Nuolhoutsüphrü 24 - Angami Naga CL (Re-edited) Bible (BSI)

Balaam Siedzedie Kepu

¹ Balaam-e Jihova japie Israel ketsü puo neiketa ngulie tse, kekreiki mhie tuo vo themou rüsa mota, derei puo zie pie rayhatsa vata.

² Siro Balaam tosie ru, Israelkoe puotsanuo puopuo idi razhü chü keba ngulie. Sitse Ukepenuopfü ruopfüu puo gei vorta,

³ ru puoe puo dielieu pu di, “Beor nuou Balaam-e puya, puo mhi mha ngu mecümecieyakezhaue puya;

⁴ Ukepenuopfü dieko rünyülieketaue puya, Kuokejokejüu ziemho kenguue puya, Tetsu zhüta rei, puo mhi yawaya kemo-ue puya:

⁵ He-i Jakob, n pfhekiko, he-i Israel, n rüsuopfhekiko kide zivi shi!

⁶ Kukuo tsa zha se kezhü mhie, kerü khie tezie kemhie, Jihova leikeshü aloes nhapfü tuoi; dzü khie keba sedarboko tuoi;

⁷ Dzü puo lipfhü tshuzie di kru patuo; tsiu puo tsia dzü kekra nu batuo. Puo kediu Agag ki rei rükrietuo, mu puo kedi chü pezha kerükrieshütuo.

⁸ Uko ze Ijipt nunu kepar Kepenuopfü, nha thudo kia tuoi zo; puo ngukemvü seyieko cülietatuo, tsiu uko ru dutshewatuo, mu puo theütsie pie uko biewatuo.

⁹ Puoe losha kemhie di zhüta, mu loshachü tuoi; supuonie puo kesoulie ta? Japie n ketsü kehoupuo bu rei thejapfücie, mu n kerüse kehoupuorei rüsepfütuo,” si.

¹⁰ Süsie Balak-e Balaam gei puo nei mo di puo nou rüpeta, di puo thuo puo dzienie pie kevüta, mu Balak-e Balaam ki, “Ae n bu a ngumvümia rüsetuo üdi n kie ze vor ru harie, no va se japie uko tsüwate.

¹¹ Süla tsie we tuotalie; ‘A n chüpie therhupfüshüketuo lesie,’ derei Jihova n bu therhu ngulieketuo khawate.”

¹² Sitse Balaam sie Balak ki, “No dieliemia ketsekeshüko ki rei a hai di pu mo me?

¹³ ‘Balak thuo suna mu raka puo ki ketshu pie a tsütuoü shierei, mhatho kevi rei kesuo rei ae Jihova die keyiepfü di a thuo a medo chülie kenjü, Jihova a ki kepuu ae pu zotuo, sishü mo me’?

¹⁴ Tsiu harie, tsie we a themiako ki votatuo, thiesie themia hakoe n themiako gei kedipuo chüshütuo shikecü a se n pesishütuo.”

Balaam Dielie Diau

¹⁵ Sidi puoe puo dielieu pu di: “Beor nuou Balaam-e puya, puo mhi mha ngu mecümecieyakezhaue puya.

¹⁶ Ukepenuopfü dieko rünyükelieue puya, Kerükrietho-u dze kesiue puya, Kuokejokejüu ziemho kenguue puya, tetsu zhüta rei, puo mhi yawaya kemo-ue puya;

¹⁷ A puo ngutuo, derei tsiedo mo; a puo mehotuo, derei penuo moluo; Jakob geinu themvü puo siertuo, Israel geinu kedithe puo siertuo, sidi süu Moab kijü rieko penyüwatuo. Tsiu Shetmia kijü rie pete pekawatuo.

¹⁸ Edom pie puo rüvie chütuo, Seir rei puo ngumvümia rüvie chütatuo; Israel-e kuo kehie se sietuo;

¹⁹ Jakob geinu diketuo puo partuo, mu Ir nu themia lhiepie kebako pekawatuo.”

²⁰ Süsie puo Amalek meho di, puo dielieu pucü, “Amalek-e seyieko donu kerieu, derei kenuotsa kechachie ruotatuo.”

²¹ Süsie puo Kenmiako meho di, sie puo dielieu pu di: “N kebachü metei se, mu n kru rei tsiekrie geinu chü.

²² Sirei Kain ha kataketuo nu ba, Asher-e n tepie kedie chütaketuo kichie lie ta?”

²³ Süsie puoe puo dielieu pu la di, “Hou, Ukepenuopfü hakemhie chüshü ro supuonie rheilie ta?

²⁴ Derei rouko Kitim nunu vortuo, sidi Ashur mu Eber pechütuo; mu puo rei kechachie katatuo,” sita.

²⁵ Süsie Balaam sie di puo ra la vota, mu Balak rei puo thuo puo cha nu vota.