Nuolhoutsüphrü 27 - Angami Naga CL (Re-edited) Bible (BSI)

Zelofehad Nuo Thenuko

¹ Süsie Zelofehad nuo thenuko vor: Zelofehad-e Hefer nuou, süue Manasseh nuou, süue Josef nuou, puoe Manasseh yiemia puo, puo nuo thenuko za hako: Mahla, Noah, Hogla, Milka mu Tirza.

² Ukoe vor Mosa mu Eliazar zievo-u, mu krütako tsiu mechükehou pete mhodzünu, rüsuopfhekiu kicie mhodzünu thalie di sie,

³ “Hieko puou rayha nunu siate, mu puoe Kora kro-u, Jihova ngumvü kesie kro-u nu tuo mo,

⁴ derei puo thuo puo kephouma la siate: mu puoe puo nuo thepfumia jü. Puo nuo thepfumia kejü la üdi kidi puo kinumia donunu puo za pejütuo mu? Hie puonuo siezedzürieko donunu kijü hie ya penyicie,” sita.

⁵ Sitse Mosa uko nyieu se vor Jihova mhodzünu shü.

⁶ Sitse Jihovae Mosa ki:

⁷ Zelofehad nuopfüko kepuu mezhü zo; noe uko puo siezedzürieko donunu kijü uko ya chü bei morosuo; sidi uko puou kayie pie uko tsütuo.

⁸ Siro no Israelmiako ki: Mhanuü mia puoe siata mu puo nuo thepfumia jü ro niekoe puo kayie keyiepie puo nuopfü tsüwatuo.

⁹ Tsiu puo nuo thenu rei jü ro, nie puo kayie pie puo siezedzürieko tsüwatuo.

¹⁰ Siro puo siezedzüriemia rei jü ro, puo kayie pie puo puo siezedzüriemiako tsüwatuo.

¹¹ Siro puo puo rei puo siezedzüriemia jü ro puo kayie pie puosepuoyie puo kinumia puo kepenuotho tsüwatuo, sidi puo bu süu pevietuo. Siro Jihovae Mosa ki diekhakeshü tuoi, hau pie Israelko donu thezho puo chütuo.

Mosa Sou nu Joshua Kedakelie

¹² Süsie Jihovae Mosa ki, “Abarim kijüthou hau gei kho di ae kijü pie Israelmiako tsükeshüu mehoshücie.

¹³ Sidi no süu ngukeshü sie, n dzürieu Aron kemhie no rei n themiako ki votatuo.

¹⁴ Kekreilamonyü Zin rayha nunu themia kro-u a perhiekecü ki, no rei dzü khieki uko mhinguki nu a chü kemesakeshü dieu ze mvüte.” (Hau Zin rayha Kadesh nu Meriba dzüko.)

¹⁵ Sitse Mosae Jihova ki,

¹⁶ “Jihova, thephou peteko Kepenuopfü bu mia puo kedapie mechükehou mho shülie,

¹⁷ süu bu uko mhodzü pra mu le, uko cha tha ze pra mu lertuo, sidi Jihova mechükehou bu tekuo puo kepfhe kejü tuoita molieketuo la.”

¹⁸ Sitse Jihovae Mosa ki, “Nun nuou Joshua ruopfü puo ze ketuou zelie di n dzie pie puo tsü gei shüliecie.

¹⁹ Puo bu Eliazar zievo-u mu mechükehou mhodzünu thalie, di uko mhinguki nu mhatho-u pie puo peseshülie.

²⁰ Siro Israelmia mechükehou pete bu puo die zelieketuo la n kekuo khapie puo gei shücie.

²¹ Sidi puo bu Eliazar zievo-u mhodzünu thalie, di Eliazar bu puo la Urim ketsokecü zho-u se Jihova ki ketsocie; puo mu Israelko pete puo sa di süusü mechükehou pete puo die nunu pra mu letuo.”

²² Siro Mosae Jihova diekhakeshü kemhie chülie, sidi Joshua ze vo Eliazar zievo-u mu mechükehouu mhodzünu thalie.

²³ Sidi Jihovae Mosa ki pukeshü mhie, puo dzie yhapie puo tsü gei shülie di puo bu chüketuou pie puo peleshü.