Nuolhoutsüphrü 6 - Angami Naga CL (Re-edited) Bible (BSI)

Nazirmia la Thezhoko

¹ Siro Jihovae Mosa ki:

² Israelmiako ki pushülie: Mhanuü mia puo morei miapfü puo Nazirmia chütuo üdi puo die phrashü, u thuo u kelakreipie Jihova tsütuo üdi phrashükewa sie,

³ khubezu morei zu kekuo pete khawatuo; puo bu khubezu kekhro morei krie di mezeketa zu kekhrodzü puorei krie lho, morei khubesi kerhei morei keki shierei cü lho.

⁴ Puoe nazir kechü teikiko khubesi puoshülou morei puokou shierei pie kechü vie puorei cü lho.

⁵ Siro puo kha kreipie keba teikiko tsüpfü pie puo tsü thielie lho, puo kha kreipie Jihova tsükewa teiu tseita kemochie puo mesa ba zo; puo tsütha pesepfü ba zotuo.

⁶ Puo kha kreipie Jihova tsükeba teikiko puo bu kesiamo penuo vo lho.

⁷ Puo puo morei puo zuo morei puo siezeu, morei puo üpfü siaketa la puo bu puo perhuwalie kenjü; kekreilamonyü puo thuo puo kha kreipie Ukepenuopfü tsükewa puo tsügei keba la.

⁸ Puo nazirmia chü keba chie puoe Jihova mhodzü mesa ba zo.

⁹ Siro puo khieki nu huomia sia mha zota, di puo bu puo kha kreipie keba tsüu perhuwa ro, puo bu puo chü kemesakecü nhie puo tsü thiewatuo, zha thenie nhie thiewatuo.

¹⁰ Zha thetha nhie puo bu mekhru morei paruonuo kenie se rüsuopfheki kicieu nu zievo-u ki vortuo,

¹¹ sidi zievo-ue puo pie kephouma ruosuo mu kekreiu pie kethe ruosuo chü di puo la ruotho chütuo, kekreilamonyü kesiamo la puo phoumatakecü la. Siro sünhie puo tsü chü kemesa latuo,

¹² sidi puo bu puo thuo puo kha kreipie keba teiko kha kreipie Jihova tsütuo, sidi cie puoketa tekuochü puo se vor di kejo ruosuo chütuo; derei sümhodzü teiko we mhapuorei motatuo; kekreilamonyü puo kha krei kemesapie keba tsüu perhuwaketa la.

¹³ Siro Nazirmia la thezhoe hau, puo kha kreipie keba teisozhako tseiketa sie; puo ze rüsuopfheki kicieu nu vortuo,

¹⁴ sidi mha khapie Jihova tsütuo, cie puo keta tekuochü kemesa yopuo pie kethe ruosuo mu cie puoketa tekuoü kemesa yopuo pie kephouma ruosuo mu tekuochü kemesa puo pie kezekevi ruosuo chütuo,

¹⁵ mu khreiüshükemo niekhrüda, thou kevitho tier keripie chükelie niekhrüda, mu khreiüshükemo tier pie kenhe di riekelie niekhrüda se merha puo nunu lhacülhale ruosuo mu kekrie ruosuoko sa se Jihova rüsuoketuo la se vortuo.

¹⁶ Sidi zievo-u bu süko se Jihova mhodzünu vo di kephouma ruosuo mu kethe ruosuo chütuo.

¹⁷ Süsie puoe tekuochüu mu merhau nu khreiüshükemo niekhrüda sapie kezekevi ruosuo chüpie Jihova rüsuotuo: mu zievo-u bu süu thou ruosuo mu kekrie ruosuo rei chüshütuo.

¹⁸ Siro Nazirkoe rüsuopfheki kicieu nunu puo kha kreipie keba tsüu thietuo, sidi puo kha kreipie keba tsüthau selie di pie kezekevi ruotho-u khro mi kebau gei shüshütuo.

¹⁹ Süsie zievo-u bu tekuo bou bekelieu mu merha nunu khreiüshükemo niekhrüda puo mu khreiüshükemo niekhrüda kerüpfü puo selie di pie Nazir-u, puo kha kreipie kebau tsü thiekewa sie puo dzie nu khashütuo.

²⁰ Sidi zievo-u bu süko pie Jihova mhodzü piesie kegekecü ruosuo chü di kegeshütuo, hau zievo-u la mesa mu kegekecü khouzüu mu puodo-u rei mesa zo, süsie Nazir-u bu khubezu krielie vi.

²¹ Nazirmia puoe die phrakeshüu la thezho hauha Jihova ki ruosuo khakeshü cie puoe Nazirmia chütuo üdi puo die phrakeshü medzituo, hasie rei puoe chülie vi ro mha kha sashü di puo thuo puo chü kemesalieketuo la thezho haha chütuo.

Zievo-u Theja Khakeshü

²² Süsie Jihovae Mosa ki:

²³ Aron mu puo nuonuoko ki pushücie, hakemhie di nieko japie Israelko tsütuo: No uko ki,

²⁴ Jihova bu japie n tsülie mu n ze baliecie.

²⁵ Jihova bu puo zie pie n va pezielie, mu n khrie n ngumezhiekelieu chücie.

²⁶ Jihova bu puo zie pie n meholie, mu noune pie n tsükelieu chücie.

²⁷ Sükemhie di uko bu a za pie Israelko gei pie batuo; sidi a japie uko tsütuo.