Nuolhoutsüphrü 14 - Angami Naga CL (Re-edited) Bible (BSI)

Israelko Jihova Petsou Sieketa

¹ Sitse mechükehouu pete melie shiekhouita, sidi süzhü themiako krata.

² Siro Israelmiako pete Mosa mu Aron unie gei kenyata; sidi mechükehouu pete unie ki, “Hie Ijipt kijü nunu siaketa! morei hie rayha hanunu siaketa we hie neikuotatuomu ru!

³ Kedipuo la Jihova hie ze vor di kijü hanunu hie bu zhiecha se chütieya mu? Hie nupfünuo mu hie nuonuoko mia bu telietie, hie bu la Ijipt nu voketa we hie la vikuo motuo me?”

⁴ Sidi ukoe huoniehuo ki, “Úko krüta puo pfhülie di la Ijipt nu vota khe,” sita.

⁵ Süla Mosa mu Aron unie-e Israelmia mechükehou pete mhodzünu unie zie pesupie thata.

⁶ Sitse vo kijü riekecüko donu Nun nuou Joshua mu Jefune nuou Kaleb, unie-e unie pfhe cierhata

⁷ di sie, Israelmia mechü pete ki, “Hie vo kijü riekecüu kijü kevi se puo zo.

⁸ Jihova u ngu puo nei liro, puoe u ze vo mithunudzü mu mepfhidzü krukezhü kijü hanu shüshütuo.

⁹ Jihova ngumvü di puo petsouta moliecie; morei kijü hau nu themiako preipie hiecie; themia sükoe u la niekhrüda zo; uko khrümvü uko ze tuo mote, mu Jihova úko ze tuokecü la, uko preipie hiecie,” sishü.

¹⁰ Derei themia kro-u pete ketsie pie unie vatuo üta, sitse Jihova puo zayieu pie rüsuopfhekiu nunu Israelmiako pete pekieshü.

¹¹ Süsie Jihovae Mosa ki, “Themia hako kedithechie a rütserücie tuotuo shi? Mu a uko donunu zasi neiü chüshü zorei uko kedithechie a pele mo tuotuo shi?

¹² A thesa se vor uko peka pejüwatuo mu uko kayie pejüwatuo, sidi a n chüpie uko ki kuokuo mu zhakuokecü seyie puo chüwatuo.”

Mosa Themiako la Kecha Kechü

¹³ Derei Mosae Jihova ki, “Sikecü sie Ijiptmia süu sitie; noe uko donunu n kekuo pie themia hako ze parketa la,

¹⁴ mu ukoe kijü hau nu lhou kebako ki pushütie, no Jihova themiako hako donu bakecü ukoe site; harie Jihova, mia bu mhotsou n nguwate, mu n kimhou bu uko mhogei zhate, siro no khinhie gei ro kimhou nu mu theva gei ro mi nu idi uko mhodzü tuoyakezha la.

¹⁵ Süla no tsie mia puo kedukhri mhie di themia hako dukhriwa ro, n za kemeyie kesi themiakoe pu di,

¹⁶ ‘Jihova themia hako ze vo puo kijü pie uko tsütuo üdi rüsekeshü tsolie kenjüketa la, puoe rayha nunu uko dukhriwa shie,’ itie.

¹⁷ Süla a tsie n ki a mezhiemeloya, no phrakeshü mhiei Jihova kekuo bu zha philiecie, sidi sie,

¹⁸ “ ‘Jihovae puo nei mo rhütaya mo, mu puo kekhrie zhathor, mha kesuo kechü tsiu thezho kevarhuo rei vashüya, derei puoe kejo kechüu bu jo mo tsei zotuoya mo, puo puo kesuo kechü zhakhra khapie puo nuonuo phou se phou dia gei rei shüya.’

¹⁹ A n ki chaya, noe Ijipt nunu vor tsie ketso themia hako kejo vashü uko tsü kevor mhiei n kekhrie ngukemezhie kezha ze di tsieu va rei themia hako kejo vashü thienyü.”

²⁰ Süsie Jihovae sie, “N die mhie di a uko kejo vashüte ho;

²¹ derei a rheituoya kethocü mhie, Jihova zayieu bu kijü pete tshulietuo.

