Nuolhoutsüphrü 25 - Angami Naga CL (Re-edited) Bible (BSI)

Israel Peor nu Baal Rüsuoketa

¹ Israel Shitim nu keba ki, themiakoe Moabmiapfüko ze mha kesuo chüvüta.

² Ukoe themiako kie ze vo uko ruosuo kechüko nu hie di uko rhuoko rüsuota.

³ Sidi Israel Peor nu Baal rüsuoketa la Jihovae Israel gei puo nei mota.

⁴ Süla Jihovae Mosa ki, “Jihova noupfhü kereu bu Israel gei vor molieketuo la, themiako donu pehüko ze vor di Jihova mhodzü teirünia keba nu uko gouwaliecie.”

⁵ Sitse Mosae Israel donu capiko ki, “Nieko kehoupuorei puo themia Peor nu Baal rüsuokecü khe dukhriwaliecie” sishü.

⁶ Siro harie, Israelko rüsuopfheki kicieu nu kra keba nu Israelmia puoe Midianmiapfü puo ze, Mosa mu mechükehou pete kengu nu süpfü ze puo siezedzürieko ki vor.

⁷ Sitse Aron zievo nuou Eliazar nuou Finehas-e süu ngu tse, mechükehou donu sielie di rüngou puo chüselie.

⁸ Sidi Israel-u whuo pfhekiu nu le, sidi rüngou pie Israel-u mu thenupfü vadi zeshü di unie zekhriwa, sidi Israelko donu thesau khalie.

⁹ Siro thesa hanunu themia nyie mepfüedia siata.

¹⁰ Süsie Jihovae Mosa ki,

¹¹ “Israelmiako ngu a nei mo di a bu uko pekawatuoü kezhü nu; Aron zievo-u tsiu, süusü Eliazar nuou Finehas-e Israelmiako gei keba thesau kelawa, di a bu Israelko pekawa molie.

¹² Süla pushücie, ‘Harie, ae dietseidiekhokelie nouneu pie puo tsütuo.

¹³ Sidi puo mu puose puoyie puo sie kelhoumia bu kechachie dietseidiekhokelie zievo chütuo; puoe puo Kepenuopfü la puoro nyi di Israelmia la ruotho chüshü.’ ”

¹⁴ Siro Midianmiapfü sa di dukhrikewa Israel themiau za Zimri, Salu nuou, süue Simeonmia donu puotsanuo puo krüu.

¹⁵ Mu dukhrikewa Midianpfü za Kozbi, puoe Zur nuopfü mu puo puoe Midianmia donu puotsanuo puo krüu.

¹⁶ Süsie Jihovae Mosa ki,

¹⁷ “Midianko re zo balie, sidi uko penyüwalie;

¹⁸ kekreilamonyü Peor la mu Midianmia krüu nuopfü, uko üpfü Kozbi, Peor dze la dukhrikecü nhie dukhrikewapfü la ukoe uko do pie nieko va di nieko sewatakecü la.”