Nehemia 8 - Angami Naga CL (Re-edited) Bible (BSI)

Ezra Themiako ki Thezho Phrükeshü

¹ Siro khrü thenieu vorlie mu Israelko u thuo u rüna nu lhoukelie ki themiako pete keze puo chülie di Dzü Kharu mhodzünu chapfüu nu vo kengulie, sitse ukoe Ezra thezhokepethau bu Mosa zho leshüdau, Jihova khapie Israel tsükeshüu se vorlienushü.

² Sitse Ezra zievo-u thezho-u se themia kengu kebako mhodzünu vorlie, thepfumia mu thenumia bu süu rünyülie di puocapuola silieketuo la; süu khrü therieu nu zha thenie nhie chü.

³ Mu puoe Dzü Kharuu chapfüu mhodzünu khise nu vo khinhie ketso, thepfumia siro thenumia puocapuola silie kevimiako mhodzü nunu süu phrüshü, mu themia pete u nyie kedeipie thezho leshüdau rünyülie.

⁴ Siro Ezra thezhokepethau sei pie kechü shadze puo nu, uko süu la chükeshüu gei thalie, siro puo khieki Matithia mu Shema, Anaia, Uria, Hilkia mu Maseia bu puo dzie puo zatsa tha; tsiu puo dzie puo vitsa, Pedaia, Mishael, Malkija, Hashum, Hash-badana, Zekaria mu Meshulam bu tha.

⁵ Siro Ezrae themia pete mhinguki nu leshüdau hielie; puoe themia pete mho thacü la, mu puoe süu hielie tse, themia peteko siethalie.

⁶ Sitse Ezrae Jihova, Ukepenuopfü kezhau tsheshü, sitse themia pete u dzie yha di sie, “Amen, Amen” idi puo pfhekhoshü, sidi ukoe zeretsu Jihova rüsuota.

⁷ Süsie rei Jeshua, Bani, Sherebia, Jamin, Akub, Shabethai, Hodia, Maseia, Kelita, Azaria, Jozabad, Hanan, Pelaia mu Levikoe, themiako khruohipie uko bu thezho-u ca silie; mu themiako u tha nu tha zo.

⁸ Sidi uko Ukepenuopfü zho leshüdau nunu phrü kemecie tsuoishü, sidi kiüba shikecü thashü, mu uko bu phrükeshü cau silie.

⁹ Süsie Nehemia, ahng, zievo-u mu thezhokepethau Ezra, tsiu Leviko mia pethayakecüko sie themiako ki, “Teisozha hau Jihova nie Kepenuopfü kitsatie mesa; süla thenousuo morei kra hie,” sishü. Themia petekoe thezho-u dieko silie tse kratacü la.

¹⁰ Süsie puo sie uko ki, “Nie cha nu volie, mha kelhe cha cülie mu mha kemou krielie, sidi mha pie mhapuorei keseliekemomia tsüshülie; kekreilamonyü teisozha hau Jihova kitsa mesa; mu nie nousuota hie; Jihova keneiu sünie kekuou zocü la.”

¹¹ Süla Levikoe themiako kekha di sie, “Kemekrietalie, teisozha hau mesacü la, nie nousuota hie.”

¹² Sidi themia petekoe mhacümhakrietuoü mu mha pie huoniehuo tsütuoü mu u kenei tei batuoü u thuo u cha nu vota, ukoe uko ki pukeshü dieko silieketa la.

¹³ Süsie teisozha kenie nhie, thezho leshüdau nu dieko silietuo üdi, themia peteko u puonuoko kinuko donu krütako, zievoko mu Leviko vor Ezra thezhokepethau ki kengulie.

¹⁴ Sidi ukoe Jihova die khapie Mosa tsükeshü thezho nu thupie ketuo, süusü thekhrü thenie nyiu nu Israelmiako Pru nu bacü meseketa ngulie,

¹⁵ tsiu uko bu rüna pete nu, mu Jerusalem nu hamhie di pu pesishülienushü, “Pruko chüketuo la kijükhruko gei vo oliv coko, mürtel coko, kukuo coko, seibo kedei coko se vorliecie.”

¹⁶ Süla themiakoe vo di süko se vorlie, sidi mia puopuokecü puo kitie nu, siro kitiezha nu, Ukepenuopfü ki kitiezha nu, mu Dzü Kharu nu, tsiu Efraim Kharu chapfüu nu, u thuo u la pru chü phrelie.

¹⁷ Tsiu miadie chütuo di la vorketa themia kro-u pete pru chülie, sidi pruko nu balie, kekreilamonyü Nun nuou Joshua teiki nu vor teisozha sünhie ketso Israelmiakoe sütuoicü chü vor mota. Sidi ukoe uko nei pie mhapuochü.

¹⁸ Sizomonyü teisonhie, teisozha therie nhie nu vo thela nhie ketso, puoe Kepenuopfü zho leshüdau phrü sidi ukoe teisozha thenie thenyi nyi; mu teisozha thetha nhie thezho medzi di kemesü kehou puo kehoulie.