Nuolhoutsüphrü 34 - Angami Naga CL (Re-edited) Bible (BSI)

Kijü Rieko

¹ Süsie Jihovae Mosa ki:

² Israelko bu die hau zelieketuo la uko ki pushücie: Nieko Kanan kijü nu kele ki (Kijü hau pie nie bu nie kayie kijü chütuo, Kanan kijü, therieko hako),

³ Edom khieki keba Zin rayha pie pekhrotsa therie chü, mu pekhrotsa therieko Kesia Dzükezha kela nunu niathutsa votuo,

⁴ sidi therieu bu pekhrotsa Akrabim ketso khor di pekhrotsa va se Zin nu votuo, sidi Kadesh-barnia pekhrotsa nu Hazar-adar nu par di Azmon nu votuo.

⁵ Sidi Asmon nunu Ijipt rütsa va vo di Dzükezha pie puo thela chütuo.

⁶ Siro niakratsa rieu liro, Dzükezhatho-u mu puo rieko tuo, hau pie nie niakratsa rieu chütuo.

⁷ Siro pesotsa nieko rieu bu hautuo: Nieko rieu bu Dzükezhatho-u nunu Hor Kijüthou gei va votuo,

⁸ Hor Kijüthou geinu Lebo-hamat va vo Zedad ketso tuo.

⁹ Sidi therie süu Zifron nu partuo, mu Hazar-enan nunu süu kela chütuo, hau pie pesotsa nie rie chütuo.

¹⁰ Siro niathutsa nieko rieu Hazar-enan nunu Shefam ketso votuo;

¹¹ sidi therieu Shefam nunu Ain niathutsa keba Ribla nu ketuo; mu niathu kevatsa si zo ke di Kineret dzükezha tsotuo.

¹² Sidi therieu bu si zo Jordan nu ketuo, mu Kesia Dzükezha pie puo thela chütuo. Hau pie nie kijü chütuo, puo khieümhou puo therie cüko medzituo.

¹³ Siro Mosae Israelko ki diekhashü di sie, Jihova seyie thepfüko mu seyie puotieu tsütuo üdi pukeshü kijü hau niekoe dape di weketuo la kezatuo.

¹⁴ Kekreilamonyü Reuben yiemiako uko puonuo, Gad yiemiako uko puonuo mu Manasseh yiemia tietsa idi uko kijü ngulie;

¹⁵ seyie kenie mu seyie puotie hakoe Jordan rü khie lutsa Jeriko niathutsa, niaki kepartsa nu uko kijü ngulie.

¹⁶ Süsie Jihovae Mosa ki:

¹⁷ Themia hanie bu nie kayie chüketuo la kijü kezapie nie tsütuo: Eliazar zievo-u mu Nun nuou Joshua.

¹⁸ Siro kijü kayie kezaketuo la seyie pete nu krüta puopuo zeliecie.

¹⁹ Uko za hako: Juda yiemia Jefune nuou Kaleb,

²⁰ mu Simeon nuonuoko yiemia Amihud nuo Shemuel.

²¹ Benjamin yiemia Kislon nuou Elidad.

²² Dan nuonuoko yiemia donu krüta, Jogli nuou Buki.

²³ Josef nuonuoko Manasseh nuonuoko yiemia donu krüta puo Efod nuou Haniel.

²⁴ Efraim nuonuoko yiemia krüta puo, Shiftan nuou Kemuel.

²⁵ Zebulun nuonuoko yiemia krüta puo Parnak nuou Elizafan.

²⁶ Isakar nuonuoko yiemia krüta puo Azan nuou Paltiel.

²⁷ Asher nuonuoko yiemia krüta puo, Shelomi nuou Ahihud.

²⁸ Naftali nuonuoko yiemia krüta puo, Amihud nuou Pedahel.

²⁹ Kanan kijü nu Israelmia nuonuoko kijü kezaketuo la Jihovae diekhapie themia hako tsüshü.