Nuolhoutsüphrü 31 - Angami Naga CL (Re-edited) Bible (BSI)

Midianmia gei Khepukelie

¹ Süsie Jihovae Mosa ki,

² “Israelmiako bu Midianmia gei u khepuliecie, süsie n ze n themiako ki votatuo.”

³ Sitse Mosae themiako ki, “Terhü chüketuo la themia keseliecie, uko bu Midianmia whuoketuo la Jihova khepu noupfhüu pie Midianmia gei shüketuo la.

⁴ Nie Israel seyie pete nunu seyie puo nu mia nyie puopuokecü ketsepie terhü nu shütuo.”

⁵ Süla Israelmia nyie kekra donunu, seyie puo nu mia nyie puopuo di mia nyie kerekenie bu terhü nu voketuo la keselie.

⁶ Sidi Mosae seyie puo nu mia nyie puopuo ketsepie terhü nu shü, mu Eliazar zievo-u nuou Finehas bu kemesachü nu mhanyako mu kemichie kevor ki khoushüketuo la ketsüko se puo dzie nu pie di uko ze terhü nu vo.

⁷ Sidi ukoe Jihova diekhakeshü mhie, Midian ze kegei di thepfumia khe dukhriwa.

⁸ Ukoe terhü nunu dukhrikewa kekreiko sa di Midianmia kedi pengou hako rei sa dukhriwa: Evi, Rekem, Zur, Hur, mu Reba; siro ukoe zhiecha pie Beor nuou Balaam rei dukhriwa.

⁹ Sidi Israelmiakoe Midianmiapfüko mu uko nuonuoko tepie uko die chülie mu uko kiri pete, thukro pete mu uko vienya pete ketalie.

¹⁰ Siro uko lhou keba nadi pete mu uko kudako mi pie the phrewa,

¹¹ derei uko themiako mu khunuoko zo we tezeta tsiu mhanya rei ketalie.

¹² Sidi ukoe kedie tekelieko mu khurinuo tekelieko tsiu mha ketakelieko se Moab razhau nu Jeriko nunu razhü chü kebau nu Mosa, zievo-u Eliazar mu Israelmia mechükehou ki vor.

Terhü nunu La Kevor

¹³ Sitse Mosa, Eliazar zievo-u mu mechükehou krütakoe razhüchü nunu par di uko ze kese.

¹⁴ Sitse Mosae rüpfhünuo mhokezhako, nyiemhokezhako mu kriemhokezhako terhü nu vo di la kevorko gei puo nei mota.

¹⁵ Mosae sie uko ki, “Nieko thenumia pete perheishü zo me?

¹⁶ Thenu hako Peor (nu mhachüketau) nyieu nu Balaam cha tha ze di Israelmiako chüpie uko bu Jihova ngumvü sieta, di thesau bu Jihova kehou nu vorta zo.

¹⁷ Süla tsie thepfunuo kecüko pete dukhriwalie mu thenumia thepfumia zewaketa pete dukhriwalie.

¹⁸ Derei thenunuomia thepfu ze moluokecü pete nie la khapie baliecie.

¹⁹ Siro nieko zha thenie razhüchü khie batuo; kehoupuorei mia dukhrikecümia, mu kehoupuorei kesiamo biekecümia zha se nhie mu zha thenie nhie nie thuo nie chü kemesalietuo, nie rei mu nie diemiako rei sa.

²⁰ Siro pfhenei chüzhü pie kechü pete mu temvümie pie kechü pete, tsiu sei pie kechü vie pete chü kemesalietuo.”

²¹ Siro Eliazar zievo-ue terhü nu kevo themiako pete ki, “Jihovae Mosa ki thezho khakeshü hauha:

²² Suna, rakachü, mese, thegi, tinyü, mu guli shierei,

²³ mhakehoupuorei mi nu tutalie kelho vie pete nie the di süu chü kemesatatuo; sizomonyü kerhu chü kemesakecü dzüu rei pie chü kemesatuo: mu mi nu tutalie kevi pete nieko dzü pie chü kemesatuo.

²⁴ Siro zha thenie nhie nieko pfhenei menyiwatuo, sitse nie mesatatuo; süzenu nieko bu razhüchü nu letuo.”

