Nuolhoutsüphrü 12 - Angami Naga CL (Re-edited) Bible (BSI)

Miriam mu Aron-e Mosa Pejoketa

¹ Uko Hazerot nu keba ki, Miriam mu Aron-e Kushipfü la Mosa petsoukecü die puta (kekreilamonyü Mosae Kushipfü lielie kethocü la);

² sidi unie sie, “Jihovae Mosa ki rübei mha puyakezha zo me? Puoe hie ki rei sa pushü mo me?” siru Jihova süu silie.

³ Tsiu Mosae mene sekecü puo, kijü nu themia pete ki rei menekuo.

⁴ Sitse Jihovae rükri sie Mosa, Aron mu Miriam ki pu di sie, “Nieko mia seko, par di rüsuopfhekiu nu voliecie.” Sitse uko seko parlie.

⁵ Ru Jihova kimhou co puo nunu ker di rüsuopfhekiu kicie nu thalie, di Aron mu Miriam unie kie, sitse unie tuo parlie.

⁶ Sitse puoe sie, “A dieko rünyüliecie, nieko donu siedzekesimia bakecü ki, A Jihova thuo ziemho nu a pie uko pesipengushü, morei uko mhogei nu a uko ze kerüchü.

⁷ A kituou Mosa ki we si mo, a kiu pete pie puo peseshü.

⁸ Puo zowe a mhotsou, mecümecie di puo rüchüya, dievi nunu ya mo; sidi puoe Jihova rhiu nguya. Süla nnie kiüdi a kituou Mosa ngukemvü die pu michieya mo ga?”

⁹ Sidi Jihovae unie gei puo nei kemo tuta, di puoe tuota.

¹⁰ Siro kimhou rei pfhekiu geinu rülheta, sitse harie, Miriam sü mpa chüpie pekrie kemhie krapouita; sidi Aron-e mehoshü ru harie, süpfü mpa chüketa ngulie.

¹¹ Sitse Aron-e Mosa ki, “Harie, a niepuu, kephouma pieu pie hienie tsü gei shü hienu di n ki chayawe, kekreilamonyü hienie mhasi kemo mhatho chüwa di phoumawate.

¹² Puo zuo va nunu kepar ki, puo chü tietsa suo di penuokelie kemhieta hienu di ae chayawe.”

¹³ Sitse Mosae Jihova ki shie di sie, “He-i Kepenuopfü, puo chü pevishünu di ae n ki chaya,” si.

¹⁴ Derei Jihovae Mosa ki, “Mhanuü puo puoe mhitsiepie puo zie gei vashü ro, puoe zha thenie menga bata motuo me? Süla zha thenie razhüchüu chazoutsa nu puo khapie bacie, sidi süsie nu puo ze la lerliecie,” sita.

¹⁵ Süla zha thenie Miriam khapie razhüchü chazou ba di Miriam ze la ler kemochie themiako tuoshü mo bata.

¹⁶ Süsie nu themiako Hazerot nunu tuoshü di vo Paran rayha nu uko razhü chülie.