Nuolhoutsüphrü 21 - Angami Naga CL (Re-edited) Bible (BSI)

Mese Tinyhüu

¹ Süsie Negeb kijü nu bayakezha, Arad nu Kanan kediue Israelko Atharim chau ze vorkezhü silie tse, puoe Israelko ze terhü chü di uko huomia telie.

² Sitse Israelko Jihova ki rüse di sie, “No themia hako khapie hieko dzie nu shü ro, hiekoe uko nadiko peka tseiwatuo,” ita.

³ Ru Jihovae Israelko pfhe rünyülie di Kananmiako khashü, siro ukoe uko mu uko nadiko peka tseiwa, süla thechü süu za Horma üdi kieta.

⁴ Ukoe Edom kijü whi voketuo la, Hor Kijüthou nunu Kemerie Dzükezha chau ze vor, sitse themiako chala nu meyhumezhieta.

⁵ Sidi themiako Ukepenuopfü mu Mosa unie gei kenya di sie, “Hie bu rayha nunu siatuoü nnie kiüdi Ijipt kijü nunu hie ze par ga? Kekreilamonyü hanu niekhrüda rei mu dzü rei jü, tsiu hie kecüca kesuo hako cü mecüte.”

⁶ Sitse Jihovae tinyhü kerhu se khashü di süko bu themiako medu, mu Israelmia kekra siata.

⁷ Sitse themiako Mosa ki vor di sie, “Hie phoumawate, kekreilamonyü hie-e Jihova mu n ngukemvü die puwate, Jihova bu tinyhüko se lataketuo la puo ki chashücie.” Süla Mosae themiako la chashü.

⁸ Tsiu Jihovae Mosa ki, “Tinyhü kerhu puo chülie, di süu pie co puo gei pie zhalie, siro tinyhü bu u medukewa kehoupuorei süu mehokeliemia rheilietuo.”

⁹ Süla Mosae mese pie tinyhü puo chülie, di süu pie co puo gei piezhalie: mu tinyhü bu u medukewa kehoupuorei mese tinyhüu mehokelie khe rheilie.

Israelko Rüve Moab Whi Kevo

¹⁰ Süsie Israelmiako tuoshü di vo Obot nu razhü chülie.

¹¹ Süsie uko Obot nunu tuo lashü di vo Moab mhodzü niathutsa Iye-abarim rayha nu uko razhü chülie.

¹² Uko sünunu tuo la vo Zered Razhau nunu uko razhü chülie.

¹³ Uko sünunu tuo la Amormia therie nu kezhü Arnon khie lutsa nu uko razhü chü bata, kekreilamonyü Arnon-e Moab mu Amorko donu keba Moab rieukecü la.

¹⁴ Süla Jihova Terhü dze Leshüdako nu hamhie di thupie ba: “Sufa nu Waheb mu sünu razhako, tsiu Arnon razhako,

¹⁵ siro razha süko Moab rie khiera nu, pesuse Ar rüna kevatsa tsu.”

¹⁶ Tsiu uko sünunu tuo Beer dzükhou nu volie: mu dzükhou süu dze Jihovae Mosa ki, “Themiako kie kenguliecie, a dzü pie uko tsüshütuo.”

¹⁷ Sitse Israel tsali hau keli, “Rüluo sierlie, he-i, dzükhouu, süu se kelilie!

¹⁸ Krütamia hokeshü dzükhouu, kedinuoko u kedi kekuo zasi mu u theu se hokeshüu.” Süsie ukoe rayhau nunu tuo Matana nu vota.

¹⁹ Siro Matana nunu Nahaliel, Nahaliel nunu Bamot;

²⁰ tsiu Bamot nunu Moab kijü razhau nu keba mu lieva kengu Pisga mezü gei vota.

Israelko Sihon Penyükelie

²¹ Süsie Israelko dieliemia ketsepie Ammonmia kediu Sihon ki shü di sie,

²² “A bu n kijü pfüthe vocümu, hieko tuose lie morei khubelie nu volie lho, n dzükhouko puo nu rei dzü krielie lho, n rieu cie volie kemochie hie Kediu Chadiu rübei ze vo zotuo,” isi.

²³ Derei Sihon-e Israelko bu puo rie ciekevo khashü mvüta, sidi puo themiako kie kengulie, di rayha nunu Israel ze terhü chütuoü Jahaz nu vor; sidi Israel ze terhü chü.

²⁴ Sitse Israel-e zhiecha pie puo biewa, di puo kijü Arnon nunu vo Ammonmia rie nu Jabok ketso lielieta; kekreilamonyü Ammonmia rieu ya kemetei phi pie keba la.

²⁵ Sidi Israel-e nadi süko pete penyülie; sitse Israel-e Amormia nadi pete nu, Heshbon nu mu puo socüsonuoko pete nu rüna chü bata.

²⁶ Kekreilamonyü Heshbon-e Amormia kedi Sihon nadiu, thiedzü Moab kediu ze kegei di puo kijü pete Arnon ketso lielie.

²⁷ Süla geizo zokeshükoe pukecü, “Heshbon nu vorluo; süu chülie. Sihon nadiu pesieliecie.

²⁸ Kekreilamonyü Heshbon nunu mi puo par, Sihon nadiu nunu miü puo sier, Moab rüna Ar thewa, mu Arnon thechü kerükrieko pekawa.

²⁹ He-i Moab; Ce, no we chülietie! He-i, Kemosh themiako, nie we chülie mote! Puoe puo nuo thepfuko bu ta rühoutatuo, mu puo nuo thenunuoko bu miadie chütatuo, khapie Amormia kediu Sihon tsüwate.

³⁰ Süla uko nuosenuoyie pekawate, Heshbon nunu Dibon ketso; tsiu Medeba ketso hie mi pie mha pete pekaperuowate.”

³¹ Hakemhie di Israelkoe Amorko kijü nu lhouta.

³² Siro Mosae Jazer rietuo üdi mia ketseshü; sitse ukoe sünu keba rünako lielie di sünu keba Amormia whuo petawa.

Og Penyükewa

³³ Süsie uko rürei lalie di Bashan cha ze kho: sitse Bashan kediu Og-e puo themia pete ze par di, Edrei nunu uko ze kegei.

³⁴ Derei Jihovae Mosa ki, “Puo prei hiecie; ae puo mu puo themiako tsiu puo kijü pete khapie n dzie nu shüwaketa la. Noe Heshbon nu keba Amormia kediu Sihon gei chükeshü mhie puo gei rei chüshütuo.”

³⁵ Süla ukoe miapuorei lhieshü mo zo di puo mu puo nuonuoko, tsiu puo themia pete dukhriwa di puo kijü lielie.