosuo la mvüdo puo;

⁶⁵ tsiu kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou. Haha Gideoni nuou Abidan ruosuo.

⁶⁶ Zha ker nhie Amishadai nuou Ahiezer, Dan nuomia krütau bu ruosuo khashü:

⁶⁷ Puo ruosuoe rakachü pie kechü mekhou puo, süu kemesachüu shekel nunu lekecü shekel krie puo di ser, puo mesi shekel hietheniekecü rakachü pie kechü tehie puo; lhacülhale ruosuo la thou kevitho tier pie kerei di sünie kenienie ketshu se vor;

⁶⁸ cietha kethengupfü shekel ker pie kechü suna hie puo ketshu;

⁶⁹ kethe ruosuo la thudonuo puo, tekuochü puo, cie puoketa tekuonuochü puo;

⁷⁰ kephouma ruosuo la mvüdo puo;

⁷¹ tsiu kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou, haha Amishadai nuou Ahiezer ruosuo.

⁷² Zha kerepuo nhie, Okran nuou Pagiel, Asher nuomia krütau bu ruosuo khashü:

⁷³ Puo ruosuoe rakachü pie kechü mekhou puo, süu kemesachüu shekel nunu lekecü puo mesi shekel krie puo di ser, puo mesi shekel hietheniekecü rakachü pie kechü tehie puo, lhacülhale ruosuo chüketuo la thou kevitho tier pie kerei di sünie kenienie ketshu se vor;

⁷⁴ cietha kethengupfü shekel ker pie kechü suna hie puo ketshu;

⁷⁵ kethe ruosuo la thudonuo puo, tekuochü puo, cie puoketa tekuonuochü puo;

⁷⁶ kephouma ruosuo la mvüdo puo;

⁷⁷ tsiu kezekevi ruosuo la thudo kenie, tekuochü pengou, mvüdo pengou, cie puoketa tekuonuochü pengou, haha Okran nuou Pagiel ruosuo.

⁷⁸ Zha kerekenie nhie Enan nuou Ahira, Naftali nuomia krütau bu ruosuo khashü:

⁷⁹ Puo ruosuoe rakachü pie kechü mekhou puo, süue kemesachüu shekel nunu lekecü shekel krie puo di ser, puo mesi shekel hietheniekecü rakachü pie kechü tehie puo; lhacülhale ruosuo la thou kevitho tier pie kerei di sünie kenienie ketshu se vor;

⁸⁰ cietha kethengupfü shekel ker pie kechü suna hie puo ketshu;

⁸¹ kethe ruosuo la thudonuo puo, tekuochü puo, cie puoketa tekuonuochü puo;

⁸² kephouma ruosuo la mvüdo puo;

⁸³ tsiu kezekevi ruosuo la thudonuo kenie, tekuochü pengou, mvüdo pengou, cie puoketa tekuonuochü pengou, haha Enan nuou Ahira ruosuo.

⁸⁴ Israelmia peyukoe ruosuobau kenhekecü nhie hako pie ruosuobau chü kemesa, rakachü pie kechü mekhou kerekenie, rakachü pie kechü tehie kerekenie, suna pie kechü tehie kerekenie;

⁸⁵ kemesachüu shekel nu lekecü mekhou puo puo mesi shekel krie puo di ser, tehie puo hiethenienie, rakachü pie kechü tehiemekhouko pete shekel nyie kenie di krie dia;

⁸⁶ kemesachüu shekel nunu lekecü cietha kethengupfü pie tshukecü suna hie kerekenieko, puo puo mesi shekel ker, suna hie peteko kesa shekel krie puo di mepfü,

⁸⁷ kethe ruosuo la khunuo pete thudo kerekenie, tekuochü kerekenie, cie puoketa tekuonuochü kerekenie süko lhacülhale ruosuoko sa di; mu kephouma ruosuo la mvüdo kerekenie,

⁸⁸ tsiu kezekevi ruosuo la khunuo pete thudo mepfüedia, tekuochü hiesorou, mvüdo hiesorou, cie puoketa tekuonuochü hiesorou, ruosuobau kenhekelie sie hako pie ruosuobau chü kemesa.

⁸⁹ Süsie Mosae Jihova ki die putuoü rüsuopfhekiu nu le tse, cherubnie donu dietseidiekhobouu mhogei ngukemezhie bau geinu puo ki kepu mhapfhe puo si; mu süue puo ki mha pushü.