Nehemia 9 - Angami Naga CL (Re-edited) Bible (BSI)

Ezra Israel Kephoumako Phrakeshü

¹ Siro thekhrü hau nu zha mepfüedia nhie Israelmiako kengulie di mevo, gakhropfhe dzie mu u tsügei nyophe kenhepfü bata.

² Siro Israelkoe seyie kekrei pete donu u thuo u kelakreilie, sidi siethalie di u kephouma mu u puonuoko kesuo kechüko phrawa.

³ Tsiu ukoe u thako nu thalie, sidi teisozhau za dia-zapuo pie Jihova uko Kepenuopfü zho leshüdau phrü; mu za dia-zapuo kekreiu pie uko kejo phra di Jihova uko Kepenuopfü rüsuo.

⁴ Süki chapra gei, Leviko, Jeshua, Bani, Kadmiel, Shebania, Buni, Sherebia, Bani mu Kenani, uko pfhephra kemerie chü di krapie Jihova uko Kepenuopfü ki shü.

⁵ Sitse Leviko, Jeshua, Kadmiel, Bani, Hashabneia, Sherebia, Hodia, Shebania, mu Pethahia, ukoe sie, “Siethalie di kechachie mu kechachie ketuo nie Kepenuopfü tsheliecie. N za thetshetherhu kepfü bu kemeyieu chüliecie, süue theja mu ketshe pete mho zo.”

⁶ Sitse Ezrae sie, “N rübei Jihova zo; noe tei chüshü, teiko mho teiu, sünu ketuo pete, kijüu mu sünu ketuo pete, dzükezhako, tsiu sünu ketuo pete chüshü, mu no süko pete se baya; tsiu teigei ketuo krodiko n rüsuoya.

⁷ Noe Jihova, Abram kedakelie Kepenuopfüu zo, sidi Chaldiamia Ur nunu ze parshü, mu puo za thopie Abraham chükeshüu zo,

⁸ tsiu n mhodzüki puoe dietho ba di ngulie, sidi Kananmia, Hitmia, Amormia, Perizmia, Jebusmia mu Girgashmia kijü khashü puo tsütuoü puo ze dietseidiekholie, sidi n die phrakeshüu chü tseishü, noe dietho zokecü la.

⁹ “Tsiu Ijipt nu hie puonuoko kemezhiekecü ngushü, mu Kemerie Dzükezha khieki nu uko kekra pfhe rünyülie.

¹⁰ Siro zasiko tsiu u ngoko chüpie Faro mu puo kituoko, mu puo kijü nu themia peteko kieshü, kekreilamonyü ukoe hie puonuoko gei uzhosuokecü noe sikecü la. Sükemhie di noe tsiedo teiki kemhie n za pesishüte.

¹¹ Siro no uko mhodzünu dzükezha bie kezawa, süki ukoe dzükezha metsuo nunu kijü keso gei vota, tsiu uko ngumvümiako, ketsie puo pie dzükezha nu keshü tuoi noe uko kelhoupie kesou nu shüwa.

¹² Khinhie gei kimhou co puo nunu uko cha tha, mu theva gei uko voketuo cha nu kezie khashüketuo miü co puo nunu uko cha tha.

¹³ Noe Sinai Kijüthou gei ker, sidi teigei nu uko ki die pu, mu kesikele puotoukecüu, thezho ketho-u, chünukecü keviko mu diekhakeshüko khashü uko tsü.

¹⁴ Sidi n kituou Mosa dzie nunu, n kemesa sabat-u pekieshü, tsiu diekhakeshüko mu chünukecüko mu thezhoko khashü uko tsü.

¹⁵ Tsiu uko kemerü la teigei niekhrüda khashü mu uko terhü la tsiekrie geinu dzü se parshü, sidi noe rüse di khapie uko tsütuo ükeshüu uko bu vo welienukecü pushü.

¹⁶ “Derei uko siro hie puonuoko kemiakota, mu u nou reta, sidi no diekhakeshüko ze mvüta.

¹⁷ Ukoe miadie ze mvü, mu noe uko donu chükeshü ungothoko dze le mo; derei u nou chü perelie, di miadie kechü nu la votatuoü krüta puo kedalie; derei noe mia kejo vashütuo ükecü Kepenuopfü, mia khrie tsiu ngumezhieya, n nou meyie tho mu ketseikevi bu tshupfü, di uko khawa mo.

¹⁸ Ukoe mha lhopie mithunuo puo chülie di sie, ‘Ijipt nunu nieko ze parshükecü nieko Kepenuopfü sü hauha zo,’ idi thenou meyie sekecü chüshü zo ürei,

¹⁹ noe n kekhrie nyi rei nyithorkecü nunu nha nu uko khawa mo; khinhie gei kimhou co-u uko tseta mo di uko chau nu volie morei teizei gei uko bu voketuo chau nu volieketuo la, kezieu khashütuoü miü co-u uko tseta mo.

²⁰ Noe n Ruopfü keviu bu uko pethashütuoü khashü tsü, tsiu uko me nunu n manna khawa mo, mu uko terhü la dzü khashü tsü.

