Nuolhoutsüphrü 35 - Angami Naga CL (Re-edited) Bible (BSI)

Levimia Nadiko

¹ Süsie Jordan rü khie Moab kijü razha Jeriko nunu Jihovae Mosa rüchü di sie,

² Israelko ki pushülie: Leviko bu lhouketuo la nieko phruokeshü kijü nu rünako, mu uko khurinuo la rünako khieümhouko nu nie-e kijü khapie Leviko tsütuo.

³ Sidi uko bu nadiko nu tsiu puokhieümhouko nu uko thu, uko kicükiriko mu uko khunuoko pete bu tuotuo.

⁴ Siro rüna khieümhou nu pie Leviko tsüketuoko, rünau chazoutsa cahou sozha nunu lutsahatsa thu nyie puopuo ketsotuo.

⁵ Siro nieko rünau bu puo metsuo nu mu chazou rie nunu mejü di niathutsa thu nyie kenie, mu pekhrotsa thu nyie kenie, tsiu niakratsa thu nyie kenienie mu pesotsa thu nyie kenieniecü mejülietuo. Hako pie uko rünako kirituo chütuo.

⁶ Siro nie rüna pie Leviko tsüketuoko rünako liro nadi hiediaekenie, mu süko mia kedukhrimia bu ta volie kevi themou nadi sorou sa.

⁷ Nieko rüna pie Leviko tsüketuo pete kesa hiediaethetha; mu puokhieümhouko satuo.

⁸ Siro Israelko rüvie nunu nie rüna pie uko tsüketuo hamhie; kekra seyieu kinu lie pekra; mu ketsa seyieu kinu lie petsatuo; kehoupuorei puo phruo kijü ngukelie kemhie di puo rünako pie Leviko tsütuo.

Themou Kechü Rünako

⁹ Süsie Jihovae Mosa ki:

¹⁰ Israelko ki pushülie: Nie Jordan cie se Kanan nu kele ki,

¹¹ biejobiemou nunu mia dukhrikewamia bu ta volieketuo la rüna huo pie themou kechü rüna chüketuo kedalie.

¹² Sidi themou rünako nu mia kedukhrimia bu mechükehou mhodzünu tha di puo nyiekecü kemochie puo khepuu dzie nunu sia molieketuo la themou nadi hako batuo.

¹³ Nieko rüna khakeshüko donu rüna sorou pie themou nadiko chütuo.

¹⁴ Jordan rü lutsakhie rüna se mu Kanan nu rüna se khapie themou nadiko chütuo.

¹⁵ Kehoupuorei biejobiemoulie di mia dukhrikewamia bu ta vo balieketuo la Israelko la rei tsiu chazoumia la rei, mu mia kekreimia uko donu lhouketuomia la rei rüna sorou hako pie themou nadi chütuo.

Mia Kedukhri mu Thezie Khepu

¹⁶ Derei mia kehoupuorei theginya se mia puo vüshü, mu süu siata ro, puoe mia kedukhrimiata zo: mia kedukhriu bu sia petuo zotuo.

¹⁷ Morei mia puoe ketsie pie mia va di vakhriwa ro, puoe mia kedukhrimiata zo, mia kedukhrimia bu sia petuo zotuo.

¹⁸ Morei mia puoe sei pie mia vü di vükhriwa ro, puoe mia kedukhrimiata zo: mia kedukhrimia bu sia petuo zotuo.

¹⁹ Thezie khepukelieu thuo mia kedukhriu dukhriwatuo; puoe puo ze kesekelie ki, puo dukhriwatuo.

²⁰ Tsiu mia puoe mia ngumecü di mia neshü morei mia chadze ba di mha kelhoupie mia va di süu bu siata.

²¹ Morei puo ngukemvü nu puo vüshü di puo bu siata ro, mia vükhrikewau bu sia petuo zotuo, puoe mia kedukhrimiata zo; thezie khepukelieu bu mia kedukhriu ze kesekelie ki puo dukhriwatuo.

²² Derei mia puoe ngukemvü nu mo di le kemo nunu mia puo neshü morei puo chadze ba mo di mha huo kelhoupie puo vawa,

²³ morei ngu mo di ketsie kelhoupie mia puo vakhriwa zo ürei, puoe puo ngumvü morei puoe chü nyü di chü kemosie,

²⁴ mechükehouu bu thezho hako ze di mia kevüu mu thezie khepukelieu unie capi chütuo.

²⁵ Sidi mechükehouue thezie khepukelieu dzie nunu mia kerheiro pevokewau kelalietuo, mu süsie kehoue puo ze vo themou rünau nu shüwatuo: sidi kemesa tier pie puo kenhelieketa zievokezhatho-u se ketso puo bu sünu batatuo.

²⁶ Derei themou kechü kehoupuorei ta vo keba rüna sie prata,

²⁷ mu khepukelieu bu cahou sie nu puo ngulie di puo dukhriwata zo rei, puo bu phoumalie lho.

²⁸ Kekreilamonyü zievokezhatho-u siata kemochie themouu rünau nu bakecü mesekecü la, derei zievokezhatho-u se sie mia kedukhriu bu puo rüvie puo kijü nu la votalie vi.

Zhapumia mu Rhalieketuomia la Thezho

²⁹ Siro nie nuosenuoyie pete la nie kehoura lhou ba shierei hakoha pie nie la chütuo.

³⁰ Mhanuü mia puoe mia dukhriwa, mu mia keniekese tie nunu dukhrikewa zhapu ngulie ro puo pie kesia nu shü zotuo, derei zhapu puo rübei la we, mia puo bu rei sialie lho.

³¹ Sizomonyü nie bu mia kedukhrimia sia zhükecümia kerheiro rhalie kenjü, kejo la sia petuo zotuo.

³² Siro nie rhakelie ma lielie di themou nadi nu voketau bu zievokezhatho-u siata kemonu la vo puo kijü nu lhou lalie lho.

³³ Nie lhou keba kijü va perhulie lho, kekreilamonyü thezie-e kijü perhuwaya, mu thezie pekrupie va perhukewa kijüu rhalie kenjü. Mia zie pekrukeshüu zie zo kemosie.

³⁴ Nie lhou keba kijüu nu a rei lhou ba, süu chü perhuwa lho, kekreilamonyü ae Israelmiako donu lhou bayakezhau Jihova zokecü la.