Nehemia 5 - Angami Naga CL (Re-edited) Bible (BSI)

Puoprapuoshü Kelie Khakewa

¹ Süsie themiako mu u kimiakoe uko siezedzürie Judako gei panya di melie u rhiechüta.

² Kekreilamonyü uko mia huoe sie, “Hie nuonuo thepfumia mu thenumia sa ro, hieko kra phite; süla hieko telha se morosuote, süu cü di lhou balieketuo la.”

³ Mia huo ro sie, “Pekrie teiki kecü telha la hie lie, hie khubelie mu hie ki pie khewate.”

⁴ Mu huomia sie, “Kediu khezhanuo suketuo la hie lie, hie khubelie pupie khe di mia raka thepu molie kenjüte.

⁵ Mu hie chü rei hie siezedzüriemia chü ze kemhie ze, hie nuonuo rei uko nuonuo mhie zo, sizorei uko hie nuonuo thepfuu rei mu thenu rei kemvü chüpie miadie chütuoü mu hie nuonuo thenumia huo tsie rei miadie chü bate: derei we uko rhalieketuo kekuo ba mote, kekreilamonyü hie lieko tsiu hie khubelieko lieliete,” sita.

⁶ Ae uko panyako silie tse a nei mo phita.

⁷ A a thuo mharhü di pehüko mu kezhako kerhieshü, sidi sie uko ki, “Nie mia puopuocü nie siezedzüriemia gei puoprapuoshü lie cü bate.” Mu ae kehou kezha puo kieshü, uko petsoutuo üdi.

⁸ Sidi sie uko ki, “Hie chülie keviu nu, u siezedzürie Judamia, pelekemomia ki zewaketako rhapie zhü; derei nieko nie thuo nie siezedzürieko zewa di u bu rhatuoü thate.” Sitse ukoe kemekrieta, tsiu die puorei pu pie kelaketuo ngulie mota.

⁹ Süla a sie, “Nieko chü keba hau vi mo, Ukepenuopfü khrüprei nu tuolie di u ngumvümia u pesekecü nunu u yaliecü mese moü me?

¹⁰ Sütuoi, a rei, a siezedzürieko rei, tsiu a kituoko rei, raka mu telha pie mia thepushü ba. Úko puopra liekecü hau khawa khe.

¹¹ A süko ki chaya, thie zokecü rei, nie u kinu lielieketa u kijüko, u raka, u oliv lieko, mu u kiko, siro raka, telha, khubezu, tier pielie ketako kha lashüwalie.”

¹² Sitse ukoe sie, “Hieko süko kha lashüwatuo, tsiu uko ki mhapuorei chalie lho, sidi hie n kepu tuoi chülietuo.” Sitse a zievoko kielie, di uko phrakeshü mhiei chütuo üdi uko bu rüse.

¹³ Süsie a rei a pfhenei kekhreketako keshü di sie, “Kehoupuorei rüse hau chü moketamia Ukepenuopfü bu puo ki nu mu puo kiülieko nunu hamhie di puo ketshüshü di puo pie kemethuowacie.” Sitse mechükehouu pete-e Amen idi Jihova tsheshü. Mu themiakoe phrakeshü mhie chülie.

¹⁴ Sizomonyü a kedapie a bu Juda kijü nu Ahng-u chükelie, Artaxerxes dikelie teicie mepfü nunu serekenie ketso, a morei a siezedzüriekoe Ahng kecüca cü vor mo.

¹⁵ Derei a mhodzü Ahngkoe thepie kemesi pie themiako gei shü, tsiu rakachü shekel hiedia zomonyü, kecüca mu khubezu lieya, uko kituoko thuo zorei mia pesüpemvü zo. Derei a we sükemhie chü mo, Kepenuopfü khrükeprei la.

¹⁶ Ketho zo, a rei dahouu pfhe zo, siro hieko kijü puo rei khrü mo, mu a kituoko pete mhatho-u la sünu kengu phrelie.

¹⁷ Sizomonyü a mizhü gei hieko khieümhoura seyieko nunu kevorko sa kemo Judamia mu kezhako krie puo di hiepengou ba.

¹⁸ Süki teisonhie a la mha kesekecüe thudo puo mu tekuo puophou kevi sorou; sümhie pera rei sa keseya; siro zha ker donu va puo khubezu doneiüneiya. Sirei a mha hako pete la Ahng-u kecüca khruou cha mo, themia hako gei thepie mesithorta zocü la.

¹⁹ He-i a Kepenuopfü, themia hako gei chükeshü pete mhiei, a la keviu leshücie.