Nuolhoutsüphrü 11 - Angami Naga CL (Re-edited) Bible (BSI)

Israelko Panyaketa

¹ Siro themiako panyapara di die kesuo pupie Jihova nyie nu shü mu Jihovae süu si tse puo nou tu sieta. Sidi Jihova mi-e uko donunu tu sierta, di razhüchüu kithotsa huo thewa.

² Sitse themiako Mosa ki rükhruoshü; mu Mosae Jihova ki chashü tse miu mheta.

³ Süla thechü süu za üse Tabera üta, Jihova miu uko donu tuketa la.

⁴ Siro uko donu miahoumiaruomiakoe mha mehou seta, mu Israelmiako rei kra di sie, “Supuonie themuo khapie u tsütuo ga?

⁵ Hie Ijipt kijü nu khuo puoma chü mo di cükecüko, tsütuoko, banyieko, sülanyüko, themera mu chümerieko rükra baya zo;

⁶ derei tsie we hie kekuo sote, manna sie mha kekrei puorei ngu mote,” sita.

⁷ Manna sü coriander si tuoi mu puorhi ngupie delium mhie.

⁸ Themiako vo pa se vor di kegenya nunu getshielie morei ciekhe nunu thusalie di li nu bepie niekhrüda rie cüya, mu puo kelhe tier sa di riekecü mhielieya.

⁹ Uko razhüchü nu thevagei thezei krükeshü ki manna thezei mhogei tetsu zhüya.

¹⁰ Mosae themiako u thuo u pfheki kicie nunu idi kikha pete nu kra keba silie; süla Jihova nou vakerüpe sewa, mu Mosae puo nei mota.

¹¹ Sitse Mosae sie Jihova ki, “No kiüdi n kituou bu kemezhie hita mu? Siro kiüdi ae n mhodzünu n khriepfülie mota di themia hako pete pie pie a gei shüta ga?

¹² A themia hako pete meziepfüliete memu? A uko penuoshü memu? Di no a ki, ‘Nuo kenunuoyo toupfüyakezha tuoi di a bu uko pie a merü nu toupfü,’ noe kijü khapie uko tsütuo üdi u puonuoko ki rüsekeshüu nu votuo nyü?

¹³ Themia hako pete tsüketuo la a kirapuo nu themuo ngu kekralie ta? Kekreilamonyü ukoe hie bu cüketuo la, ‘Themuo khashü hie tsücie’ idi a ki kra ba zote.

¹⁴ A a rübei di themia hako pete la thepieu pfülie kenjüte, thepie a la mesithorketa la.

¹⁵ No a gei hakemhie chütuo üro a bu a hieshiehieruo dzü sa molieketuo la; a n mhinguki n khriepfü üro, vapuochü a dukhriwacie.”

Phichümia Hiethenie Kedakelie

¹⁶ Sitse Jihovae Mosa ki, “N kesi nu Israelmiako mhokezha chüyakezha phichümia hiethenie pfhüliecie, sidi uko ze vor rüsuopfhekiu kicie nu n ze thaliecie.

¹⁷ Sitse ae sünu ker di n ze kerüchütuo; sidi a ruopfü n gei keba huo chüpie uko gei shütuo; sitse ukoe n ze di themiako pieu kezapfülietuo, sidi n bu n rübei pfü molietuo.

¹⁸ Siro themiako ki pushülie: Sodu la nie chü kemesawalie, mu nieko themuo cütuo; kekreilamonyü niekoe Jihova kesi kinu sie, ‘Úko cüketuo themuo ba ücüwe’ isita mu ‘Ijipt nu baketawe vikuotuomu ru’ iketa la. Süla Jihovae themuo kha nie tsü di nie bu cütuo üya.

¹⁹ Nieko bu khunhie, morei zha kenie, morei zha pengou, morei zha ker, morei zha mepfü zo monyü;

²⁰ nieko nyhüki nunu par mu nieko bu ngucü mecü zota kemochie thekhrü pete cütuo: Nie-e nie donu keba Jihova khawa mu ‘Hie bu kiüdi Ijipt nunu parte shi’ idi puo mhodzünu kratacü la.”

²¹ Sitse Mosae sie, “Pephi ketuo themia lakh sorou a ze tuo; mu noe sie, ‘Uko bu thekhrü pete cüketuo la a themuo khashü tuo’ isi.

²² Mu kirikroko bieshü ro uko kelhuo chülietuo me? Uko bu tecüketuo dzükezha nu khuo uko kelhuo tuo me?”

²³ Sitse Jihovae Mosa ki, “Jihova kekuo puo thela nyi me? A dieko n mhodzünu chü ketho vortuo mo mo shiü no tsie ngutuo.”

Phichüko Siedzedie Puketa

²⁴ Süsie Mosae chazou pra di Jihova dieko pie themiako ki pushü. Siro puoe themiako donunu phichümia hiethenie pfhü ze vor di uko bu pfhekiu houpfü balie.

²⁵ Süsie Jihova kimhouu nunu ker di puo ze kerüchü, mu ruopfü puo gei keba huo chüpie phichümia hiethenieko gei shüshü; mu ruopfüe süko gei volie tse ukoe siedzedie puta. Derei süsie ukoe sükemhie pu sa mota.

²⁶ Mia kenie razhüchü nu bata, unie mia puo za Eldad mu kekreiu za Medad, tsiu ruopfüu unie gei bata: unie rei mia ze unie za thukeliemia zo, derei unie pfhekiu nu volie mota, sidi razhüchü nunu siedzedie pu bata.

²⁷ Sitse khriesamia puo ta vo Mosa ki, “Eldad mu Medad unie razhüchü nunu siedzedie pu bate,” ishü.

²⁸ Ru Nun nuou Joshua, Mosa chalie chüyakezhau, themiako donu puo kedakelieu sie, “A Niepuu Mosa, unie khawaliecie,” si.

²⁹ Derei Mosae puo ki, “A la no n roya me? Jihova bu puo ruopfü pie Jihova themia peteko gei shüshü di uko bu siedzekesimia chü phrekelie we a kedithede a neituo shi?”

³⁰ Süsie Mosa mu Israelmia phichüko puo ze razhüchü nu vota.

Jihova Pera Ketsekeshü

³¹ Süsie Jihova kinu teikhrie puo vor di dzükezha nunu vüpfhi se vor petepie razhüchü khie shüshü, hatsa khunhie chatuo mese mu lutsahatsa khunhie chatuo mese, kijü mho thu kenie rükrie di razhüchü lutsahatsa tshupfü zhülie.

³² Sitse themiako sie di sünhie zhate, mu süzhü teizeizha pete, mu süsienhie zhate perako te kengulie. Te ketsatho-u zorei homer ker telie sidi uko süko pie u thuo u la razhüchü lutsahatsa kelhapie phielie.

³³ Derei themiako themuo mekrapie di cülie kemonu Jihova uko gei puo nei mota; sidi Jihova thesa kere se puo pie themiako biekhriwa.

³⁴ Süla thechü süu za üse Kibrot-hatava üsita. Kekreilamonyü thechü sünu themia kecahuokecümia khrukecü la.

³⁵ Kibrot-hatava nunu themiako tuose Hazerot nu volie.