Nuolhoutsüphrü 1 - Angami Naga CL (Re-edited) Bible (BSI)

Sinai nunu Israelko Phrükecü

¹ Siro uko Ijipt kijü nunu parkelie sie, cie kenie cie khrü kenieu nu zha puo nhie; Sinai nhatsa nu rüsuopfhekiu nunu Jihovae Mosa ki;

² Israelmia kro-u pete, u puonuo mu u kinumia idi, theza medzi mu tsü puopuo di thepfumia kide ba shiü phrüliecie.

³ Israelmia donu terhü nu pralie kevi khe, u kelhouzha cie mepfü mu sümhoko, Aron nnie rüpfhünuo puopuo idi phrüliecie.

⁴ Siro u puonuoko donu puotsüu idi seyie peteko nu mia puopuo bu nie khruohituo.

⁵ Nnie khruohiketuoko za hako: Reuben nuo: Shedeur nuou Elizur.

⁶ Simeon nuo: Zurishadai nuou Shelumiel.

⁷ Juda nuo: Aminadab nuou Nahshon.

⁸ Isakar nuo: Zuar nuou Nethanel.

⁹ Zebulun nuomia: Helon nuou Eliab.

¹⁰ Josef nuoko: Efraim nuo; Amihud nuou Elishama; Manasseh nuo, Pedazur nuou Gamaliel.

¹¹ Benjamin nuo: Gideoni nuou Abidan.

¹² Dan nuo: Amishadai nuou Ahiezer.

¹³ Asher nuo: Okran nuou Pagiel.

¹⁴ Gad nuomia: Deuel nuou Eliasaf.

¹⁵ Naftali nuo: Enan nuou Ahira.

¹⁶ Israel kro-u nu u puonuoko donu krüta kemeyie hako kiepie uko bu Israel nuonuoko mhokezha chü.

¹⁷ Mosa mu Aron unie themia za thupie keba hako zelie,

¹⁸ sidi unie khrü kenieu zha puo nhie Israel kro-u peteko kie kengulie di u puotsanuo, u kinumia idi u kelhouzha cie mepfü mu sümhoko phrükelie mhiei u puotsanuo za thukelie leshüu phrüpie uko pesishü.

¹⁹ Jihovae Mosa ki pukeshü mhie di Mosae Sinai rayha nunu uko phrülie.

²⁰ Israel nuorieu, Reuben nuomia, u seyieko, u puonuoko mu u kinumia za medzi di phrükecü thepfumia terhü nu pralie kevi khe, u kelhouzha cie mepfü mu sümhoko:

²¹ Reuben yiemia phrükelieko mia nyie hiediaesorou di krie pengou.

²² Simeon nuomia, u seyieko mu u puonuoko mu u kinumia za medzi di phrükecü, thepfumia terhü nu pralie kevi khe, u kelhouzha cie mepfü mu sümhoko:

²³ Simeon yiemia phrükelieko nyie hiepengouethepfü di krie se.

²⁴ Gad nuomia, u seyieko u puonuoko kinumia za medzi di phrükecü, u kelhouzha cie mepfü mu sümhoko, terhü nu pralie kevi khe:

²⁵ Gad yiemia phrükelieko nyie hiediaepengou krie sorou di hiepengou.

²⁶ Juda nuomia, u seyieko, u puonuoko mu u kinumia za medzi di phrükecü, u kelhouzha cie mepfü mu sümhoko, terhü nu pralie kevi khe:

²⁷ Juda yiemia phrükelieko nyie hietheniedia di krie sorou.

²⁸ Isakar nuomia, u seyieko, u puonuoko mu u kinumia za kephrü, u kelhouzha cie mepfü mu sümhoko, terhü nu pralie kevi khe:

²⁹ Isakar yiemia phrükelieko nyie hiepengouedia di krie dia.

