Nuolhoutsüphrü 28 - Angami Naga CL (Re-edited) Bible (BSI)

Teisonhie Kethe Ruosuou

¹ Jihovae sie Mosa ki:

² Israelko ki diekhashü di uko ki pucie: A ruosuo, a ca la mi pie thepie ruosuo kechüko, kethengu ruosuoko, no puotei touki chüshütuo.

³ Siro no uko ki pushülie, Nieko mi nu the di Jihova rüsuo morokesuo sü haha: Teisonhie chü mekecü kethe ruosuo la, tekuonuo cie puoketa puochü kemesa kenienie setuo.

⁴ No khise tekuonuo puo mu thevatie kekreiu pie rüsuo chütuo;

⁵ süsie rei lhacülhale ruosuo la thou kevitho efa ker-zapuo pie thekelie tier hin dia-zapuo pie kereikecü pie chütuo.

⁶ Hako kethengu ruosuo mi nu thepie Jihova rüsuoketuo la Sinai Kijüthou geinu pukeshü chü seiketuo kethe ruosuouwe.

⁷ Tsiu tekuonuo puo la hin dia-zapuo pie kekrie ruosuo chütuo; no kekrie ruosuo la kemesa chüu nu khubedzü kekuo lapie Jihova mhodzünu shütuo.

⁸ Siro thevatie no tekuonuo kekreiu pie ruosuo chütuo; khise lhacülhale mu kekrie ruosuo kechü tuoi, no mi nu the di kethengu ruosuo chüpie Jihova rüsuotuo.

Sabat Ruosuou

⁹ Sabat nhie tekuochü cie puoketa kemesa kenie mu süu lhacülhale ruosuo la thou kevitho tier pie reikecü efa ker-zakenie pie ruosuo chütuo.

¹⁰ Teisonhie kethe ruosuo mu kekrie ruosuo kechü tsügei rei sabat metsei kethe ruosuo hau chütuo.

Thekhrümetsei Kethe Ruosuou

¹¹ Siro nie khrülhou metsei thudonuo kenie mu tekuochü puo, tekuonuo puochü cie puoketa kemesa thenie se kethe ruosuo chüpie Jihova rüsuotuo,

¹² süusü rei thudonuo puopuo la thou kevitho efa puo ker-zase pie lhacülhale ruosuo chütuo, mu lhacülhale ruosuo la tier pie reikecü thou kevitho ker-zakenie, se tekuochü puo la setuo,

¹³ mu tier pie reikecü thou kememhie ker-zapuo pie tekuonuo puopuo la idi kethengu kethe ruosuochü di mi nu thepie Jihova rüsuotuo.

¹⁴ Siro süko kekrie ruosuo khakeshü thudo puo la khubedzü hin puotie, tekuochü la hin se-zapuo tekuonuo puo la hin dia-zapuotuo, hauha teicie nu thekhrümetsei kethe ruosuou zo.

¹⁵ Siro kethe ruosuo mu süu kekrie ruosuo chüpie Jihova tsü meyakezha sierei mvüdo puo se kephouma ruosuo chüpie Jihova tsütuo.

Khakeshü Thenyiko mu Kethe Ruosuoko

¹⁶ Thekhrü kerieu zha keredia nhie Jihova ciekevonyi batuo.

¹⁷ Tsiu khrülhouzha kerepengou nhie thenyiute, mu zha thenie khreiüshükemo niekhrüda cütuo.

¹⁸ Zha therie nhie kemesa kehou puo kehoutuo, mu nie hanhie mhapuorei chü lho,

¹⁹ derei sünhie nie thudonuo kenie tsiu tekuochü puo, mu cie puoketa tekuonuo puochü thenie se mi nu thepie kethe ruosuo chüpie Jihova rüsuotuo, hako mesa phretuo.

²⁰ Tsiu hako lhacülhale ruosuo la tier pie reikecü thou kevitho setuo, thudo puo la efa ker-zase, mu tekuochü puo la ker-zakenie pie ruosuo chütuo.

²¹ Tekuonuo thenieko puo la ker-zapuo pie ruosuotuo;

²² siro n kejo vaketuo la mvüdo puo pie kephouma la ruosuo chütuo.

²³ Teisonhie chü meyakezha kethe ruosuou süusü khise kethe ruosuou sie rei nieko ruosuo hako chütuo.

²⁴ Hakemhie nie zha thenie la teisonhie kethengu ruosuo mi nu thepie ruosuo kechü cau chüpie Jihova rüsuotuo, teisonhie kethe ruosuo mu süu kekrie ruosuo sie rei hauha chütuo.

²⁵ Siro zha thenie nhie nie kemesa kehoupuo kehoutuo; nie sünhie mhatho puorei chülie lho.

²⁶ Siro zhadoudonyi zha thenie nhie nie mhatho chieshü kerieu se lhacülhale ruosuo chüpie Jihova rüsuokecü nhie rei nieko kemesa kehou puo kehoutuo; mu nie sünhie rei mhatho puorei chü lho.

²⁷ Derei thudonuo kenie tekuochü puo, tekuonuochü cie puoketa thenie pie kethengu ruosuo la kethe ruosuo chüpie Jihova rüsuotuo.

²⁸ Siro süko lhacülhale ruosuo la thou kevitho tier pie reikecü, thudonuo puo la efa ker-zase, tekuochüu la ker-zakenie,

²⁹ tekuonuo thenieko puo la ker-zapuotuo;

³⁰ mvüdo puo nie rhaketuo la se ruotho chütuo.

³¹ Teisonhie kethe ruosuou la mu süu lhacülhale ruosuou sie rei nie süko mu kekrie ruosuo sa khashütuo. Hako pete khunuo kemesa setuo.