Nuolhoutsüphrü 32 - Angami Naga CL (Re-edited) Bible (BSI)

Jordan Niathutsa Lhouketa Seyieko

¹ Siro Reuben yiemiako mu Gad yiemiako mithu nyi phi ru harie, ukoe Jezer kijü mu Gilid kijü khurinuo la viketuo kijü ngushü,

² süla Gad yiemiako mu Reuben yiemiako vor Mosa mu Eliazar zievo-u mu mechükehou krütako ki,

³ “Atarot, Dibon, Jazer, Nimra, Heshbon, Eliale, Sebam, Nebo mu Beon,

⁴ Israel mechükehou mhodzünu Jihova penyükeshü kijü hako khurinuo la viketuo, mu n kituokoe uko kicükiri nyi.”

⁵ Sidi ukoe sie, “Hie n mhiki n khriepfülie üro, kijü hau pie n kituoko phruoshüwacie, di hie bu Jordan cie pra hietacie.”

⁶ Derei Mosae Gad yiemiako mu Reuben yiemiako ki, “Nie siezedzürieko terhü nu vo mu nie bu haki rülei batatuo me?

⁷ Siro Israelko Jihova khapie uko ketsü kijü nu votuo ükezhü nie kiüdi uko melou chü pesuoya ga?

⁸ Ae Kadesh-barnia nunu nie puonuoko ketsepie kijü mehokeshü ki uko rei hamhieta ze.

⁹ Kekreilamonyü ukoe Eshkol Razha nu kho di kijü kenguki, ukoe Israelmiako bu Jihova kha uko ketsü kijü nu vo moketuo la uko melou chü pesuowa.

¹⁰ Sünhie uko Jihova nou va kerüpewa di puo bu rüse di sie,

¹¹ ‘Ijipt nunu ta kepar themia u kelhouzha cie mepfü mu sümhoko bu ae Abraham, Isak mu Jakob ki rüsepie kezhü kijüu ngulie lhote, kekreilamonyü ukoe a siemedzi tou tuo mote;

¹² Jihova siemedzi toukelie Kenizmia Jefune nuou Kaleb mu Nun nuou Joshua unie zo kemosie,’ siwa.

¹³ Sidi Jihova bu Israel gei puo nou rüpeta di Jihova mhodzünu mha kesuo chükewa thephou pete jüta kemochie puoe uko bu cie hiedia nha nu whi tuota.

¹⁴ Siro harie, kephouma themiako, nie puonuoko sou nu niekoe sier, Jihova nou vakerüpe sapie puo bu Israel petsoutatuoüte.

¹⁵ Kekreilamonyü nie puo siemedzi mo di rüreita ro, puoe rayha nunu nie khawa di nie la themia hako pete pekawatuo.”

¹⁶ Sitse ukoe puo ki vor di sie, “Thechü hanunu hie khurinuo bou houtuo, mu hie hie nuonuoko la nadi chütuo,

¹⁷ derei hie we Israelmiako ze vo uko ba nu tsoshü kemochie, uko mhodzünu voshütuoü hie rünyie kesese ba zo, mu kijü hau nu kelhouko la kuda houshü di hie nuonuo bu batatuo.

¹⁸ Israelmiako kijü u phruo ngu phrelie kemochie hie la hie kinu vortalie lho zo.

¹⁹ Siro Jordan niathu hatsatie nu kijü hie ya ngulieketa la, hie Jordan rü lutsakhie we uko ze kijü pevielie lho,” sita.

²⁰ Süla Mosae sie uko ki, “Mhanuü nie mha hako chülietuoü, nie rünyie se terhü la Jihova mhodzünu phishütuo üro,

²¹ nie rünyie kese khe Jordan rü khie cie vo Jihova mhodzünu ngumvüko pete whuowa di kijüu lielieta ro,

²² süze nieko bu la votatuo, sitse Jihova mhodzü rei mu Israel mhodzü rei nieko kejo jütatuo; sidi nie bu kijü hau pie nie vie chülietuo.

²³ Derei nie sükemhie chülie moro, harie, nie Jihova mhodzü phoumate, mu nie kephouma thuo nie pfhüshüketuo si touliecie.

²⁴ Nie nupfünienuo la nadi chülie mu nie kuoko bou houliecie, derei nie phrakeshü mhie chülie.”

²⁵ Sitse Gad mu Reuben yiemiako sie, Mosa ki, “A niepuue diekhakeshü tuoi n kituokoe chü zotuo.

²⁶ Hie nuonuo mu hie nupfünuoko, hie kuo, hie mvü mu hie thu hie riko Gilid nadi nu khapie batuo;

²⁷ derei a niepuu kepu mhiei n kituoko we terhünyie kese pete Jihova mhodzü terhükegeiketuo la pratuo,” sishü.

²⁸ Süla Mosae uko dze pie Eliazar zievo-u, mu Nun nuou Joshua, mu Israelmia puonuo krütako ki pushü.

²⁹ Sidi Mosae uko ki, “Gad yiemiako mu Reuben yiemiako rünyie kese pete Jihova mhodzünu vo terhü kegeiketuoko ki nieko ze Jordan cie vo di kijü lieshü nieko tsü ro nie-e uko bu Gilid kijü pie uko vie chüketuo la pie uko tsütuo;

³⁰ derei ukoe rünyie se di nieko zepra moro, uko bu rei Kanan kijü nu nieko donu uko rüvie nyi zotuo.”

³¹ Sitse Gad yiemiako mu Reuben yiemiako sie, “Jihova n kituoko ki kepu tuoi hieko chüüze zotuo.

³² Hie rei hie rünyie se di Jihova mhodzünu, Kanan kijü nu votuo derei kijü hie ya we Jordan hatsakhie zotuo.”

³³ Süsie Mosae Amormia kediu Sihon, siro Bashan kediu Og rüvieko, kijü mu nadiko, tsiu sükhieümhou rüna pete khapie Gad yiemiako, Reuben yiemiako mu Josef nuou Manasseh yiemia tietsa tsüwa.

³⁴ Sitse Gad yiemiakoe Dibon, Atarot, Aroer,

³⁵ Atrot-Shofan, Jazer, Jogbeha,

³⁶ Bet-nimra, mu Bet-haran, rünako chü lalie di kudako pfhe mu uko kuoko bou chülie.

³⁷ Siro Reuben yiemiako Heshbon, Eliale, Kiriathaim,

³⁸ Nebo mu Baal-meon (süko za kediwa) rünako mu Shibma nadiko chü lalie sidi uko rüna chükelieko zatho pekreiwa.

³⁹ Siro Manasseh nuou Makirmiako Gilid nu vo di süu lielie, di sünu keba Amorko whuowa.

⁴⁰ Siro Mosa Gilid pie Manasseh nuou Makir tsüwa, sidi puo bu sünu rüna chü bata.

⁴¹ Sitse Manasseh nuou Jair-e vo di sünu rünako lielie di süko üse Havot-Jair üdi kielie.

⁴² Tsiu Nobae vo di Kenat mu sünu rünako lielie, sidi rüna süu zatho pie puo za kemhie Noba üdi kielie.