Nuolhoutsüphrü 3 - Angami Naga CL (Re-edited) Bible (BSI)

Aron nuonuoko

¹ Sinai Kijüthou geinu Jihovae Mosa ze kerüchücü ki Aron mu Mosa unie seyieko hako:

² Hako Aron nuonuoko za. Phichütho-u Nadab mu Abihu, Eliazar mu Ithamar.

³ Hako Aron nuonuoko, puoe uko bu zievo mereibou nu mhachütuo üdi kenhekelie zievoko.

⁴ Derei Nadab mu Abihu unie Sinai nhatsa nu mesa kemo mi se Jihova mhodzünu ruosuo kechü la siata; siro unie nuo jü phre. Siro Eliazar mu Ithamar unie unie puo Aron kelhou ki puo ze di zievo mhathoko chü.

Leviko Mhatho

⁵ Siro Jihovae Mosa ki:

⁶ Aron zievo-u chalie chüketuo la, Levi yieko ze puo mhodzünu vorlie.

⁷ Sidi mechükehou rüsuopfhekiu mhodzünu uko bu rüsuopfhekiu nu mhathoko chü di, puo la mu mechükehou la morokesuoko chütuo.

⁸ Siro rüsuopfhekiu nu mhatho pete se uko peletuo, mu Israelmiako la rüsuopfheki nu morokesuo mhathoko chütuo.

⁹ Siro no Leviko pie Aron mu puo nuonuoko tsüwatuo; Israelmiako donu uko pie puo tsü tseiwatuo.

¹⁰ Siro no Aron mu puo nuonuoko keda kreilie di uko bu zievo mhathoko chütuo, derei kekreimia süki penuo kevormia dukhriwatuo.

¹¹ Siro Jihovae Mosa ki:

¹² Harie, ae Israelmiako donu nuorieko pete sou nu Leviko lieliete. Süla Leviko sü a vie zo.

¹³ Kekreilamonyü nuorieko pete a vie zocü la; Ijipt kijü nu ae nuorieko pete dukhrikewa nhie, a vie chütuo üdi Israel nu nuorieu pete chü kemesaliete, themia rei mu khunuo rei, uko sü a vie zo: Ae Jihova zo.

Leviko Phrükecü

¹⁴ Siro Jihovae Sinai nhatsa nunu Mosa ki:

¹⁵ No Levi nuomiako phrüliecie, u puotsanuo puopuo idi, thepfumia khrü puo mu sümhoko phrütuo.

¹⁶ Süla Mosae Jihova puo ki diekhakeshü mhie di uko phrülie.

¹⁷ Levi nuomia za hako Gershon mu Kohat mu Merari nuonuo kinumiako za,

¹⁸ siro Gershon nuonuo kinumia za hako; Libni mu Shimei.

¹⁹ Siro Kohat nuonuo kinumiako: Amram mu Izhar, Hebron mu Uziel.

²⁰ Siro Merari nuonuo kinumiako: Mahli mu Mushi. Levi nuomia puonuoko hakoha.

²¹ Libnimia kinumiako mu Shimeitmia kinumiako Gershon yiemia, Gershonmia kinumia hako:

²² thepfumia khrü puo nunu süki kephichüko phrükecü nyie thenie di krie pengou phrülie.

²³ Gershonmia kinumiako bu rüsuopfhekiu pethoutuo.

²⁴ Mu Lael nuou Eliasaf-e Gershonmia puotsanuomia krütau.

²⁵ Siro Gershon nuonuoko pelekeshü mhathoko liro, mechükehou rüsuopfhekiu nu vo pfhekiu, süu kewheu mu rüsuopfhekiu keyapfhe pete.

²⁶ Mu kiluobouu nu keyapfheko, kiluobou kicie pfhe, rüsuopfhekiu mu ruosuobau khieümhou lutsa kezhako mu sünu seyakezha keroko pete uko bu mehotuo.

²⁷ Siro Kohatmiae Amrammia kinumiako mu Izharmia kinumiako, Hebronmia kinumiako, Uzielmia kinumiakoe Kohat yiemia.