²² Kekreilamonyü themia hako a zayieu ngu mu Ijipt nu siro rayha nu a zasiko ngu zo ürei va ker a medophitazhie mu a die rünyü mvüte;

²³ süla a pie uko tsütuo üdi u puonuoko ki rüsepie kezhü kijüu uko bu ngulie lho, kehoupuorei a rütseyakezhau süu ngulie kenjü.

²⁴ Derei a kituou Kaleb-e ruopfü kekrei puo ze tuo mu puoe a siemedzi toukelie la, a puo ze vo puo vokecü kijüu nu shüshütuo; mu puose puoyie bu süu pie u vie chütuo.

²⁵ Tsie Amalekko mu Kananko razhau nu lhou baya, sodu nieko Kemerie Dzükezha cha ze di rayha nu voliecie.”

Kijüu Penyülie Lhoketa

²⁶ Süsie Jihova Mosa mu Aron unie ki:

²⁷ Zha kitsuo themia kesuo kro hako a gei panyapara tuotuo shi? Israelko a petsou di a gei panyaketuo a siliete.

²⁸ Uko ki pushücie, Jihovae puya, “A rhei ketuo mhie mu nieko a nyie nu pukeshü mhie, a chüpie nieko gei shü zotuo;

²⁹ nieko a gei kenyakecüko, u kelhouzha cie mepfü mu sümhoko, nieko kephrü nu phrükelieko pete kesiamo rayha hanunu khruwatuo,

³⁰ Jefune nuou Kaleb, Nun nuou Joshua unie rübei sie a nieko bu rüna chütuo üdi rüsepie kezhüu nu volie lho zo.

³¹ Derei nie nuonuo kecüko, niekoe mia bu uko telietuo üdi kepuko a uko ze vo nie meliekewa kijüu nu shüshü zotuo mu kijü süu ngulietuo.

³² Derei nieko la we, nieko kesiamoko rayha hanunu khruwatuo.

³³ Tsiu nieko kesiamoko cieürieta kemochie, nie nuonuoko bu nie pieüpiera pie toupfü di cie hiedia rayha nu rühou tuotuo.

³⁴ Nieko zha hiedia kijüu rie tuokecü mhie di khunhie puo la cie puopuokecü le di nie bu cie hiedia nie kesuo kechü zhakhra toupfütuo, sidi nieko bu a nei mo baketa silietuo.”

³⁵ A Jihova, haha pushüte, a petsou keba themia kesuo kro-u gei ae haha chüshü petuo zotuo. Uko bu rayha nunu katatuo mu uko bu hanunu siatatuo.

³⁶ Süsie kijü rietuo üdi Mosa themia ketsekeshüko rünau dze die kesuo se vor pushü di themia kro-u pete bu puo gei kenyaketako;

³⁷ rünau dze kesuo se vorkeshüko, Jihova mhodzünu thesa kesuo ngulie di siata.

³⁸ Derei vo kijüu riekecüko donu Nun nuou Joshua mu Jefune nuou Kaleb unie rübei rhei keba zo.

³⁹ Süsie Mosa die hako pie Israelko pete ki pushü ru, themiako u nousuo phita.

⁴⁰ Siro ukoe khiserüna sielie, di kijükhru kerükrieko gei kholie di, “Hie Jihova phrakeshü thechüu gei kho; hie phoumawaketa la,” si.

⁴¹ Derei Mosa sie, “Mha hau chü khrielie kenjü zo, nieko kiüdi Jihova diekhakeshüu varhuoya ga?

⁴² Kho hiecie, Jihova nie ze tuo motacü la, ngumvümia mhodzü nunu nieko biekhrü pie zhüwakecü chü hiecie.

⁴³ Kekreilamonyü Amalekmia mu Kananmia nie mhodzünu ba, siro nie zhiecha se chütuo: niekoe Jihova kinu rüreiketa la, Jihova nieko ze tuolie lhote.”

⁴⁴ Sirei uko kijükhru kerükrieko gei khota, sirei Jihova dietseidiekhobouu mu Mosa we razhüchüu nunu tuota mo ba zo.

⁴⁵ Sitse kijükhru gei lhou keba Amalekko mu Kananko ker di Horma ketso uko whuo zo vo di uko penyüwa.