Nehemia 4 - Angami Naga CL (Re-edited) Bible (BSI)

Ngumvümia la Mhatho Pfhekecü

¹ Siro Sanbalat-e hieko dahou pfhekeba silie tse, puo nei mota mu puo nou meyiepie mhapuochüta, sidi Judamiako kreta.

² Sidi puoe puo zeko mu Samaria chüpahiko mhodzü nunu sie, “Judamia mhathokemo hako kedipuo chü ba ga? Ukoe u thuo u dahou chü kemeteilietuo me? Ukoe ruosuo chütieya me? Uko khunhie puo nu chü tseilietuo me? Ukoe mha kerhu thepie kezhü nunu ketsieko chüse parlietieya me?”

³ Süki Ammonmia Tobia, puo khieki tha di sie puo ki, “Uko chü keba tsiepfhe cüu we meseru puo kho zorei metatuo.”

⁴ He-i, hie Kepenuopfü, rünyüshücie; kekreilamonyü mia hie rütse, sidi uko mia kepese kereipie uko tsü gei shüwacie, sidi uko khapie miadie chüwa di kijü süu nunu uko pekawacie.

⁵ Siro uko kejokemou keviewa hie, tsiu n mhodzü nunu uko kephouma vawa hie; kekreilamonyü ukoe ki kechüko mhodzünu n nou chü kemeyieshükecü la.

⁶ Sümhie di hieko dahouu pfhelie, mu dahouu pete ketou puo pfhe kerükriewata. Themiakoe chüketuo u nou le phreketa la.

⁷ Derei sükisü, Sanbalat, mu Tobia, tsiu Arabmia, siro Ammonmia, mu Ashdodmia, Jerusalem dahouu pfheliekezhü, mu puo kerükoko khawaketa silie tse, uko nei mo seta.

⁸ Sidi uko pete nou puo chü di vor Jerusalem perhie mu sünu kebvükeboushütuoü kedovalieta.

⁹ Sirei hieko we hie Kepenuopfü ki kecha chülie, sidi teisoteizei uko perhietuoü rükhou khapie bawa.

¹⁰ Derei Judae sie, “Thepiekepfüko kekuo tsatazhie, mu mha kerhu kekra zhüte, süla hie dahouu pfhelie rete.”

¹¹ Tsiu hieko ngumvümia sie, “Uko donu vo di uko dukhri mu uko mhatho khawa kemochie, uko si morei ngu reilie lho, site.”

¹² Siro Judamia uko khieki lhou kebako vor va ker rei hieko ki, “Uko kelhou chü pete nunu, uko vor úko petsou zotie,” si.

¹³ Süla ae dahouu sie pekhrotsa, thechü kemethuoko nu, u kikru medzi di u zhiecha, u ngou, mu u theü kepiemia khapie thalie.

¹⁴ Sidi a mehokewa sie thalie di pehüko, mia kekhayakezhako, mu themia kekreiko ki, “Nieko uko prei hiecie. Jihova rükralie, puoe zha tsiu kemerie, süla nie siezedzürieko, nie nuo thepfuko mu thenuko, nie nupfünuoko tsiu nieko kiko la kegeicie,” sishü.

¹⁵ Süki hie ngumvümiakoe hie uko mharhüu si baketa silieta, mu Kepenuopfüe uko mharhüu pie kethedowata tse, hieko pete la dahouu nu u thuo u mhatho nu vo phrelie.

¹⁶ Sünhie yawinu a liethokoe ketou puo mhachü, tsiu ketou puo rüngou, pezhü, theü siro thegi boulie selie; mu krütakoe Juda kikru pete,

¹⁷ dahouu kechüko sie thalie. Thepiekepfüko siro u pie pfü chakhra pete rei u dzie puo pie mhachü, mu kekreitsa pie rünyie theze phre.

¹⁸ Mu ki kechüko rei, mia puopuokecü puo leikhei geinu zhiecha thushiepfü di ki chü. Siro ketsü kekhouu a khieki tuo.

¹⁹ Mu ae sie pehüko, mia kekhayakezhako, mu themia kekreiko üse, “Mhatho-u zha mu meya, siro uko dahouu nu huoniehuo ze kepetse mu cüre tuote.

²⁰ Nieko thechü kehourapuo tuo shierei ketsü kekhou pfhe si liro, ta hieko ki vortalie. Úko Kepenuopfü u la kegeishütuo.”

²¹ Sidi hieko mhatho-u chü, mu ketoupuoe teisokelie nunu vo themvü ngu parta kemochie rüngou theze pie tha tso.

²² Mu ae süki themiako ki, “Themia kehoupuorei puo kituoko ze di Jerusalem nu baliecie, sitse ukoe theva gei kepfhemia chülie mu khinhie gei mhachülietuo.”

²³ Sükemhie di a rei, morei a siezedzürieko, morei a kituoko, morei mia kepfheko a ze ketuoko miapuorei u pfhe lhewa mo zo, hieko pete rei u rünyie se u dzie nu ba sei zo.