²⁸ Kohatmia kinumiakoe hako: thepfumia khrü puo nunu süki kephichüko phrükelie pete nyie thetha di krie sorou, uko bu kemesachüu pfhetuo.

²⁹ Kohat nuonuo kinumiako bu rüsuopfhekiu pekhrotsatie nu uko pfheki pethoutuo.

³⁰ Siro Uziel nuou Elizafan, Kohat nuonuo kinumiako donu krütau.

³¹ Uko bu dietseidiekhobouu mu mizhüu tsiu mitubou mu ruosuobako siro kemesachü nu seyakezha mhabouko tsiu keyapfhe mu se süu chüyakezha mha pete mehotuo.

³² Siro Aron zievo-u nuou Eliazar bu Levimia krütako mhokezha chütuo, sidi puo bu kemesachüu keseko kemeho-u chütuo.

³³ Mahlitmia mu Mushitmiae Merari kinumia: Merari kinumia hako:

³⁴ Uko thepfumia khrü puo nunu sümhoko phrükelieko nyie sorou di krie kenie.

³⁵ Siro Abihail nuou Zuriel-e Merari nuonuo kinumiako kezhau; uko bu rüsuopfhekiu pesotsa uko pfheki pethou di batuo.

³⁶ Tsiu Merari nuonuoko bu rüsuopfhekiu melako, puo kitheko, puo coko, cokhreko, sünu se mhachüyakezha nyako pete mu sünu mhatho pete chütuo.

³⁷ Siro kiluobouu lutsahatsa coko, cokhreko, puo kezhieko mu puo roko mehotuo.

³⁸ Siro Mosa mu Aron tsiu puo nuonuoko bu rüsuopfhekiu niathutsa rüsuopfhekiu niaki kepar kepetsoutsa nu uko bu razhü chütuo, sidi uko bu kemesachüu nu Israel nuonuoko kemeho chütuo; mu kekreimia süu penuo kevormia dukhriwatuo.

³⁹ Jihovae diekhakeshü ze di Mosa mu Aron unie Levimia u kinumiamia di thepfumia khrü puo nunu sümhoko pete phrükelieko nyie mepfüekenie.

Nuorieu Sou nu Leviko Chü Kemesakecü

⁴⁰ Jihovae Mosa ki, Israelmia donu thepfu nuorieko pete phrülie, khrü puo nunu sümhoko di uko za thu phreliecie.

⁴¹ Sidi no a la Leviko lieliecie. Ae Jihova zo. Israelmiako donu nuorieko pete sou nu mu Israel perinuoko donunu nuorieko pete sou nu Leviko perinuoko lieliecie.

⁴² Sitse Mosae Jihova puo ki diekhakeshü tuoi Israelko donu nuorieko pete phrülie.

⁴³ Mu thepfunuomia nuorieko pete phrükelieko nyie mepfüekenie di krie kenie di hietheniese.

⁴⁴ Süsie Jihovae Mosa ki:

⁴⁵ Israelko donu nuorieko pete sou nu Leviko lielie mu uko perinuoko sou nu Leviko perinuoko lieliecie; sidi Leviko pie a vie chütuo: Ae Jihova zo.

⁴⁶ Siro Israelmia nuorieko krie kenie di hiethenieseko mu Leviko sü kezie pete rhaketuo la.

⁴⁷ No kemesachüu nu shekel-u se di shekel puo gera mepfü, mia puo sou nu shekel pengoungou seliecie.

⁴⁸ Sidi no kerükrüko rhaketuo raka pie Aron mu puo nuonuoko tsüshücie.

⁴⁹ Sitse Mosae Leviko bu u sou chü di rhakelieko zie kebako rhaketuo rakau lielie.

⁵⁰ Puoe kemesachü shekel-u nu le di shekel nyie puo, krie se di hiesorouepengou; Israelko nuorieko lielie.

⁵¹ Sidi Jihovae Mosa ki diekhakeshü tuoi di rhaketuo rakau pie Aron mu puo nuonuoko tsüshü.