Nuolhoutsüphrü 23 - Angami Naga CL (Re-edited) Bible (BSI)

Balaam Siedzedie Kepu Kerieu

¹ Süsie Balaam-e Balak ki, “Haki nu a la ruosuoba thenie chüshü di thudo thenie mu tekuochü thenie keseshücie.”

² Sitse Balak-e Balaam pukeshü kemhie chüshü sidi Balaam-e ruosuoba puo gei thudo puo mu tekuochü puopuo idi pie ruosuo chü.

³ Süsie Balaam-e Balak ki, “No n kethe ruosuo khieki tha zolie, mu a votuo; Jihova vor a ze kese rei si mo; mu mhakehoupuo shierei puo tha a kiekeshüu a n ki pushütuo,” sidi puoe thechü kerükrie puo gei khota.

⁴ Sitse Ukepenuopfüe Balaam ze kese, ru Balaam sie puo ki, “A ruosuoba thenie chülie di ruosuoba puo gei thudo puo mu tekuochü puopuo idi pie rüsuo.”

⁵ Sitse Jihova die puo pupie Balaam pese di sie, “No la Balak ki vo di hakemhie pushü morosuo.”

⁶ Sidi Balaam tuo la vor tse, harie, Balak-e Moabmia kezhako pete ze di puo kethe ruosuo khieki tha zo.

⁷ Sitse Balaam-e puo dielieu pu di sie, “Balak-e Aram nunu a ze vor, Moabmia kediue niathutsa kijüthouko gei a ze vor: ‘Vorlie, a la Jakob rüpfhürüsewacie; mu vor di Israel pesüpemvüwacie!’ si.

⁸ Ukepenuopfü rüsewa kemo-u a kikidi rüselie ta? Jihova pesüpemvüwa kemomia, a kikidi pesüpemvülie ta?

⁹ Kekreilamonyü tsiekrie mezü geinu ae puo nguwe, mu kijüthouko geinu ae puo mehoshüwe; Harie ukoe u rübeikecü themia kro puo, seyieko nu uko sa mo.

¹⁰ Jakob yie nyophe supuonie phrülie vi ta? Morei supuonie nyophekimhou tuoi chüketa Israel phrülie vi ta? A bu miathomia puo se tuoi siatacie, mu a kela bu rei puo mhietacie!” sita.

¹¹ Sitse Balak-e Balaam ki, “No a gei kedipuo chüshü ga? N bu a ngumvümia rüsetuo üdi n ze vor, ru harie, no mhapuorei chüshü mo derei japie uko tsüwate.”

¹² Sitse puo sie, “Jihova khapie a tie nu keshüu a süu pu menuoshü morosuo mo me?” sita.

Balaam Siedzedie Kepu Kenieu

¹³ Sitse Balak sie puo ki, “No uko ngulie kevi thechü kekrei puo nu a ze di vorlie, mu uko huoyo ngutuo, uko pete ngulie lho, sidi a la uko rüsecie.”

¹⁴ Sidi puoe puo ze Zofim lieu nu Pisga mezü gei vota, mu ruosuoba thenie chülie, di ruosuoba puo gei thudo puo mu tekuochü puopuo idi pie rüsuo chü.

¹⁵ Sitse Balaam sie Balak ki, “N kethe ruosuobau khieki tha zoliecie, a vo lutsa nu Jihova ze kesetuomu” ita.

¹⁶ Süsie Jihovae Balaam ze kese, mu mha pupie puo pese di, “Balak ki la volie, di no hakemhie pushücie,” ishü.

¹⁷ Süsie puo Balak ki la vor, mu harie, puoe Moabmia kezhako ze di puo kethe ruosuo khieki tha zo. Sitse Balak sie, “Jihova kedipuo pushü ga?” isi.

¹⁸ Sitse Balaam puo dielieu pu di, “Balak, sie di rünyüliecie; Zipor nuou, a pfhe rünyüliecie:

¹⁹ Ukepenuopfüe themia di tijüya mo, morei themianuo di puo nou rüdiya mo. Puoe phrashü di süu chü motatuo me? Morei puoe phrashü di chü tseishü motatuo me?

²⁰ Harie, a bu jashünu di diekhakeshü nguliete; mu puoe jashüte, süla a süu rhüwalie kenjü.

²¹ Puoe Jakob gei suoketa puorei ngulie mo; morei Israel gei kemezhieketuo puorei ngulie mo. Jihova uko Kepenuopfüe uko ze tuo, uko donu kielieketa kedimia puo tuoi di.

²² Uko ze Ijipt nunu kepar Kepenuopfüe; uko la nhathudo kia tuoi zo.

²³ Themoumia die Jakob petsoukecü tuo mo, Israel petsoukecü thuophi tuo mo: Jakob mu Israel dze pu di, ‘Ukepenuopfüe uko la chükeshüko mehoshücie!’

²⁴ Harie, themia doupuo Loshakrü tuoi sierzhie, tsiu loshachü mhiei puoe sieliete: Puoe puo chüte cülie kemochie zhü lhote, mu puo chüte zie krielie kemochie zhü lhote.”

²⁵ Sitse Balak-e Balaam ki, “Uko rüse rei hie morei japie uko tsü rei hiecie.”

²⁶ Derei Balaam la sie, “Jihovae a ki kepu pete a chü morosuo ücü a n ki pu mo me?”

²⁷ Süsie Balak-e Balaam ki, “Vorlie, a n ze la thechü kekrei puo nu votuo, sünunu a la n bu uko rüseketuo Kepenuopfü medolie rei si momu.”

²⁸ Sidi Balak-e Balaam ze kijükesia petsou keba Peor mezü gei kho.

²⁹ Sitse Balaam-e Balak ki, “Haki nu a la ruosuoba thenie chülie, mu a la thudo thenie mu tekuochü thenie keseshücie,” isi.

³⁰ Sitse Balak-e Balaam kepu tuoi chüshü, sidi ruosuoba puo gei thudo puo mu tekuochü puopuo idi ruosuo chüshü.