Nuolhoutsüphrü 36 - Angami Naga CL (Re-edited) Bible (BSI)

Thenumia la Kayie Kelie Zho

¹ Josef chienuomia, Manasseh nuo Makir, Gilid kayiemia puonuo thekrükoe Mosa mu Israel puonuo krütako mhodzünu vor di sie;

² “Jihovae a niepuu bu dape di kijü kezapie Israelmiako tsünu, mu Jihovae a niepuu bu hieko siezeu Zelofehad kayieu pie puo nuo thenuko tsüshünu di diekhashü.

³ Derei ukoe Israelmia donu seyie kekrei huo ki nyita ro, hie puotsanuo kayie nunu uko kayie se uko nyhü voketa kayieu nu votatuo; sükemhie di hie puonuo kayie kijü huo pie mia tsüwatie.

⁴ Siro Israelmia Jubilee teiu kevor ki, uko kayieu pie uko nyhü vo mia phou chüketa seyieu kayie sa kesalietuo, sidi hie puonuo kayie kijü nunu uko kayie kijüko setatie.”

⁵ Sitse Mosa Jihovae diekhakeshü mhie pie Israelmiako ki pu di sie, “Josef nuonuoko kepuu puotou zo.

⁶ Zelofehad nuo thenuko la Jihova diekhakeshü hau; ‘Uko bu uko medomia ki nyilie vi, derei uko puo seyiemia rübei ki nyituo.

⁷ Israelko kayie kedi se seyie kekrei nu vota moketuo la, kekreilamonyü Israelmiako kehoupuorei u thuo u puonuo kayieu se batuo.

⁸ Siro Israelmia kehoupuorei u thuo u puotsanuo kayieu se balieketuo la, Israelmia donu kayie u vie kenyipfüko bu u thuo u puonuo seyiemia ki nyituo.

⁹ Sidi kayie kijü bu puotsanuo puo nunu kekrei puo nu vota molietuo; Israelmia kehoupuorei u thuo u puotsanuo kayieu se ba zotuocü la,’ ” sita.

¹⁰ Zelofehad nuo thenuko Jihovae Mosa ki diekhakeshü mhie chülie.

¹¹ Sidi Zelofehad nuo thenuko, Mahla, Tirza, Hogla, Milka mu Noah, hakoe uko puonuo siezedzürie nuonuoko ki nyilie.

¹² Ukoe Josef nuou Manasseh nuonuoko ki nyilie di uko kayie bu uko puonuo kayie nu balie.

¹³ Jihovae Jordan rü khie Moab kijü razhako nu keba Jeriko nunu Mosa ki thezho mu die khapie Israelko tsükeshüko hakoha zo.