Nuolhoutsüphrü 22 - Angami Naga CL (Re-edited) Bible (BSI)

Balak-e Balaam Keliekecü

¹ Süsie Israel tuoshü, di vor Jordan lutsakhie Moab razha Jeriko nu uko razhü chülie.

² Siro Zipor nuou Balak-e Israelko Amormia gei chükeshü pete ngu.

³ Ru Moab-e themiako prei se bata, uko kra secü la; mu Moab-e Israelmiako prei bata.

⁴ Sidi Moab-e Midianmia phichüko ki, “Thudoe lie nu nha liecülieyakezha tuoi themia kro hau ukhieumhou keba pete liecülietuo,” si. Siro süteiki Zipor nuou Balak-e Moabmia kedi chü ba.

⁵ Süla puoe dieliemia ketsepie Amaw kijü nu Eufrat rü khie keba Pethor nu shü di Beor nuou Balaam kie di sie, “Harie themia kro puo Ijipt kijü nunu par, mu ukoe kijü nhyünhe tuote mu ukoe vor a rütsietsa bate.

⁶ Süla tsie vor di a la themia hako rüsewacie, ukoe a ki kuothor zocü la; sitse ae uko penyüwa di kijü nunu uko whuo petawalie vituo; kekreilamonyü a sicü noe japie tsükeshümia theja ngulieya mu rüsekewamia rüsepfütaya.”

⁷ Süla Moab nu pehüko mu Midianmia phichükoe themoumia zha chüketuoko sa se di tuoshü, sidi ukoe Balaam ki vor, di Balak dieko pie puo ki pushü.

⁸ Sitse puoe uko ki, “Tsiezhü haki baliecie, sitse Jihova a ki pukeshü tuoi, die se vor nie ki pushütuo.” Süla Moabmia kedinuoko Balaam ze bata.

⁹ Ru Ukepenuopfü Balaam ki vor di sie, “Themia n ze keba hako suomia ga?”

¹⁰ Sitse Balaam Ukepenuopfü ki, “Moabmia kediu Zipor nuou Balak-e uko ketse a ki shü di pucü:

¹¹ ‘Harie themia hakoe Ijipt nunu par, mu uko kijü nhyünhe tuote; no tsie vor di a la uko rüsewacie; siüro a uko ze terhü chü di uko whuo petawa rei si mo.’ ”

¹² Sitse Ukepenuopfü Balaam ki, “No uko ze volie lho, no themiako rüse rei lho, uko thejakepfü kro puo zocü la.”

¹³ Süla Balaam-e khiserüna sie di Balak kedinuoko ki, “Nie thuo nie kijü nu la voliecie; Jihovae a bu nieko ze vo mvüketa la.”

¹⁴ Süla Moab kedinuoko sielie di tuo Balak ki la vo di sie, “Balaam hieko ze vor mvüte,” sishü.

¹⁵ Süsie rei Balak-e kedinuo hako ki krakuo mu therhupfükuokecü kro puo ketse lashü.

¹⁶ Sitse uko Balaam ki vor di sie, “Zipor nuou Balak-e puya: ‘Mhapuorei bu no a ki kevor kedeiwa hiecie;

¹⁷ a n chü pezhapie therhupfü sekecü chüshütuo, mu no a ki kepu kehoupuorei a chüshütuo; vor di a la themia hako rüsewacie.’ ”

¹⁸ Derei Balaam-e Balak kituoko die kela di sie, “Balak-e puo thuo suna mu rakachü puo ki ketshu pie a tsütuoü zo shierei a Jihova a Kepenuopfü dieu keyielie kenjü zo, chü tsa morei chü kra reilie kenjü.

¹⁹ Jihova a ki kedipuo pu sashütie shiü a bu silieketuo la nieko tsiezhü haki batanucü a süu nie ki chaya.”

²⁰ Sitse süzhü Ukepenuopfü Balaam ki vor di puo ki, “Themiako n kietuoü vortacü sie, sie di uko ze volie; derei a n ki kepu dieko rübei no chükecü zotuo.”