³⁰ Zebulun nuomia, u seyieko, u puonuoko mu u kinumia za medzi di kephrü, u kelhouzha cie mepfü mu sümhoko, terhü nu pralie kevi khe:

³¹ Zebulun yiemia phrükelieko nyie hiepengouethenie di krie dia.

³² Josef nuomia üse Efraim nuomia rei üya, u seyieko, u puonuoko mu u kinumia za medzi di kephrü, u kelhouzha cie mepfü mu sümhoko, terhü nu pralie kevi khe:

³³ Efraim yiemia phrükelieko nyie hiedia di krie pengou.

³⁴ Manasseh nuomia, u seyieko, u puonuoko mu u kinumia za medzi di kephrü teicie mepfü mu sümhoko, terhü nu pralie kevi khe:

³⁵ Manasseh yiemia phrükelieko nyie serekenie di krie kenie.

³⁶ Benjamin nuomia u seyieko, u puonuoko mu u kinumia za medzi di phrükecü, u kelhouzha cie mepfü mu sümhoko, terhü nu pralie kevi khe:

³⁷ Benjamin yiemia phrükelieko nyie serepengou di krie dia.

³⁸ Dan nuomia, u seyieko, u puonuoko, u kinumia za medzi di phrükelie, teicie mepfü mu sümhoko, terhü nu pralie kevi khe.

³⁹ Dan yiemia phrükelieko nyie hiesorouekenie di krie thenie:

⁴⁰ Asher nuomia, u seyieko, u puonuoko mu u kinumia za medzi di phrükelie, u kelhouzha cie mepfü mu sümhoko, terhü nu pralie kevi khe:

⁴¹ Asher yiemia phrükelieko nyie hiediaepuo di krie pengou.

⁴² Naftali nuomia, u seyieko, u puonuoko mu u kinumia za medzi di phrükelie, u kelhouzha cie mepfü mu sümhoko, terhü nu pralie kevi khe:

⁴³ Naftali yiemia phrükelieko nyie hiepengouese di krie dia.

⁴⁴ Hako theza phrükelieko, mia kerekenie, puotsanuo puo gei mia puopuo idi Israel krütako ze Mosa mu Aron unie khruohi di phrükelieko.

⁴⁵ Israelko u puonuo puopuo idi, teicie mepfü mu sümhoko Israel donu terhü nu pralie kevi khe, phrükecü hade:

⁴⁶ Phrükelieko pete kesa lakh sorou nyie se, krie pengou di hiepengou.

Rüsuopfhekiu la Leviko Mhatho

⁴⁷ Derei Levimia puotsanuo yiemia we phrüpie uko sa mo.

⁴⁸ Kekreilamonyü Jihovae Mosa ki:

⁴⁹ No Levi yiemia rübei phrülie lho; mu no uko phrüpie Israelko salie lho.

⁵⁰ Derei no Leviko bu dietseidiekhobou rüsuopfhekiu, süu nyako mu süu vie pete mho kemehoko chütuo; uko bu rüsuopfhekiu mu süu nyako pete toupie tuo; sidi uko rüsuopfhekiu khieümhoura ba di sünu mhatho chütuo.

⁵¹ Sidi rüsuopfhekiu se keyietuo üro, Leviko bu rhuotuo; mu rüsuopfhekiu pethoutuo üro, Leviko bu chüshütuo, siro kehoupuorei penuo kevormia, dukhriwatuo.

⁵² Siro Israelko u thuo u rüpfhünuo, mu u thuo u pfhelha khieki nu, u thuo u razhüchü nunu idi, kehoupuorei u thuo u pfheki pethoupie balietuo;

⁵³ derei Leviko we Israelko kro-u nu noupfhüu bu vor moketuo la u pfheki pethoupie dietseidiekhobou rüsuopfhekiu houpfü batuo, sidi Leviko bu dietseidiekhobou rüsuopfhekiu mehokecü pie uko mese chütuo.

⁵⁴ Hakemhie di Israelkoe chülie. Jihovae Mosa ki diekhakeshü pete medzi di chülie.