Nuolhoutsüphrü 4 - Angami Naga CL (Re-edited) Bible (BSI)

Kohatmiako

¹ Süsie Jihovae Mosa mu Aron unie ki:

² Levi nuonuoko donu Kohatmia u puonuo mu u kinumia idi kedithede ba shiü phrüliecie.

³ Kehou rüsuopfhekiu nu mhachüketuo la, mhachülie kevi le di u kelhouzha cie ser nunu cie hiepengou ketso phrüliecie.

⁴ Hako rüsuopfhekiu nu Kohat nuomia mhatho: kemesatho vieko zo.

⁵ Razhüchüu keyieketuo ki, Aron mu puo nuonuokoe kinu le di kikha keyapfheu biepie dietseidiekhobouu whelietuo.

⁶ Sidi süu mhogei kemene chüzhü pie whelie mu sümhogei pfhe keloshü phrekecü se whelie di pie puo phiko nu balie.

⁷ Mu Kepekieniekhrüda mizhü gei uko bu pfhe keloshükecü puo khrashü di sügeinu, mekhouko, dzieteikhouko pie mha theyakezha tehieko mu süu mhogei Kepekieniekhrüdau khapie balietuo;

⁸ süsie süu mho pfhe kemerie puo khrashü di kemene chüzhü pie whelie di se puo phiko nu pie balietuo.

⁹ Siro uko bu pfhe teimeziekecü puo selie di pie mitubau, puo mitubouko, puo mikrei kebeko, puo mikreibouko mu uko seyakezha tierko pete whetuo;

¹⁰ sidi uko bu süu mu süu mhabouko pete chüzhü kemene pie whelie di se puo ba gei pie balietuo.

¹¹ Mu uko bu pfhe teimeziekecü puo pie suna pie kechü ruosuobau gei khrashü di chüzhü kemene pie whetuo, sidi se puo phiko nu pie balietuo.

¹² Mu ukoe kemesachüu nu se mhachüyakezha mhabou pete selie di pie pfhe teimeziekecü puo nu shülie, sidi chüzhü kemene se whelie di pie puo bagei gei balietuo.

¹³ Sidi ukoe ruosuobau nunu migeko se vo pfhe meriemegekecü puo pie whelietuo,

¹⁴ mu uko bu süu mhogei uko se mhachüyakezha mhabouko pete, mi kechü khouko, zohucieko, nyopfhükhouko, seikhouko, ruosuobau vie bouko pete pie balie; sidi ukoe kemene chüzhü se süu whelie di pie puo phiko nu pie balietuo.

¹⁵ Pfhekiu se keyietuoükecü ki Aron mu puo nuonuokoe kemesachüu mu kemesachüu kewhe vienyako pete tseilie di puo kro-u tuo sedevü tse Kohat nuonuoko bu vor pietuo derei kemesachüu vie puorei bie lho, moro uko siatatuo. Rüsuopfhekiu nu Kohatmiako bu pieketuoko mha hako.

¹⁶ Siro Aron nuou Eliazar bu mitu la tier, puore kethengu, teisonhie kerüsuo thou, kenhekecü tier, rüsuopfhekiu pete mu sünu keba pete, kemesachüu mu süu vienyako pete puo bu mehotuo.

¹⁷ Siro Jihovae Mosa mu Aron unie ki:

¹⁸ Leviko donunu Kohatmia kinuko pekawa hie.

¹⁹ Uko bu siata mo di rheilieketuo la kemesatho vie nyako penuo kevo ki hakemhie chüliecie: Aron mu puo nuonuoko bu uko mia puopuo mhatho-u mu puo pieu khapie uko tsüshülie.

²⁰ Derei Kohatko siaketa keprei la uko bu le di kemesa vieko meho rei hie.

Gershon mu Merari Yiemiako

²¹ Jihovae Mosa ki:

²² Gershon nuonuoko rei, u puonuo mu u kinumia kide ba shiü phrüliecie,

²³ rüsuopfhekiu nu mhachüketuo la mhachülie kevi le di, u kelhouzha cie ser nunu cie hiepengou ketsoko phrüliecie.

