Nuolhoutsüphrü 5 - Angami Naga CL (Re-edited) Bible (BSI)

Razhüchü nunu Kelhiwaketuoko

¹ Siro Jihovae Mosa ki:

² Israelko ki diekhashülie, razhüchü nu mpa chü keba khe mu puo gei krukecü kechü huo ketuo khe mu kehoupuorei kesiamo bie di rhuketamia khapie chazou shüwalie.

³ Uko bu a uko donu bayakezha razhüchüu perhuwa moketuo la thepfu shierei thenu shierei khapie razhüchü chazoutsa shüwalie.

⁴ Sitse Israelmiako sükemhie chülie di uko pie razhüchü khie shüwa; Jihovae Mosa ki kepu mhie Israelkoe chülie.

Thesu Khakeshü Zho

⁵ Jihovae Mosa ki:

⁶ Israelko ki pushülie, thepfu shierei thenu shierei kekreimia puo gei kekrüwa di Jihova kepele varhuowa, di puoe jota ro;

⁷ puo bu kephouma chükewau phratuo, mu puo jokewau sou kha tseishü mu süu pengou-zapuo sa pie mia gei kejo chükewau tsütuo.

⁸ Mia puo gei kekrükeshüu puose puoyie jü liro kekrükewa thesuu pie Jihova tsütuo, süu zievo-ue pietuo mu kekrükewako rhakelie tekuochüu rei satuo.

⁹ Siro Israelko mha kemesa vie khakeshü pete se zievo-u ki kevo khe, puo vie chü zotuo.

¹⁰ Siro kehoupuo vie rei pie kemesachükewa khe, puo vie zotuo, mia mhakehoupuorei pie zievo-u ketsü pete puo vie zotuo.

Kerüzhü Nupfü la Thezho

¹¹ Süsie Jihovae Mosa ki:

¹² Israelko ki pushülie, mianupfünuo puoe cha vajo di puo nupfu zho varhuota,

¹³ sidi puo nupfu pekhre di mia puo zezhü di puo perhuwa mu puo kesuo kechüko telie mo mu miapuorei ngu di zhapu chülie kenjüta;

¹⁴ sirei puo nupfue puo keropfü puo perhukewa puo kimia puo perhuwa kemopfü le pesuota ro,

¹⁵ themiau bu puo kimiapfü ze zievo-u ki vortuo, mu puo kimiapfü bu puo ruosuo chüketuo la barli thou efa ker-zapuo, puo mho tier lashü kemo morei kethengu rei khashü kemo se vortuo, kekreilamonyü mha kesuo rükralieketuo la hauha kerükra thou ruosuo kechü, lekepesuo la lhacülhale ruosuo puo zo.

¹⁶ Süsie zievo-ue thenupfü ze Jihova mhodzü vortuo;

¹⁷ sidi zievo-u bu rünyo pie kechü mhabou puo nu kemesa dzüu khashülie, mu rüsuopfhekiu kiluo nu kemesa dzüu khashülie, mu rünyo selie di pie dzü nu khashütuo.

¹⁸ Siro zievo-ue thenupfü pie Jihova mhodzünu pie balietuo, puo tha kenyhapfü batuo, sidi kerükra lhacülhale ruosuo kechüu, süu lekepesuo la lhacülhale ruosuo kechüu pie puo dzie nu shüshütuo: mu zievo-ue se rüpfhürüseketuo dzü kepfhüu pielietuo.

¹⁹ Sidi zievo-ue thenupfü bu rüse di puo ki, “Thepfumia puorei n ze zhü mo mu no n nupfu khrükhro ba di cha vajo se mha mesa kemotsatie vota moliro, se rüpfhürüseyakezha dzü kepfhü hau n gei mhapuoreilie lho.

²⁰ Derei no n nupfu khrükhro ba di cha vajo di n nupfu kemo kekrei huo ze zhü di n perhu liro,”

²¹ süsie zievo-u bu thenupfü ki rüpfhürüsekecü rüseu pu di “Jihovae n va chü kerümiewa mu n nuobvü krüketa ki, Jihovae n chüpie n bu n themia donu rüsekepfüpfü puo chütatuo.

²² Mu rüpfhürüsekecü dzü hau n rie nu kele ki n va chü kerümiewa mu n nuobvü krütatuo” silie mu thenupfüe sie, “Amen, Amen,” isituo.

²³ Süsie zievo-ue rüpfhürüsekeshü dieko pie leshüda puo nu thulietuo, mu süko khrüpie kepfhü dzüu nu shülietuo.

²⁴ Süsie thenupfü bu rüpfhürüsekeshü kepfhü dzüu krietuo, sitse rüpfhürüsekeshü dzüu puo nou le di puo bie kemezhieshütuo.

²⁵ Siro zievo-ue u kero lhacülhale ruosuou thenupfü dzie nunu pielietuo, sidi lhacülhale ruosuou piesie Jihova mhodzünu kegeshütuo, sidi süu pie ruosuobau kiki vortuo.

²⁶ Sitse zievo-ue lhacülhale ruosuou dzielhi puo selie di, süu kerükra la ruosuobau geinu theshütuo, süsie thenupfü bu dzüu krietuo.

²⁷ Siro puoe hapfü bu dzüu kriekelie ki, mhanuü hapfüe puo nupfu rhu kemo mhatho chüwa di rhuta ro; rüpfhürüsekeshü dzüu puo nou kele ki puo bie pechü seshütuo, sidi puo va rümie mu puo nuobvü krütatuo, mu hapfüe puo themiako donu rüsekepfüpfü puo chütatuo.

²⁸ Derei hapfüe puo perhuwa mo di mesa zo liro, hako puo gei vorlie lho mu puo nuo lhoulietuo.

²⁹ Haue lekepesuo la thezho-u miapfü puoe puo nupfu khrükhro ba, kekrüta di rhuta,

³⁰ morei mia puoe puorokecü nyita di puo kimia le pesuota ro, puo bu puo kimia ze Jihova mhodzünu shü di zievo-u bu mha lekepesuo la thezho hau chüpie puo gei shütuo.

³¹ Sitse kejo hau themiau gei vor molietuo mu thenu süpfü thuo puo kesuo pieu pfütuo.