²¹ Teicie hiedia noe uko theke vor, sidi ukoe mhapuo nu rei tsopfhü mo, uko pfhenei suota mo, mu uko phi rümieta mo.

²² Siro noe kedibako tsiu themiako pie uko tsü, sidi uko kezapie kijü ke pete nu shü; süla ukoe Heshbon nu kediu Sihon kijü mu Bashan, kediu Og kijü welie.

²³ Noe uko nuosenuoyie chü pekrapie teigei themvü tuoishü, sidi uko puonuoko ki, uko bu vo di welietuo ükeshü kijüu nu ze vorshü.

²⁴ Süla u nuosenuoyiekoe vo kijüu welie, siro noe uko mhodzünu kijüu nu kelhouko, Kananmia penyüshü, sidi uko bu u medo chülietuoü, uko kediko, mu kijü nu themiako khapie uko dzie nu shü.

²⁵ Sidi ukoe nadi kemeteiko tsiu kijü kekro-u lielie, mu kinu mha kevi pete keba, dzükhou thiepie keba, khubelie, siro oliv lie, mu nhasibo kekra welie, sidi ukoe cüükrie di u ketshukelhuo chülie, di luolie, mu n ketseikeviu nunu u neilie.

²⁶ “Sishierei uko n die ze mo, di n perhieta, sidi n zho-u kelhoupie u sietsa shüwa, tsiu n siedzekesimia, uko bu rürei n kitsatie vorlietuoü zhapu kechüko dukhriwa, mu uko themia thepesuo sekecü mhatho chüshü.

²⁷ Süla noe uko khapie uko ngumvümia dzie nu shüwa, sükoe uko pechüpenyü; tsiu ukoe kemezhiekelie ki, uko n ki u mezhiemelo tse, noe teigei nu uko pfhe silie; sidi n kekhrie nyithorkecü nunu noe uko ngumvümia dzie nunu uko kelalieketuo khashü uko tsü.

²⁸ Derei sükoe kerülei ngulieta tse, ukoe n mhodzünu mha kesuo chü lata; süla noe uko khapie uko ngumvümia dzie nu shüwa, sidi ukoe uko mho di, sirei ukoe rürei la vorlie, sidi n ki chalie tse, teigei nu uko pfhe silie, mu noe va kekra mia ngumezhieyakecü ki ze uko kelashü.

²⁹ Siro noe uko bu n zho-u nu rürei la vorlieketuo la uko pethashü, sirei uko kemiako di n diekhakeshüko ze mvüta, sidi noe pethokeshüzhoko varhuo di phouma, süko mia puoe chüüzelie ro puoe rheilietuo, derei uko u bouka kereilie, mu u nou chü perelie, tsiu rünyülie lho üte.

³⁰ Noe teicie kekra uko gei shükhreshühie vor, sidi n siedzekesimia geinu n Ruopfü se di uko pethashü, sizo shierei ukoe unyie kereishülie mo; süla noe uko khapie kijüu nu themiako dzie nu shüwa.

³¹ Sirei noe mia khrielekhriethorkecü la uko peka lotsowa mo, morei uko khawata mo; kekreilamonyü noe ngukemezhie tsiu kekhrie Kepenuopfü puo zocü la.

³² “Süla tsie, hie Kepenuopfü, kezhau, kekuou, siro kemerie zokecü Ukepenuopfü, diekhakeshüu mu kekhrie se bayakezhau, Asiriamia kediu teiki nu vor thie ketso, kemezhiekecü, hie gei hie kediko gei, hie kedinuoko gei, tsiu hie zievoko gei, hie siedzekesiko gei, hie puonuoko gei, mu n themia peteko gei kevor ha üse mhathopuo mo ükecü chüwa hiecie.

³³ Sirei no hieko gei se kevorko pete rei puotou zo; noe mha kemezhüu chüshü, derei hieko we chü kekrüwaketa la.

³⁴ Hie kediko, hie kedinuoko, hie zievoko, mu hie puonuoko n zho-u chüüzelie mo, morei no diekhakeshüko tsiu n zhapuko, no uko bu u kirilienukeshüko rünyülie mote.

³⁵ Kekreilamonyü ukoe u kedirüvie nu n lie chülie mote, noe n ketseikevi nunu se uko tsü siro no khapie uko mhodzünu keshü kijü meya mu keviu nu, morei uko u kerüzhü mhatho nunu rüreilie mo.

³⁶ Harie, hieko thie mia kituomia chüte, noe hie puonuoko bu kijü keviu si mu süu nu mha kevi khakeshüko cüükrielienukeshüu nu, harie, hiekoe sünu mia kituomia chüte.

³⁷ Hie kephouma la, puo si rüchü pevi sepie hie ketsüko noe kedi khapie hie mho dikeshüko dzie nu vote, siro ukoe hie chüümo, hie kicükiri kekha u medo chü, sidi hie bu kemezhie sekecü nu bate.”

Thezho-u la Themiako Dietseidiekhokelie

³⁸ Mha hako pete la hie dietseidiekho chü toulie, sidi süu thulie, siro hie kedinuoko, Leviko mu hie zievoko süu zasi vüwa.