Nuolhoutsüphrü 30 - Angami Naga CL (Re-edited) Bible (BSI)

Thenumia la Rüse Zhoko

¹ Siro Mosae Israelmia seyie krütako ki: Jihova diekhakeshü hauha.

² Mia puoe mhapuo chüshütuo üdi Jihova ki rüse puo rüseshü morei phrashüwa di puo phalieta ro, puo die rhü lalie kenjü, puo bu phrakeshü pete medzi di chütuo.

³ Siro miapfü puoe rüüchü di puo puo kinu baluocü nu mhapuo chüshütuo üdi Jihova ki rüse puo rüseshü di puo phalieta,

⁴ mu puo puoe puo rüse dieu, puoe phrashü di puo phalieketa si di puo ki mhapuorei pu mo ba ro, hapfü rüsekeshüko pete chü tseituo, mu puo thuo phrapie puo phalieketa pete chü tseituo.

⁵ Derei puo puoe süu kesi nhie puo medo kemo die pu ro, puo phrakeshüko, phrapie puo thuo puo phakelieko chü morei vi, puo puoe puo medo kemo puo ki puwaketa la Jihovae puo kejo vashütuo.

⁶ Mhanuü miapfü puoe rüsekeshüko morei mhale mo di pukeshüko se puo phapfü baluokecü nu puoe kiyata,

⁷ mu puo nupfue silie zorei puo ki mhapuorei pu mota ro, puo rüseko chü tseituo, mu puo thuo phrapie puo phakelieko pete chü tseituo.

⁸ Derei puo nupfue süu sikelie ki puo medo kemo puta ro, rüse puo gei kebau, mu puoe mhale mo di phrapie puo thuo puo phakelieko chü morei vitatuo, mu Jihovae puo kejo vawatuo.

⁹ (Derei samipfü morei puo nupfu puo vakewapfü we rüse pie puo thuo puo phakelie pete chütuo.)

¹⁰ Mhanuü puo nupfu kinu keba ki rüse morei phrapie puo phalie,

¹¹ mu puo nupfu rei si rei puo medo kemo pu mo di kemekrie bata ro puoe rüseko mu phrapie puo phakelieko chü tseituo.

¹² Derei puo nupfu süu kesi nhie puo medo kemo pu liro puo tie nu rüsekeshü kehoupuorei morei phrakeshüko chü morei vi; puo nupfue süko chü pejüwate, mu Jihovae puo kejo vawatuo.

¹³ Puo thuo puo meliekecü rüse kehoupuorei puo nupfue puo bu se tha morokesuo se tha mota rei vikecü chüwalie vi.

¹⁴ Derei puo nupfue khunhie mu khunhie mhie di puo gei kemekrie bata ro puoe phrakeshüko morei puoe pie puo phasekeba pete chütuo, puo bu süko chü tseituo, puoe süko kesi nhie puo gei kemekrietakecü la.

¹⁵ Derei puo süko sikelie puotei huo sie nu süko chü pejüwa ro, puoe puo kimia kejo-u pfütuo.

¹⁶ Thenuthepfu donu morei rüümiapfü puo chü di puo ki nu keba ki puo puo unie donu, la thezho hako Jihovae Mosa ki khashü.