Nuolhoutsüphrü 18 - Angami Naga CL (Re-edited) Bible (BSI)

Zievoko mu Leviko Mhatho

¹ Jihovae Aron ki: Kemesachüu nu kekrükelieko; no mu n nuonuoko mu n puotsanuomia nyie chütuo, siro zievo kechü nyieko zowe no mu n nuonuoko tsü gei zotuo.

² Tsiu n siezedzürieko, Levi yiemia n puo seyieko bu n ze puochü di n lie chüketuo la uko ze n penuo vorliecie; derei no mu n nuoko ze n sa di dietseidiekhobou pfhekiu nu batuo.

³ Sidi uko bu n mhatho siro rüsuopfhekiu nu mhatho pete chütuo; derei no mu uko bu siata molieketuo la uko bu kemesachüu mu ruosuobau penuo volie lho.

⁴ Siro uko bu n ze di rüsuopfhekiu nu mhatho pete chütuo, mu kekreimia puorei nieko penuo vorlie lho.

⁵ Siro Israelmiako gei noupfhü bu vor sa molieketuo la, nieko kemesachüu mu ruosuobau mhathoko chüliecie.

⁶ Ae Israelmiako donunu nie siezedzürie Leviko zeliete; rüsuopfhekiu nu mhatho chüketuo la nieko la methuo pie Jihova ketsü puo zo.

⁷ Siro no mu n nuonuoko n sa di ruosuobau la mu pfhe lhapie keba bau sietsa la nieko bu zievo mhathoko menuo di chütuo. Ae zievo kechü phruopie nie tsüwate; mu kekreimia hako penuo kevormia pesiawatuo.

Zievomia Yau

⁸ Süsie Jihovae Aron ki: Ae n ki ruosuo khakeshü pete, Israelmiako chü kemesalieketa vie pete pie n pelewate, süko pie n bu n vie chüketuo la, mu n nuonuoko bu kechachie seketuo la se n tsüwate.

⁹ Mi pie thewa kemo mha kemesatho hako n vietuo, uko ruosuo pete, süsü uko lhacülhale ruosuo pete, uko kephouma ruosuo pete, uko kejo ruosuo pete, uko khapie a ketsüko n la mu n nuonuoko la mesatho zo.

¹⁰ Thechü kemesatho nunu no süu cütuo; thepfumia pete bu süu cütuo, süue nie la mesa zo.

¹¹ Hako rei n vietuo, Israelmiako methuo khakeshü piesie kegepie ruosuo kechü pete, ae pie kechachie la no mu n nuonuoko thepfu rei thenu rei tsüwate. N seyiemia mesa keba khe hako cülie vi.

¹² Ukoe tier kevithoko, khubezu kevithoko, mu chieshü keriethoko pie Jihova ketsüko pete ae pie n tsüwate.

¹³ Uko kijü nu keba puosi melie keriethoko se vor Jihova ketsüko n vietuo; n kinumia mesa keba khe süu cülie vi.

¹⁴ Israel nu chü kemesashüwaketa pete n vie zotuo.

¹⁵ Themia rei khunuo shierei puochü chükepfü pete nuorieu pie Jihova ketsü khe n vie zotuo, siürei themia nuorieu we no rha zotuo, mu mesa kemo khunuo rei no rhatuo.

¹⁶ Kemesachü shekel nu le di shekel pengou süue gera mepfü (khunuo nuonuo khrü puo phichüketako) rha morosuokecüko no rhalietuo.

¹⁷ Derei mithu nuorieu, morei tekuo nuorieu, morei temvü nuorieu no rha morei vi, süko mesa zo, no süko zie kegepie ruosuobau gei shütuo mu Jihova ki kethengu ruosuo puo la puo shuoko mi nu thepie ruosuo chütuo.

¹⁸ Piesie kegepie ruosuo kechü khouzüu rei mu puodo puo zatsatie rei n vie zotuo.

¹⁹ Mha kemesa vie, Israelmiako piesie kelopie Jihova rüsuokecü pete ae pie no mu n nuonuoko thepfu mu thenuko n sa di nieko bu kechachie nie vie chütuoü nieko tsüwate: haha n la mu n seyieko la Jihova mhodzü kechachie la dietseidiekhokelie metsie zo.

²⁰ Süsie Jihovae Aron ki, n bu uko kijü nu n rüvie puorei chülie lho, morei uko donu n ya puorei jü; Israelmiako donu ae n ya mu n rüvie zo.

²¹ Levi yiemiakoe rüsuopfhekiu nu mhathoko uko lietho chükecü la Israel nu ker-zapuo khashüyakezhau uko bu pie uko vie chütuoü ae pie uko tsüwate.

²² Siro tsie yawinu Israelmiako bu phouma di siata moketuo la uko bu rüsuopfhekiu penuo vo lho.

²³ Derei Leviko bu we rüsuopfhekiu nu mhathoko chütuo, mu uko bu uko kekrükewako toupfütuo; süue nie nuosenuoyie pete donu kechachie zho puo chütuo; mu Israelmiako donu uko rüvie chü selie lho.

²⁴ Kekreilamonyü Israelmiako ker-zapuou pie Jihova ki ruosuo kechüu uko bu se uko ya chütuo üdi ae süu se uko tsüwaketa la; süla Israelko donu uko rüvie pejütuo ükecü ae puwate.

²⁵ Süsie Jihovae Mosa ki:

²⁶ Noe Leviko ki pushülie: Nieko Israelko ki ker-zapuo nie bu nie vie chütuo üdi ae pie nie ketsüu liekecü ki, niekoe sünunu Jihova ki ker-zapuou pie ruosuo chü latuo.

²⁷ Nieko ruosuo chükeshü hau sieu nu telha mu gekelie thou mu khubedzü se ruosuo kechü mhie di letuo.

²⁸ Sükemhie di nieko Israelmiako kinu ker-zapuo ngukelieko üse ruosuo chüpie Jihova ki shütuo; mu sünunu ruosuo chüpie Jihova ketsüu pie Aron zievo-u tsütuo.

²⁹ Nie mha methuo ngukelie nu ruosuo chüpie Jihova ketsü pete, süko nunu kevithoko, sünunu chü kemesalieketako pie Jihova rüsuotuo.

³⁰ Süla no uko ki pushülie: Nieko süko nunu kevithoko se ruosuo chükewa sie, Leviko la süko sieu nunu vükelie telha mu khubedzü kege nunu gekelie khubedzü kemhie latatuo.

³¹ Nieko mu nie kinumiako thechü kehoura nu süu cülie vi, sükoe nie rüsuopfhekiu nu mhatho zhakhra zokecü la.

³² Siro nieko kevithoko se rüsuo chükewa la nie bu kephouma pieu pfü molieketuo mu nie sia molieketuo la Israelmia kemesa vieko chü perhuwa hiecie.