²⁴ Gershonmia mhatho mu u pie pfüketuoko:

²⁵ ukoe rüsuopfhekiu nu pfheko, rüsuopfhekiu mu süu kewhepfheko mu süu mho keba rekewa chüzhü pie puo kewhe kechüu, rüsuopfhekiu kicie nu kelha pfheu.

²⁶ Siro ruosuo kechü mechü bau nu kelha pfheko mu puo kegouko rüsuopfhekiu mu ruosuobau careu kicie nu kelha pfheu, puoe puo roko mu se puo mhatho chüyakezha nyako pete uko bu toupie tuo, mu süko se kikecüpuo chüchü morosuo shiü süko uko bu chütuo.

²⁷ Gershonmia mhakechü pete Aron mu puo nuonuoko diekhakeshüu nu zotuo, toupie ketuo mhatho pete pie uko peletuo.

²⁸ Rüsuopfhekiu nu Gershonmiako mhathoe hako, mu Aron zievo-u nuo Ithamar bu uko kemeho-u chütuo.

²⁹ Noe Merari nuonuoko rei, u puonuo mu u kinumiamia di phrütuo.

³⁰ Rüsuopfhekiu nu mhachüketuo la, mhachülie kevi le di, u kelhouzha cie ser nunu cie hiepengou ketsoko phrütuo.

³¹ Siro rüsuopfhekiu nu mhachüketuo la uko pie-e hako: rüsuokiu rako, mu kitheko, coko mu sünu cokhreko,

³² mu mechübouu lutsahatsa keba coko, süko cokhreko mu puo kezhieko mu keroko, se mhachüyakezha nyako mu puo mhathoko pete sa di mhanyako za thu phrelie di uko pieko pie uko peletuo.

³³ Merari nuonuo kinumiakoe Aron zievo-u nuo Ithamar dzie nunu rüsuopfhekiu nu mhakechü mhathoko hako.

Leviko Kephrü

³⁴ Süsie Mosa, Aron mu kehouu krütakoe Kohatmia, u puonuo puopuo mu u kinumia idi phrülie,

³⁵ rüsuopfhekiu nu mhachüketuo la mhachülie kevi le di, u kelhouzha cie ser nunu cie hiepengou ketsoko;

³⁶ mu u kinumia le di uko phrükelie mia nyie kenie krie thenie di hiepengou.

³⁷ Jihovae Mosa ki diekhakeshü tuoi di Mosa mu Aron unie Kohatmia kinumiako rüsuopfhekiu nu mhachüketuo phrükelie hako.

³⁸ Siro Gershon nuonuoko, u puonuo mu u kinumia le di phrükelieko,

³⁹ u kelhouzha cie ser nunu cie hiepengou ketsoko, rüsuopfhekiu nu mhachülie kevi le di,

⁴⁰ u kinumia mu u puonuo idi phrükelieko nyie kenie krie sorou di ser.

⁴¹ Jihovae diekhakeshü mhie di Mosa mu Aron unie Gershonnuomia kinumiako rüsuopfhekiu nu lietho chüyakezha pete hako.

⁴² Siro Merari nuomiako, u puonuo mu u kinumiamia di phrükelie,

⁴³ rüsuopfhekiu nu mhachüketuo la, mhachülie kevi le di, teicie ser nunu cie hiepengou ketsoko,

⁴⁴ u kinumiamia idi phrükelieko nyie se di krie kenie.

⁴⁵ Jihovae Mosa ki diekhakeshü tuoi di Mosa mu Aron unie Merari nuomiako kinumia phrükelie hakoha.

⁴⁶ Mosa, Aron mu Israelmia krütakoe Levimia, u kinumia mu u puonuonuo idi phrükelieko,

⁴⁷ u kelhouzha cie ser nunu cie hiepengou ketso, mhachülie kevi le di, rüsuopfhekiu nu kepfükepie mhatho chüketuo la,

⁴⁸ uko phrükelieko nyie thetha krie pengou di hiethetha.

⁴⁹ Themia kehoupuorei mhakikecüpuo chü mu pfüpfütie shikecü le di Jihova diekhakeshü tuoi di Mosa bu uko phrülie, Jihova diekhakeshü tuoi di Mosae uko phrülie.