Nuolhoutsüphrü 19 - Angami Naga CL (Re-edited) Bible (BSI)

Thuünuo Kemerie se Ruosuo Kechü

¹ Süsie Jihovae Mosa mu Aron unie ki:

² Jihova diekhakeshü thezho sü hauha zo: Israelko ki pushü di uko bu thuünuo kemerie mesa tseikecü mu mhakipuorei vocie pfü chie kemo yopuo se nnie ki vorliecie.

³ Sitse nnie süu pie Eliazar zievo-u tsüshülie, sidi süyo ze razhüchü khie pra di mia puo bu puo mhodzü nunu süyo dukhrituo.

⁴ Sidi Eliazar zievo-ue puo dziekinuo pie puo zie huoyo bielie di vo rüsuopfhekiu mhodzütsa nu va thenie kegeshütuo.

⁵ Siro puo mhinguki nu thuünuo zhü, puochü mu puozie tsiu puobuo sa di theshütuo.

⁶ Siro zievo-u bu sedar sei, mu hisop nha mu pfhe kemerie salie di kelhoupie thuünuoyo thekeba metsuo nu shütuo.

⁷ Süsie zievo-u puo pfhenei menyiwa mu dzürüluwatuo; sidi zievo-u bu razhüchü nu letuo mu puo bu thevatie ketso mesa mo batatuo.

⁸ Siro thuünuo thekecüu rei puo pfhenei menyiwa mu dzürüluwatuo, sidi thevatie ketso mesa mo batatuo.

⁹ Siro kemesamia puo bu thuünuoyo migeko pfhü kengulie di se vo razhüchü khie thechü kemesa puo nu piezhüwatuo; sidi süko pie Israelko chü kemesaketuo dzüu la khapie batuo; süu kephouma valieketuo ruosuo puo zo.

¹⁰ Siro thuünuoyo migeko pfhü kengukecüu bu rei puo pfhenei menyiwatuo, sidi thevatie ketso mesa mo batuo. Hauha Israelko mu solhimia u donu lhou ketuoko la kechachie zho puo chütuo.

¹¹ Kehoupuorei kesiamo kebiemia bu zha thenie mesa mo batatuo.

¹² U bu zha se nhie mu zha thenie nhie dzü pie u chü kemesawatuo, sitse puoe mesatatuo; derei ue zha se nhie mu zha thenie nhie u chü kemesalie moro, puoü mesata ülie kenjü.

¹³ Kehoupuorei themia kesiamo bie di u thuo u chü kemesalie moro, Jihova rüsuopfhekiu perhuwate; süla Israel donunu puo kelhiwatuo; kekreilamonyü u chü kemesakecü dzüu kegepie uko gei shü mocü la ue mesalie mo; u kerhuko tsie rei u gei ba zotuo.

¹⁴ Mia puoe pfheki puo nunu siata ro thezho hakemhie tuo: Pfhekiu nu kevor pete mu pfhekiu nu keba pete zha thenie mesa motatuo.

¹⁵ Siro mhabou puo kege pie ge mo di pengopiekeba kheko mesa motatuo.

¹⁶ Kehoupuorei phouyo nu zhiecha se dukhripie kezhü kesiamo, morei kesia ru, morei mekhru bie ro, süu bu zha thenie mesa mo batuo.

¹⁷ Siro mesa moketamia la uko bu kephouma la kethe ruosuo mige huoyo selie di pie mhabou puo nu shülie, mu dzü pie süu sa reishülietuo,

¹⁸ sidi kemesamia puo bu hisop selie di dzü nu selie, sidi kegepie pfhekiu, mhabouko pete, themia sünu kebako mu kesia ru, morei zhiecha pie dukhrikewau, morei kesiamo, morei mekhru kebieu vashütuo.

¹⁹ Siro themia kemesau bu zha se nhie mu zha thenie nhie süu kegepie mesa mokebamia vashü di zha thenie nhie u chü kemesawatuo, sidi u bu u pfhenei menyiwa mu dzürüluwa di thevatie ue mesatatuo.

²⁰ Derei mia huoe mesa mota di u thuo u chü kemesalie moro, mechükehou donunu sümia kelhiwatuo, ukoe Jihova kemesachüu perhukewa la; chü kemesakecü dzüu kegepie uko va mocü la, uko mesalie mo.

²¹ Siro hauha kechachie uko la thezho puo chütuo. U chü kemesakecü dzüu kegepie mia vakecüu bu puo pfhenei menyiwatuo; mu u chü kemesakecü dzüu kebieu rei thevatie ketso mesa mo batuo.

²² Siro mesakemo-u mhakehoupuorei biekewau mesa motatuo, mu mha süu kebieu rei thevatie ketso mesa motatuo.