Nuolhoutsüphrü 10 - Angami Naga CL (Re-edited) Bible (BSI)

Rakachü pie Kechü Ketsü Kenie

¹ Jihovae Mosa ki:

² No rakachü rükreipie ketsü kenie chülie; mechükehou kieketuo la mu razhüchüko nu rüyieketuo la no sünie setuo.

³ Siro uko ketsünie khoushü ro, mechükehou pete vor rüsuopfhekiu kicie nu kengulietuo.

⁴ Mhanuü ukoe ketsü puo rübei khou ro, krütako mu Israelmia seyie krütako bu vor n mhodzünu kengulietuo.

⁵ Siro no terhü tsükhou khoushü ro, niathutsa keba razhüko bu sie tuoshülie.

⁶ Tsiu no terhü tsükhou va kenieu khoushü tse pekhrotsa keba razhüko bu tuoshülie. Terhü tsükhouu nieko tuoshüketuo ki setuo.

⁷ Derei mechükehou kehouketuo ki nieko ketsü khoutuo, sirei terhü tsükhouue khou lho.

⁸ Siro Aron nuonuoko zievoko bu ketsünie khoutuo; sidi nie nuosenuoyie pete nu kechachie nieko la ketsü kekhou pie thezho chütuo.

⁹ Siro nie kijü nu nieko ngumvümia nie peseyakezhamia ze terhü chütuo üro, nieko terhü tsükhouko khoushütuo; sitse Jihova nie Kepenuopfüe nieko rükralietuo, sidi nie ngumvümia kinu nieko kelalietuo.

¹⁰ Siro nie kenei teisozhako, mu nie thenyiko, mu nie khrülhouko rei, nie kethe ruosuoko mu kezekevi ruosuoko kechü ki niekoe ketsü khoukhoutuo, sidi Ukepenuopfü mhodzünu nieko la rükra tuoketuo puo chü di ketsü khoutuo: Ae Jihova nie Kepenuopfü zo.

Israelko Sinai nunu Tuokeshü

¹¹ Süsie cie kenie cie, khrü kenieu, zha mepfü nhie, dietseidiekhobou rüsuopfhekiu mho geinu kimhou chüseta.

¹² Süla Israelmiakoe Sinai rayha nunu kro puopuo di tuo lashü, mu kimhou vo Paran rayha nu bata.

¹³ Siro uko Jihovae Mosa ki diekhakeshü mhie di uko rüve kerieu sede lashü.

¹⁴ Therietho nu Juda nuomia razhüchü pfhelhau mu uko rüpfhünuoko bu tuoshü; mu Aminadab nuou Nashon bu rüpfhünuoko mhokezha chü.

¹⁵ Tsiu Zuar nuou Nethanel bu Isakar nuomia rüpfhünuo mhokezha chü.

¹⁶ Helon nuou Eliab bu Zebulun nuomia rüpfhünuo mhokezha chü.

¹⁷ Süsie rüsuopfhekiu rhuolie di Gershon nuomiako mu Merari nuomiako bu rüsuopfhekiu pie di tuoshü.

¹⁸ Siro Reuben nuomia razhüchü pfhelhau khro kebako u thuo u rüpfhünuonuo idi tuoshü, mu Shedeur nuou Elizur-e puo rüpfhünuo mhokezhau.

¹⁹ Siro Zurishadai nuo Shelumiel bu Simeon yiemiako rüpfhünuo mhokezha chü.

²⁰ Deuel nuou Eliasaf-e Gad yiemiako rüpfhünuo mhokezha chü.

²¹ Süsie Kohatkoe kemesa nyako toupie di tuoshü; mu uko vo tsolie kemonu kekreikoe rüsuopfhekiu pethoupie bata.

²² Süsie Efraim nuomia razhüchü pfhelhau khro kebako u thuo u rüpfhünuonuo idi tuoshü mu Amihud nuo Elishama bu rüpfhünuo mhokezha chü.

²³ Siro Pedahzur nuou Gamaliel-e Manasseh yiemia nuonuoko rüpfhünuo mhokezha chü.

²⁴ Mu Gideoni nuou Abidan-e Benjamin yiemia nuonuoko rüpfhünuo mhokezha chü.

²⁵ Süsie Dan nuonuoko rüpfhünuo pfhelhau, razhüchü kenuotho-u, khrokebakoe u thuo u rüpfhünuonuo idi tuoshü, mu Amishadai nuou Ahiezer-e puo rüpfhünuo mhokezha chü.

²⁶ Okran nuou Pagiel-e Asher yiemia nuonuoko rüpfhünuo mhokezhau chü.

²⁷ Mu Enan nuou Ahirae Naftali yiemia nuonuo rüpfhünuo mhokezha chü.

²⁸ Hamhie di Israelmiae u thuo u rüpfhünuo kro-u idi tuoshüya.

²⁹ Süsie Mosae Midianmia Reuel nuou Hobab, Mosa-nuo meiu ki, “Hie Jihova thechü puo khapie hie tsütuo üdi, ‘A süu kha nieko tsütuo,’ idi pukeshüu nu votuo üzhie, süla no rei hie ze vocie, hie n la mha kevi chüshütuomu, Jihovae Israelko ki mha kevi phrakeshü la,” sishü.

³⁰ Derei puoe puo ki, “A volie lho, a a thuo a kijü nu a themiamia ki votatuo”

³¹ Sitse puoe la sie, “A n ki chaya, hieko tseta hiecie, hiekoe rayha nu tuokecü noe si ba mu noe hieko la themhi puo chü mhachütuo.

³² Mu no hie ze tuo ro, Jihova hie gei mha kevi kehoupuorei chükeshü khe, hie rei sükemhie n gei chüshütuo.”

³³ Süsie ukoe Jihova kijüthou geinu zha se tuo nu vota; mu uko kebachü pfhütuo üdi, Jihova dietseidiekhobouue uko mhodzü zha se tuo rie vota.

³⁴ Siro ukoe razhüchü nunu tuoshü tse Jihova kimhouu khinhie uko mhogei zhata.

³⁵ Siro dietseidiekhobouu tuokeshü ki, Mosae sie, “He-i Jihova, sieliecie, n ngumvümia bu cüretaliecie, mu n ngumecüyakezhamia bu n mhodzü nunu tataliecie,” siya.

³⁶ Tsiu süu bakecü ki, puoe sie, “Harie Jihova, Israelmia soünyie ketuoko ki rürei vorliecie,” isi.