Nehemia 6 - Angami Naga CL (Re-edited) Bible (BSI)

Ngumvüko Thedo Kesuo Rhükecü

¹ Siro süki Sanbalat, Tobia siro Arabmia Geshem, siro hie ngumvümia kekreiko ae dahouu pfhelieketa tsiu sünu puo kepa puorei ba moketa silie tse, (süki a kharu kikhako pesieshülie mo baluo),

² Sanbalat mu Geshem-e mia ketseshü di sie, “Vorlie, úko Ono razha nu rüna puo nunu kese khe,” si. Derei ukoe a gei mha kesuo chüketuo rhüta.

³ Süla a dieliemia ketsepie uko ki shü di sie, “Ae mhatho kezha chü ba mu a nie ki kerlie kenjüte. A kiüdi mhatho-u khawa di nie ki kertatuo mu?” sishü.

⁴ Mu ukoe hamhie di va dia mia ketseshü; mu ae sükemhie tou di uko die kelashüwa.

⁵ Süsie rei Sanbalat-e sükemhie va pengouu va puo kituoko dzie nunu leshü hiepieketuo puo ketseshü.

⁶ Sünu thupie ketuo, “Hau seyieko donu pu tuote mu süu Geshem rei puya, süu no mu Judamiako mia perhieketuo rhü ba; süla noe dahouu pfhe ba, tsiu die pukeshü hau mhie ro, noe uko kediu chü nyüya.

⁷ Siro noe siedzekesimia kedapie u bu Jerusalem nu n dze pushüketuo la khapie bata üsi, di sie, ‘Juda nu kedimia puo bawe!’ Süla tsie die hako kemhie di kediu ki pushütatuo. Süla tsie vorlie, di keze kerüchücie.”

⁸ Sitse a mia ketsepie puo ki lashü, “N kepu tuoikecü puorei chü ba mo, derei no n nou nu rhükelie zo.”

⁹ Kekreilamonyü uko pete hieko chü kemidewaketuo le di sie, “Uko dzie bu mhatho nu thachüta di süu chülie motatuo, siya.” Derei he-i, Kepenuopfü, tsie no a dzieko chü kemeteishücie.

¹⁰ Süsie ae Mehetabel nuo Delaia nuou Shemaia, kinu puo khapfü kebau ki vor, ru puoe sie, “Úko keze Ukepenuopfü kinu, rüsuoki nu kesetuo khe, sidi úko rüsuokiu kikhako khawatuo khe, kekreilamonyü ukoe theva ze nu dukhriwatuoü vorzhücü la,” sita.

¹¹ Derei a sie, “A mhiekecü mia puo ta tuotuo me? A mhiekecü puo puo phou kelalietuoü rüsuoki nu votuo üketuo supuo ba ga? A we sünu volie lho.”

¹² Mu ae si mu ngukelie Kepenuopfü puo ketseshü mo, derei puo bu siedzedie pu a petsoutuo üdi Tobia mu Sanbalat unie puo zhakhrükelie la.

¹³ Mharhü hau la puo zhakhrülie, süusü a bu michie di kephouma chüwa, sidi ukoe a za pu pesuo di a kengatuoükecü la zo.

¹⁴ He-i a Kepenuopfü, no Tobia, Sanbalat mu Noadia siedzekesipfü, siro siedzekesi kekreiko, a pie kemichie nu shüwatuo ükecüko mhatho rükrashücie.

Dahou Chü Tseikelie

¹⁵ Sidi mhatho-u Elul khrü zha mepfüepengou nhie, zha hiepengouekenie nu chü tseilie.

¹⁶ Süki hie ngumvümia pete süu silie, siro hie khieümhou keba seyieko mha hako ngu tse, uko michie mu u thesuo seta, kekreilamonyü ukoe mhatho hau Ukepenuopfü thuo khruoshü di chülie zo ükecü ngulieketa la.

¹⁷ Sizomonyü teisozha süko nu Juda nu pehüko leshü kekra thupie Tobia tsü, siro Tobia leshüko uko ki vor.

¹⁸ Kekreilamonyü Juda nu themia kekra puo ki rüseshü, puoe Ara nuopfü Shekania lie, mu puo nuou Jehohanan-e Berekia nuo Meshulam nuopfü liecü la.

¹⁹ Siro ukoe a mhodzünu puo mhatho kevi dze rei pu, a dieko puo ki pushü. Mu Tobiae a bu michietatuo üdi leshü kekra ketseshü.