Nuolhoutsüphrü 13 - Angami Naga CL (Re-edited) Bible (BSI)

Kanan Kijü Rietuo üdi Themia Ketsekeshü

¹ Jihovae Mosa ki,

² “A kijü khapie Israelko tsüketuo, Kanan kijüu rieketuo la, uko puonuo pete donu krüta puopuokecü ketseshücie,” sita.

³ Süla Jihova diekhakeshü ze di, Mosae Paran rayha nunu uko ketseshü, uko pete rei Israelmiako donu krütamia phre.

⁴ Siro uko za hako: Reuben yie nunu, Zakur nuou Shamua;

⁵ Simeon yie nunu, Hori nuou Shafat;

⁶ Juda yie nunu, Jefune nuou Kaleb,

⁷ Isakar yie nunu, Josef nuou Igal;

⁸ Efraim yie nunu, Nun nuou Hoshea,

⁹ Benjamin yie nunu, Rafu nuou Palti.

¹⁰ Zebulun yie nunu, Sodi nuou Gadiel;

¹¹ Josef yie (morei Manasseh yiemia rei üyakezhau), Susi nuou Gadi.

¹² Dan yie nunu, Gemali nuou Amiel.

¹³ Asher yie nunu, Mikael nuou Sethur.

¹⁴ Naftali yie nunu Vofsi nuou Nahbi.

¹⁵ Gad yie nunu, Maki nuou Geuel.

¹⁶ Mosae kijü rietuo üdi themia ketsekeshü hakoha. Siro Mosae Nun nuou Hoshea za tho kedipie Joshua chü.

¹⁷ Kanan kijü rietuo üdi Mosa uko ketsekeshü ki, puo uko ki, “Nieko tuo Negeb tsatie volie, di tuose kijüthou rünatsa khocie,

¹⁸ sidi kijü kedipuo mhie shi, morei themia lhou kebako metei mo thachü ba shicü, morei ukoe tsa mo kra shi,

¹⁹ mu uko lhou keba kijüu vi mo mo shi tsiu uko lhou keba nadiko puo dahou chü mo mo shikecü;

²⁰ siro mha lhou kevi kijü mo mo shi, morei sünu sei nyi mo mo shikecü mehoshücie. Thepfulie, sidi kijü sünu nhasi huo rie se vorcie,” sishü. Sükisü khubesi me kerieu tei.

²¹ Sükemhie di ukoe tuo Zin rayha nunu Lebo-hamat khieki keba Rehob ketso kijüko rieshü.

²² Ukoe Negeb nunu tuo Hebron nu vorlie; mu sünu Anak yiemiako Ahiman, Sheshai mu Talmaiko lhou ba. (Ijipt nu Zoan chükelie mhodzü cie thenie ki Hebron chülie.)

²³ Sidi ukoe Eshkol Razha nu vor, di sünunu khubesi phro puo biepie sei puo gei goulie di mia kenie bu pie vor; ukoe turaü si mu chiedesi huo rei se vor.

²⁴ Thechü süu za thopie Eshkol Razha chüta, kekreilamonyü Israelkoe sünunu khube phro puo biekelie la.

²⁵ Ukoe kijüu rieshü mu zha hiedia tuo di la vorta.

²⁶ Sidi ukoe Paran rayha, Kadesh nu Mosa mu Aron tsiu Israelmiako kro-u pete ki vor, sidi uko dze pie unie mu themia kro-u pete ki pushü, mu kijü sünu nhasi pie uko pekieshü.

²⁷ Sidi ukoe puo ki, “Hiekoe no hieko ketsekeshü kijü nu vowe; kijü sünu mithunudzü mu mepfhidzü krukezhü ketho zo; mu haha sünu nhasiwe.

²⁸ Derei kijü sünu lhou kebako we kuo mu uko nadiko kuda chüpie houpfü ba mu zha rei sese, sümho rei Anak nuosenuoyieko rei sünu keba hie nguwe.

²⁹ Negeb kijütsa Amalekmia lhou ba; mu kijüthou rünako nu Hitmia, Jebusmia mu Ammonmia lhou ba; siro dzükezha khie mu Jordan rü merhieko nu Kananmia lhou ba.”

³⁰ Derei Kaleb we Mosa mhodzü nunu themiako chü kethepfu di, “Mhai vo süu lielie khe, kekreilamonyü we kuolie vi tou zo,” si.

³¹ Derei themia puo ze kevoko we puo ki, “Úko themia hako petsou di kho rei krei mo; uko u ki kuokuokecü la,” si.

³² Sidi ukoe vo riekeshü kijüu dze kesuo se vor Israelmiako ki pu di sie, “Hieko vo riekecü kijüu puo nu lhou kebako tecülieyakezha kijü puo zo; mu hie ngucü sünu keba themiako zha sese phre.

³³ Siro hie sünu Nefilim (Anakmiakoe Nefilim geinu lhou vor), rei ngu; tsiu uko khieki u thuo u ngupie ku kemhie mu we rei uko mhiki si batuo.”