Nuolhoutsüphrü 20 - Angami Naga CL (Re-edited) Bible (BSI)

Meriba nu Dzü Kru Kepar

¹ Süsie Israelko, kro-u pete, khrü kerieu nu Zin rayha nu vorlie, sidi themiako Kadesh nu balie. Mu Miriam-e sünunu siata di puo khruwa.

² Siro thechü sünu mechükehouu la dzü jü, süla uko Mosa mu Aron unie gei kenyatuoü vor kengulieta.

³ Sidi themiako Mosa gei panya di sie “Jihova mhodzüki nu hie siezedzürieko siaketa teiki hie bu rei siaketa we vikuotuo muü!

⁴ Hie mu hie khurinuoko bu rayha hanunu siataketuo la no kiüdi Jihova mechükehouu ze par ga?

⁵ Tsie nnie kiüdi Ijipt nunu hie ze thechü kesuo hanu vor ga? Hau telha, chiede, khube, turaü kelhou kijü mo mu dzü kejü kijüte?”

⁶ Sitse Mosa mu Aron unie mechükehouu mhodzü nunu tuo rüsuopfhekiu kicie nu vo di zerepfü zhüta, sitse Jihova zayieu pie unie pengushü.

⁷ Sidi Jihovae Mosa ki:

⁸ Ketheu selie, mu n dzürieu Aron nnie mechükehouu kie kengulie, sidi uko mhinguki nu tsiekrieu bu dzü khashünu pushülie, sitse no tsiekrieu geinu dzü se par uko tsüshülietuo, sidi no mechükehouu mu uko khurinuoko bu krielietuo.

⁹ Sitse Mosae Jihova puo ki diekhakeshü mhie di puo mhodzü nunu ketheu chü selie.

¹⁰ Süsie Mosa mu Aron unie-e mechükehouu kie kengupie tsiekrieu mhodzünu shülie, di uko ki, “Nieko mia die ze kemvüko, rünyüshücie; nie la hienie bu tsiekrieu nunu dzü se parshütuo me?”

¹¹ Sidi Mosae puo dzie chasie di puo the pie tsiekrieu vüshü kenie; sitse dzü kru phi par di mechükehouu mu uko khurinuoko bu krielie.

¹² Siru Jihovae Mosa mu Aron unie ki, “Nnie a pele mote mu Israelmiako mhingu nunu a chü kemesalie mote, süla nnie bu kehou hau ze ae kijü pie uko tsükeshüu nu lelie kenjüte,” sita.

¹³ Dzü hau, za Meriba kekreilamonyü Israelmiako Jihova ze kemeüta mu uko kinu puoe mesa ücü pekiekeshü la.

Israel bu Edom Kijü Pfüthe Vo Mvüketa

¹⁴ Mosae Kadesh nunu dieliemia ketsepie Edom kediu ki shü di, “N siezeu Israel-e puya: Noe hie mezhieko pete si ba:

¹⁵ Hie puonuoko Ijipt nu tsu; mu hie Ijipt nu lhou tuo cha phite, tsiu Ijiptmiakoe hie puonuoko mu hie pese.

¹⁶ Tsiu hie-e Jihova ki hie mezhie rükhruoshü tse puoe hie pfhe rünyülie di teigeidieliemia puo ketseshü di Ijipt nunu hie ze parshü; mu hie tsie vor n kijü tierie nu keba Kadesh nu ba.

¹⁷ Hieko bu n kijü pfüthe vocie. Hiekoe lie morei khubelie nu rei volie lho, morei dzükhou nu dzü rei krielie lho, hieko Kediu Chadi nu kevo zotuo; hieko n kijü rie cielie kemochie rürei thezatsa morei thevitsa valie lho.”

¹⁸ Derei Edom sie, “Nieko a kijü pfüthe volie kenjü, hie bu zhiecha se par di n petsouta molieketuo la.”

¹⁹ Sitse Israelmiako la sie, “Hieko Chadi nu rübei kevo zotuo; mu mhanuü a mu a khurinuo n dzü krie ro, a süu ma sushütuo, süu mhatho mo zo, hie bu hie phi pie tuo kevo khashücie.”

²⁰ Derei puo sie, “Nieko volie kenjü.” Sidi Edom-e themia kekra ze par mu kuo phi di uko petsou sieta.

²¹ Hakemhie Edom-e Israelko bu puo kijü pfüthe vo mvüta, süla Israel-e rürei puo therhieta.

Aron-e Hor Kijüthou geinu Siaketa

²² Siro Israelmia mechükehouu pete Kadesh nunu tuoshü di vor Hor Kijüthouu tsolie.

²³ Sitse Jihovae Edom kijü rie kepenuoki keba Hor Kijüthou geinu Mosa mu Aron unie ki,

²⁴ “Aron bu puo themiako ki votatuo. Ae kijü khapie Israelmiako tsükeshüu nu puo bu lelie lhocü la, kekreilamonyü nnie Meriba dzüu nunu a die ze mvüte.

²⁵ Aron mu puo nuou Eliazar unie ze Hor Kijüthou gei khorlie.

²⁶ Tsiu Aron pfheneiko rhuopie puo nuou Eliazar bu selie; mu Aron bu sünunu puo themiako ki votatuo, sidi sünunu siatatuo,” sita.

²⁷ Mosae Jihova diekhakeshü kemhie chülie, sidi themia kro-u mhingu nunu uko keze kijüthou gei kho.

²⁸ Sitse Mosae Aron pfheneiko rhuolie di pie puo nuou Eliazar bu selie; mu Aron-e kijüthou mezü geinu siata. Süsie Mosa mu Eliazar unie-e kijüthou geinu la kerta.

²⁹ Siro mechükehouu pete Aron siaketa ngulie tse, Israel kinu pete Aron la zha ser thekrü chü.