Nuolhoutsüphrü 33 - Angami Naga CL (Re-edited) Bible (BSI)

Israelko Rüve Dze

¹ Mosa mu Aron krüta khro nu Israelmia rüpfhünuo puo krokro chü di Ijipt nunu ta kepar hamhie:

² Mosae Jihova diekhakeshü mhie di uko tuo sedekeshü thechüko puo sie puo idi thulie, mu uko thechü puo nunu tuo vovokecü hakoha.

³ Thekhrü kerieu zha kerepengou nhie Israelmiako Ramese nunu tuoshü, ciekevonyi sienhie Ijiptmia pete mhingu nunu thepfu se di tuoshü,

⁴ Ijiptmiakoe Jihova thuo uko donunu uko nuonuo nuorieko dukhrikewako khrukeba ki ukoe tuoshü: süki Jihovae uko rhuoko rei pejoshü zo.

⁵ Sidi Israelmiako Ramese nunu tuo vor Sukot nu uko razhü chülie

⁶ siro ukoe Sukot nunu tuo vor rayha tie nu keba Etham nu uko razhü chülie.

⁷ Ukoe Etham nunu tuoshü di tuo la se Baal-zefon ze kepetsou keba Pi-hahirot nu vo di Migdol tso mo zacü kinu uko razhü chülie.

⁸ Siro uko Pi-hahirot mhodzü nunu tuo dzükezha pfüthese rayha nu volie: sidi uko Etham rayha nu zha se tuo vo Mara nu uko razhü chülie.

⁹ Sidi ukoe Mara nunu tuoshü di Elim nu vorlie, mu Elim nu dzüluo kerekenie tsiu kukuobo hiethenie ba; mu uko sünunu uko razhü chülie.

¹⁰ Süsie ukoe Elim nunu tuo vor di Kemerie Dzükezha khieki nu razhü chülie.

¹¹ Siro uko Kemerie Dzükezha nunu vor Sin rayha nu razhü chülie.

¹² Tsiu Sin rayha nunu tuo vor Dofka nu razhü chü.

¹³ Siro ukoe Dofka nunu tuo vor Alush nunu razhü chü.

¹⁴ Uko Alush nunu tuo vor Refidim nu razhü chü, mu sünu themiako bu krieketuo la dzü jüta.

¹⁵ Uko Refidim nunu tuoshü di vor Sinai nu razhü chülie.

¹⁶ Sidi ukoe Sinai rayha nunu tuoshü di vor Kibrot-hatava nu razhü chülie.

¹⁷ Siro ukoe Kibrot-hatava nunu tuoshü di vor Hazerot nu razhü chü.

¹⁸ Ukoe Hazerot nunu tuoshü di vor Ritma nu razhü chü.

¹⁹ Ukoe Ritma nunu tuoshü di vor Rimon-perez nunu razhü chü.

²⁰ Mu Rimon-perez nunu tuoshü di vor Libna nu razhü chülie.

²¹ Uko Libna nunu tuoshü di vor Risa nu razhü chü.

²² Siro uko Risa nunu tuoshü di vor Kehelatha nu razhü chü.

²³ Mu ukoe Kehelatha nunu tuoshü di vor Shefer kijüthou nu razhü chü.

²⁴ Ukoe Shefer kijüthou nunu tuoshü di vor Harada nu razhü chü.

²⁵ Siro ukoe Harada nunu tuoshü di vo Makelot nu razhü chü.

²⁶ Mu Makelot nunu tuoshü di vo Tahat nu razhü chü.

²⁷ Ukoe Tahat nunu tuoshü di vo Tera nu razhü chü.

²⁸ Süsie ukoe Tera nunu tuoshü di vo Mitka nu razhü chü.

²⁹ Mu ukoe Mitka nunu tuoshü di vo Hashmona nu razhü chü.

³⁰ Ukoe Hashmona nunu tuoshü di vo Moserot nu razhü chü.

³¹ Süsie Moserot nunu tuoshü di vo Benejakan nu razhü chü.

