Nuolhoutsüphrü 15 - Angami Naga CL (Re-edited) Bible (BSI)

Ruosuo Kekreikreicüko

¹ Jihovae Mosa ki:

² Israelko ki pushülie: Nieko bu lhoutuo üdi a pie nie ketsü kijüu nu vokelie ki,

³ mithu morei temvü morei tekuokro nunu mi morei kethe ruosuo morei ruosuo khapie Jihova tsükecü ki, nie rüse puo la morei nie kenei la khakeshü morei thenyi ki puore kethengu chüpie Jihova tsüketuo la,

⁴ siro kehoupuorei ruosuo chüpie Jihova ketsüu bu thou kevitho efa ker-zapuo, pie tier hin ker-zapuo pie kereikecü;

⁵ mu kekrie ruosuo la, khubedzü hin dia-zapuo, kethe ruosuo morei tekuonuo pie ruosuo chüketuoko puo thetse no kesetuo.

⁶ Siro tekuochü puo la thou kevitho efa ker-zakenie mu tier hin puo se-zapuo kesa kerei di kesepie balie.

⁷ Tsiu kekrie ruosuo la khubedzü hin puo se-zapuo pie Jihova mhodzünu kethengu ruosuo chütuo.

⁸ Siro no thudo pie kethe ruosuo, morei rüse puo la ruosuo kechü, morei kezekevi ruosuo khapie Jihova ketsü ki,

⁹ puo bu puo thudo mu thou kevitho efa ker-zase pie tier hin puotie sa kereipie lhacülhale ruosuo chütuo.

¹⁰ Mu no khubezu hin puotie pie kekrie ruosuo la mi nu the di kethengu ruosuo chüpie Jihova ki shütuo.

¹¹ Süsie thudo morei tekuochü puopuo la, morei tekuonuochü morei temvünuo puopuo la, hakemhie chütuo.

¹² Nieko khurinuo kidepuo pie ruosuo chütuoü ba shiü khurinuo puopuo la hakemhie chütuo.

¹³ Mi nu thepie Jihova ki puore kethengu ruosuo chükecü nu khenu kelhoumia pete bu hamhie di hako chütuo.

¹⁴ Siro solhimia vor nieko ze lhouketuomia puoe morei phou pete nu nie donu lhouketuomia puoe Jihova ki mi nu thepie puore kethengu ruosuo chütuo üro, puo bu rei nieko chüyakezha kemhie chü zotuo.

¹⁵ Kehouu nu zowe nieko mu solhimia nieko ze lhouketuomia la rei thezho puo zotuo, phou pete nu mu kechachie zho puo, phou pete nu chazoumia rei Jihova mhodzünu nieko mhie zo.

¹⁶ Nieko mu solhimia la rei nie ze lhouketuomia la rei thezho puo mu pethokeshüzho puo zotuo.

¹⁷ Jihovae Mosa ki:

¹⁸ Israelko ki pushücie: Ae nieko ze vokeshü kijüu nu volie tse,

¹⁹ mu nie kijü süu niekhrüda kecü ki, nie ruosuo chüpie Jihova tsütuo.

²⁰ Nieko thou nelie kerietho-u da puo pie ruosuo chütuo, sieu nunu se vor ruosuo kechü tuoi di nie süu khashütuo.

²¹ Nieko phou pete nu thou nelie kerietho-u se ruosuo chüpie Jihova tsütsütuo.

²² Derei nie Jihovae Mosa ki pukeshü diekhakeshü hako zelie mota ro, kekrüta zo.

²³ Jihovae diekhakeshü nhie phou peteko nu Mosa ki diekhakeshüko pete,

²⁴ kehou bu si mo di kekrüwa ro, kehou pete bu thudonuo puo pie kethengu ruosuo la mi nu thepie kethe ruosuo chüpie Jihova rüsuotuo, mu thezho medzi di lhacülhale ruosuo mu kekrie ruosuo chütuo, tsiu mvüdo puo pie kephouma ruosuo chütuo.

²⁵ Siro zievo-ue Israelko mechükehou pete la ruosuo chütuo, sitse uko kejo vashütuo; kekreilamonyü uko le mo di kekrükewako, mu phoumaketako la rei, ruosuo se vor di Jihova mhodzünu mi nu thepie kethe ruosuo chükewa la.

²⁶ Sidi Israelmia mechükehou pete kejo vashüwatuo mu solhimia uko donu lhouketuomia rei zotuo; kekreilamonyü themia peteko rei si mo di chükewa la.

²⁷ Mia puoe si mo di phoumawa ro, puo bu temvü puoü cie puoketa yopuo pie kephouma ruotho chütuo.

²⁸ Sidi zievo-u bu mia puoe si mo di kekrükelie geinu phoumaketau la Jihova mhodzü ruosuo chütuo, sitse puo kejo vawatuo.

²⁹ Israelko donu khenu kelhoumia shierei morei chazoumia nie donu lhouketuomia shierei si mo di kekrükewa la thezho puo zotuo.

³⁰ Derei khenu kelhoumia shierei morei solhimia shierei si tou di kejo kechüu we mhotsou Jihova rhu mowate; süla themia süu puo themia donunu puo kelhiwatuo.

³¹ Kekreilamonyü themia süu Jihova die rünyü mo di puo diekhakeshüko varhuokewa la, themia süu kha tseiwa zotuo, puo bu puo mhatho kesuo zhakhra ngu tou zotuo.

Sabat Kevarhuo Siazha

³² Israelko rayha nu ketuo ki, ukoe mia puo sabat nhie sei pa kengutuo di ngulie.

³³ Sitse ukoe sei pa kenguketuou ze Mosa mu Aron tsiu mechükehouu pete mhodzünu vor.

³⁴ Sidi puo khapie bawa; puo gei kedipuo chütuo shi rhülie mokecü la.

³⁵ Sitse Jihovae Mosa ki, “Themiau pesiawalie; razhüchüu chazoutsa nu thehouu pete bu ketsie pie puo vawatuo.”

³⁶ Sitse Jihovae Mosa ki diekhakeshü tuoi, mechükehou pete puo ze razhüchü chazou pra di ketsie pie puo vakhriwa.

Pfheneiko gei Pfhephrie Chülienukecü

³⁷ Jihovae Mosa ki:

³⁸ Israelko ki pushülie, uko bu uko pfhenei keko nu pfhephrie chülie di u pfhephrie puo keko nu lophrie keloshü pie khelienushülie, thephou pete nu hakemhie chütuo.

³⁹ Nie bu nie nou mu nie mhinguki menguko medzi di rügerüzhüta molieketuo la, nie pfhephrie ngu di Jihova diekhakeshüko rükralie mu chüüzelieketuo la.

⁴⁰ Süla nieko bu a diekhakeshü peteko rükralie mu nie bu Kepenuopfü kitsa mesa balieketuo la.

⁴¹ Ae Jihova nie Kepenuopfü chütuo üdi Ijipt kijü nunu nieko ze parkeshüu: Ae Jihova nie Kepenuopfü zo.