Nuolhoutsüphrü 16 - Angami Naga CL (Re-edited) Bible (BSI)

Kora, Dathan, mu Abiram Uko Mosa mu Aron Unie Petsouketa

¹ Süsie Levi nuou Kohat, Kohat nuou Izhar, Izhar nuou Korae Reuben yiemia donu Eliab nuonie Dathan mu Abiram, mu Pelet nuou On rei sa,

² ukoe Israelmia kro-u donu krütamia huo themia kemeyiemia krie kenie di hiepengou kie kengulie di Mosa ngumvü sieta.

³ Ukoe kepekrolie di Mosa mu Aron unie petsouta, sidi unie ki, “Nnie keyiethorte! Mechükehou pete, mia puopuocü, mesa phre ba zo, mu Jihovae uko donu ba, süla nnie kiüdi Jihova mechükehouu ki zhakuoü bata ga?”

⁴ Mosa süu sishü tse, puo zie pesupfü bata.

⁵ Sidi puoe Kora mu puo zeko ki, “Khise Jihovae suomia puo vie; mu suomia mesa mu suomia bu puo penuo votuo shicü thashütuo; puoe kedakelieu bu puo penuo votuo.

⁶ Hau chüliecie: Kora mu n kro-u pete, nieko kethengu kethebou selie;

⁷ süko nu mi khashülie, mu sodu Jihova mhodzünu mi mhogei mha kethengu khapie baliecie; sümhie di Jihovae u kedakeliemia mesalietuo: Nie Levi nuonuoko keyiethorte.”

⁸ Süsie Mosae Kora ki, “Nie Levi nuonuoko rünyüliecie!

⁹ Nieko ze puo penuo vor di Jihova rüsuoki nu mhatho chüketuo la, Israelmiako donu, Israel Kepenuopfü nie kelakreikelie, nie süu üse mhakecü puo thenyüsieya me?

¹⁰ No mu Levi nuonuo n siezedzürieko pete ze puo penuo vor mo me? siro nie zievo rei chü sa nyüya me?

¹¹ Süla no mu n kro-u pete Jihova ngumvü di kenguba me? Siro niekoe Aron gei kenya keba hau kedipuo ga?”

¹² Süsie Mosa mia ketseshü di Eliab nuonie Dathan mu Abiram kie ru, unie kenienie sie, “Hienie khorlie lho.

¹³ No rayha nunu hie dukhriwatuo üdi mithunudzü mu mepfhidzü krukezhü kijü nunu hie ze ta parkecü haha mha kecü puo üme? Sidi no n thuo n üse hie mho dituo ütuo me?

¹⁴ Sizomonyü no hie ze vo mithunudzü mu mepfhidzü krukezhü kijü nu shüshü lho, morei kiülie mu khubelie rei pie hie tsülie kenjükecü ngu mesate. No themia hako mhi kerülawa tuo me? Hienie khor lho,” sita.

¹⁵ Sitse Mosa puo nei mo se di Jihova ki, “No uko ruosuo lie hiecie, a uko kinu gada puo rei lielie mo, morei uko miapuorei pechü mo zo.”

¹⁶ Sidi Mosae Kora ki, “Sodu no mu n kro-u pete Aron ze di Jihova mhodzünu vorcie.

¹⁷ Siro kehoupuorei kethengu khouu se phrelie di kethengu pie sünu shülie, sidi Jihova mhodzü kethengu kethekhouu krie kenie di hiepengou se vorcie. No rei Aron rei kethengu kethebouu se phrelie.”

¹⁸ Sitse uko u thuo u vie kethengu kethekhou se phrelie di mi pie süko nu shülie di sümhogei kethengu khapie zhülie, di Mosa mu Aron unie ze rüsuopfhekiu kicie nu thalie.

¹⁹ Korae mechükehou pete ze vor uko petsou di rüsuopfhekiu kicie nu uko mhodzü thalie, sitse Jihova zapuzayieu pie mechükehouu pete pengushü.

²⁰ Süsie Jihovae Mosa mu Aron unie ki:

²¹ Mechükehouu hau kinu nie thuo nie kerei kreiliecie, dopuo nu a uko pejüwatuomu.

²² Sitse unie unie zie pesupfü di sie, “He-i Kepenuopfü, themia puo ruopfü kenyi pete Kepenuopfü, mia puo kephouma la no mechükehouu pete gei n nei motatuo me?”

²³ Sitse Jihovae Mosa ki:

²⁴ Mechükehouu ki pushücie: Nieko Kora, Dathan mu Abiram uko nuoko lhou kebachü therhietacie.