Vakelie Nyako Kezakecü

²⁵ Jihovae Mosa ki,

²⁶ “No mu Eliazar zievo-u mu mechükehou puonuo thekrüko, nieko themia rei khunuo rei tekelieko kidepuo shiü phrüliecie;

²⁷ sidi süko keza kenie chülie, tietsa pie vo terhü kegeikecüko tsü mu tietsa pie mechükehouu pete tsücie.

²⁸ Siro terhü nu kevo themiako yatsatie nu themia rei, thudo rei, gada rei, mu temvü rei, tekuo rei krie pengou nu puopuokecü pie Jihova tsücie.

²⁹ Uko yatsatie se Jihova ki ruosuo chüshüketuo la süko chüpie Eliazar zievo-u tsüshücie.

³⁰ Tsiu Israelmiako vie tsatie, themia rei, thudo rei, gada rei mu temvü tekuo rei, khurinuo pete hiepengou gei puopuokecü no selie di pie Jihova rüsuokiu seyakezha Leviko tsüshücie.”

³¹ Sitse Mosa mu Eliazar zievo-u unie Jihovae Mosa ki diekhakeshü kemhie chülie.

³² Terhümiako mhanya ketakelieko, khurinuo mu themia tekelieko kesa: tekuo lakh sorou di nyie hietheniepengou,

³³ thudo nyie hietheniekenie

³⁴ gada nyie hiesorouepuo,

³⁵ mu thenumia thepfu ze kemo pete nyie serekenie,

³⁶ siro terhü nu keprako vie tsatie phrükelie tekuo mu temvü lakh se nyie serethenie di krie pengou

³⁷ mu Jihova ketsü temvüko krie sorou di hietheniepengou.

³⁸ Siro thudoko nyie seresorou; mu Jihova ketsüko hietheniekenie.

³⁹ Siro gadako nyie ser di krie pengou; mu Jihova ketsüko hiesorouepuo.

⁴⁰ Mu themiako nyie keresorou; Jihova ketsüko mia serekenie.

⁴¹ Tsiu Jihovae Mosa ki diekhakeshü tuoi Mosae süko se ruosuo chüpie Jihova tsüketuoko pie Eliazar zievo-u tsüshü.

⁴² Siro Israelko yatsatie, süusü Mosae terhü kegeikecüko ze kezakeshüko,

⁴³ tsie themia kro-u yatsatie temvü lakh se nyie serethenie di krie pengou,

⁴⁴ thudo nyie seresorou,

⁴⁵ gada nyie ser di krie pengou,

⁴⁶ mu themia nyie keresorou,

⁴⁷ Jihova diekhakeshü mhie Israelko yatsatie nu Mosae themia rei khunuo rei hiepengou geinu puopuokecü liepie Jihova rüsuopfheki mehoyakezha Leviko tsüshü.

⁴⁸ Süsie rüpfhünuo nyienyiemhokezhako mu nyiemhokezhako mu kriemhokezhako Mosa penuo vor,

⁴⁹ puo ki, “N kituokoe terhü nu kepra themia hie khro ketuoko phrü phreliete mu miapuorei jüta mo.

⁵⁰ Tsiu hieko se Jihova tsüketuo ruosuou se vorya, di hie phou chü kemesaketuo la, hie kehoupuorei ngukelie suna vieko thegi phikha roko, kethuoko, dziekhako mu cümenyieko se vorzhie.”

⁵¹ Sitse Mosa mu Eliazar zievo-u unie suna pie kechü vienya süko pete lielie.

⁵² Siro suna pie Jihova rüsuotuo üdi nyiemhokezhako tsiu kriemhokezhako kinu ngukelie pete shekel nyie keresorou krie thenie di hiepengou.

⁵³ (Terhü nu keprako u thuo u lala di mha ketakelie la.)

⁵⁴ Sidi Mosa mu Eliazar zievo-u unie nyiemhokezhako mu kriemhokezhako kinu sunako lielie di Israelko la kerükra mhatho puo chütuo üdi süko se rüsuopfhekiu nu Jihova mhodzünu vorshü.