Nuolhoutsüphrü 17 - Angami Naga CL (Re-edited) Bible (BSI)

Aron Theu Tsükelie

¹ Jihovae Mosa ki:

² Israelko ki pushülie, u puonuo puo la kethe puopuo idi u puonuo krütako pete kethe kerekenie seliecie, sidi no mia pete the gei u za thu phreshülie.

³ Siro Aron za pie Levi the gei thushülie, puotsanuo krüta puo la kethe puopuo tuocü la.

⁴ Sidi no süko pie rüsuopfhekiu nu dietseidiekhobouu mhodzünu a nieko ze keseyakezha chü nu pie zhüliecie.

⁵ Sitse a puo kedakelieu theu tsü parlietuo; sidi a Israelko n gei kenyayakecüko bu a ki vor sa motatuo.

⁶ Mosae Israelko ki pushü tse, krütako mia puo la puopuo idi u puonuo medzi di kethe kerekenie khapie puo tsüshü mu Aron theu rei uko donu tuo.

⁷ Tsiu Mosae ketheko pie dietseidiekho pfhekiu nu Jihova mhodzünu khapie zhü.

⁸ Siro süsienhie Mosae dietseidiekhobou pfhekiu nu le tse; harie, Levi yiemia la khakeshü Aron theu tsü par di puo pou poulie di almond si keme vülie.

⁹ Sitse Mosae ketheko pete Jihova mhodzünu se par Israelmiako ki shüshü; sitse uko meho di uko thuo u the chü phrelie.

¹⁰ Sitse Jihovae Mosa ki, “Aron theu kha lapie dietseidiekhobouu mhodzünu piezhüwalie, süu bu a petsou sierkecüko la zasi puo chütuo, mu nieko bu a gei kenyasier di siata molieketuo la.”

¹¹ Mosae sükemhie di, Jihova puo ki diekhakeshüu chülie.

¹² Sitse Israelko Mosa ki, “Harie, hie siatazhie, hie katazhie, hie peteko kate.

¹³ Themia kehoupuorei Jihova rüsuokiu penuo kevor khe siatatuo üro, pete bu siatatuo me?”