²⁵ Sitse Mosa sie di tuo Dathan mu Abiram unie ki vo mu Israel phichüko puo siemedzi vo.

²⁶ Sidi puoe themia kro-u ki, “A nie ki chaya, themia kerüzhü hako pfheki nunu tuotacie, mu uvie puorei nyü hie, u kephoumako bu nie zoupfüta rei si lhomu.”

²⁷ Süla uko Kora, Dathan mu Abiram uko kebachü therhieta; sitse Dathan mu Abiram unie unie nupfünuo, unie nuonuoko siro unie nuonuo kecükoyo ze di par unie pfheki kicie nu thalie.

²⁸ Sitse Mosa sie, “Mha hako chütuo üdi Jihova a ketsekeshü nieko silietuo, a thuo a medo nunu mokecü la.

²⁹ Themia hako lhenu zho tuoi siakecü sie, morei mia pete gei voryakezha tuoi uko gei vorkecü sie, Jihova a ketseshü mo.

³⁰ Derei Jihova mha kesa puo chüshü di kijüu bu puo me mekuopie uko mu uko vie peteko mezulie, sidi uko bu perhei Sheol nu keta ro, sitse nieko themia hako Jihova thepesuowa ücü lelietuo.”

³¹ Süsie Mosae die hako pu theshü mumetha uko ketha khro kijü rükota;

³² sidi kijüue puo me mekuoshü di uko kinuko mu Kora themiako siro uko vienyako pete mezulie.

³³ Sükemhie di uko mu uko vieko pete perhei Sheol nu keta; sidi kijü bu uko luopfülie di mechükehouu donunu uko pejüwa.

³⁴ Sitse Israelmia uko houpfü kethako uko melie ruorüikecü si di tata, kekreilamonyü ukoe sie, “Kijüue u rei mezulie rei si lhomu.”

³⁵ Siro Jihova kinu mi par di kethengu thepie ruosuo chükecü mia krie kenie di hiepengouko thekhriwa.

³⁶ Süsie Jihovae Mosa ki:

³⁷ Aron zievo-u nuo Eliazar ki pushücie; sidi puo bu kethekhouko mi tu kebachü nunu chülie di se vo kepecie nunu lawacie; kekreilamonyü sükoe mesa zo.

³⁸ Kephouma themia hako siakeshü nunu kethekhouko mesaketa la. Süko ketsapie ruosuobau kege chüliecie; uko süko pie Jihova rüsuowatakecü la, süko mesa zo, mu sükoe Israelmiako la zasi puo chütatuo.

³⁹ Süla Eliazar zievo-ue mi bu u thekhriwaketako ruosuo chükeshü mese kethekhouko ketsapie ruosuobau kege chülie,

⁴⁰ süusü Jihovae Mosa ki pukeshü tuoi, Aron yie kemo rüsomia puo bu rei Jihova mhodzünu vor di kethengu thepie ruosuo chü di Kora mu puo kro-u mhieta moketuo Israelmiako bu rükra tuolieketuo la süu chülie.

⁴¹ Derei süsienhie Israelmiako mechükehouu pete Mosa mu Aron unie gei panya di, “Nnie mechükehouu dukhriwate.”

⁴² Siro mechükehouu Mosa mu Aron unie ngumvü di kehou keba ki, unie rürei rüsuopfhekiu tsatie vashü, ru harie, kimhoue vor süu zepfü bata, mu Jihova zapuzayieu pengushü.

⁴³ Tsiu Mosa mu Aron unie rüsuopfhekiu mhodzütsa vor,

⁴⁴ sitse Jihovae Mosa ki,

⁴⁵ “A bu uko pekapemhe mhaiwaketuo la mechükehou hau donunu tuotaliecie.”

⁴⁶ Sitse Mosae Aron ki, “N kethebouu selie di ruosuobau nunu mi liepie sünu shülie di sügei kethengu khashü di se mhai themia kro-u ki voliecie, sidi uko la ruotho chüwacie; Jihova noupfhü parte; mu thesau sierte,” sita.

⁴⁷ Mosa pukeshü mhie mu Aron-e puo kethekhou selie di ta kehou donu vo; süki harie, themiako donu thesa sierbata; süla puoe mha kethengu khashü di themiako phou mesaketuo la ruosuo chüshü.

⁴⁸ Sidi puo kesiako mu kerheiko donu thalie di thesau khawa.

⁴⁹ Kora nyie nu siaketako zo kemo thesa hau nunu zocü mia nyie keredia di krie thenie siata.

⁵⁰ Thesau khakewa sie Aron-e rüsuopfhekiu kicie nu Mosa ki la vorta.