³² Mu Benejakan nunu tuoshü di vo Hor-hagidgad nu ukoe razhü chü.

³³ Mu Hor-hagidgad nunu tuoshü di vo Jotbatha nu razhü chü.

³⁴ Ukoe Jotbatha nunu tuoshü di vor Abrona nu razhü chü.

³⁵ Mu ukoe Abrona nunu tuoshü di vo Ezion-geber nu razhü chü.

³⁶ Tsiu Ezion-geber nunu tuoshü di vo Zin rayha nu (Zin üse Kadesh üya) razhü chü.

³⁷ Tsiu ukoe Kadesh nunu tuoshü di Edom kijütsei gei keba Hor kijüthou geinu razhü chü.

³⁸ Siro Israelko Ijipt kijü nunu ta parkelie cie hiedia cie khrü pengouu zha therie nhie, Aron zievo-u Jihovae diekhakeshü tuoi Hor Kijüthou gei kho di sügeinu siata.

³⁹ Mu Aron Hor Kijüthou geinu siaketa ki puo kelhouzha cie krie puo di mepfüeseta.

⁴⁰ Süki Kanan-u, Kanan kijü nu Negeb nu bayakezha Arab kediue Israelmiako vorkezhü sishü.

⁴¹ Süsie uko Hor Kijüthou geinu tuoshü di vo Zalmona nu razhü chü.

⁴² Tsiu ukoe Zalmona nunu tuoshü di vo Punon nu razhü chü.

⁴³ Süsie ukoe Punon nunu tuoshü di vo Obot nunu razhü chü.

⁴⁴ Ukoe Obot nunu tuoshü di vo Moab rie khieki keba Iye-abarim nu razhü chü.

⁴⁵ Mu uko Iim nunu tuoshü di vo Dibon-gad nu razhü chü.

⁴⁶ Tsiu ukoe Dibon-gad nunu tuoshü di vo Almon-diblathaim nu razhü chü.

⁴⁷ Süsie ukoe Almon-diblathaim nunu tuoshü di vo Nebo mhodzü keba Abarim kijüthouko geinu razhü chü.

⁴⁸ Tsiu uko Abarim kijüthouko geinu tuoshü di vo Jordan rü khie Moab razha nu keba Jeriko nu razhü chü.

⁴⁹ Mu ukoe Jordan rü khie Moab razhako nu Bet-jeshimot nunu Abel-shitim ketso razhü chü.

Kanan Kijü Penyüketuo la Chathako

⁵⁰ Siro Jordan rü khie Moab razha Jeriko nunu Jihovae Mosa ki:

⁵¹ Israelko ki pushücie: nie Jordan rü cie se Kanan nu kele ki,

⁵² nie mhodzü nunu rünako nu themia lhou keba pete whuowatuo, mu nie ketsie miarhiko pete tsiu uko terhuorhiko pete pekawatuo; mu uko rüsuochü thechü kerükrieko pete bierhuowatuo.

⁵³ Mu nie kijü pevielie di sünu lhoulietuo, kekreilamonyü nieko bu pie nie rüvie chütuo üdi ae kijüu pie nie tsüwate.

⁵⁴ Tsiu nie dape di upuonuo za parkelieu pie süu tsüshü idi kijü rhuo kezalietuo; themia kekramia kayie pie tsü pekra mu themia ketsamia kayie pie tsü petsalietuo. Kehourapuorei puo za parkeliemia süu puo vietatuo, niekoe puotsanuopuotsanuo idi kijü rhuo kezatuo.

⁵⁵ Derei nie nie mhodzü nunu themia lhou kebako whuowa moliro, nie uko khapie kebako bu nie mhi nu kerhu lekecü tsiu nie socü nu zohu tuoi batuo, sidi nieko rüna chü keba kijü sünu uko bu nie keyhutuo.

⁵⁶ Mu a uko gei chüshütuoü kebau pie nieko gei chüshütatuo.