²¹ Balaam-e khise sielie, puo gada gei bakhra khashülie di Moabmia kedinuoko ze di tuoshü.

Balaam, Gadau mu Teigeidielieu

²² Derei puo tuoketa la Ukepenuopfü neimo chüwa; süla Ukepenuopfü dieliemiae puo ngumvü di puo cha khapfü thata, süki puoe gada gei ba mu puo thekemia kenie puo ze tuo.

²³ Siro Jihova dielieue puo zhiecha zoupie di cha nu thakecü gadaue ngu di tuo rüdei cha khie pra di lie nu vota. Sitse Balaam-e gadau vüshü di puo shü kereipie cha nu lashü.

²⁴ Süsie rei Jihova dielieue khubelie nu cha khie lutsahatsa khapfü di cha kemere nu thata mu sozha puo bu lutsahatsa khapfü thata.

²⁵ Süla gadaue Jihova dielieu ngu di sozha vaphapfü tatatuoü kesie ki sozha geinu Balaam phi gewa; sitse puoe puo vü lashü.

²⁶ Süsie Jihova dielieu tuo rie vo di cha mereteikecü puo nu thata, sünu rürei thezatsa morei thevitsa rei valie kenjü.

²⁷ Gadau Jihova dielieu ngu tse, puoe Balaam khro ke zhüta; sitse Balaam puo nou rüpe di puo the pie gadau vüshü.

²⁸ Sitse Jihovae gadau tie khrüshü di puo bu Balaam ki, “A n gei kedipuo chükecü la no va se a vüta ga?”

²⁹ Sitse Balaam-e gadau ki, “No a kreketa la zo! A dzie nu zhiecha puo se tuocü sie, tsie chakhrie a n dukhriwatuomuü!”

³⁰ La sie gadaue Balaam ki, “Ae n gada, noe n rhei chie, vor thie ha ketso a gei ba vorkecüu mo me? Ae kinhiepuo n gei haikecü chü ga?” Sitse puoe sie, “Mo,” si.

³¹ Süsie Jihovae Balaam mhi khrüshü di puo bu Jihova dielieu dzie nu puo zhiecha zoupie ketha ngulie; sitse puoe nuketsu zerepfü zhüta.

³² Siru Jihova dielieue puo ki, “No kiüdi va se n gadau vü ga? Harie, ae n ngumvümia chü di vorzhie, kekreilamonyü n chae a therü tuotakecü la.

³³ Gadau a ngu di va se a mhodzü nunu rürei tatate. Puo a kinu rüreita motuo üro, tsieha a puo kelalie di n dukhriwatuo,” sita.

³⁴ Balaam-e sie Jihova dielieu ki, “A phoumawate, no cha khapfü thakecü a si mocü la. Süla tsie, n mhiki kekrütaü liro, a la votatuo.”

³⁵ Sitse Jihova dielieu Balaam ki, “Themiako ze volie; derei a n ki kepu dieko rübei no putuo,” si, süla Balaam-e Balak kedinuoko ze vota.

Balaam mu Balak Dze

³⁶ Süsie Balaam vorkezhü Balak-e silie tse, puo ze kesetuo üdi Arnon rie thelatho nu keba Moab nadiu nu vo.

³⁷ Sitse Balak-e Balaam ki, “A mia ketsepie n kie mo me? No kiüdi a ki vor mo ga? A n chüpie therhupfükelie chülie kenjü üte me?”

³⁸ Sitse Balaam rei Balak ki, “Harie, a tsie n ki vor ba: derei a tsie n ki mhakehoupuorei pulie kevi kekuo ba üme? Ukepenuopfü khapie a tie nu keshü dieu a pu morosuo,” sita.

³⁹ Süsie Balaam-e Balak ze vota, mu unie Kiriat-huzot nu vorlie.

⁴⁰ Siro Balak-e thudo tsiu tekuo dukhri pie ruosuo chü di puo chü ketsepie Balaam mu puo ze ketuo kedinuoko tsüshü.

⁴¹ Süsieduü Balak-e Balaam ze Baal thechü kerükrieko gei kho, sidi puoe sügeinu Israelmia kro puo ngu.