Nehemia 3 - Angami Naga CL (Re-edited) Bible (BSI)

Jerusalem Dahou Chü Lakecü

¹ Süsie Eliashib zievo-ue zievoko ze sie di Tekuo Kharuu chülie. Ukoe süu chü kemesalie, sidi sünu kikhako pesieshülie; ukoe Thekrie Kudau nunu vo Hananel Dahouu ketso kenyülie.

² Mu puo khie touu Jerikomiakoe chü, mu uko khieu Imri nuou Zakur-e chü.

³ Hasena nuonuokoe Khuo Kharuu chü, ukoe puo kiphiko rei vüshü, mu sünu kikhako rei, kekhako rei mu puo cahouko rei chüshü.

⁴ Mu süko sie Hakoz nuo Uria nuou Meremot mhachü, süsie Meshezabel nuo Berekia nuou Meshulam mhachü, mu uko sie Bana nuou Zadok mhachü.

⁵ Mu uko sie Tekomiakoe chü, derei uko pehükoe u mhokezhako mhatho pie u pelekeshüko chü nyü mota.

⁶ Süsie Pasia nuou Joiada mu Besodeia nuou Meshulam-e Kharu Keweu chü, unie-e sünu kiphiko mu kikhako chüshü, mu mha khakecüko, mu puo cahouko chü.

⁷ Mu unie sie kechü Gibeonmia Melatia, mu Meronotmia Jadon, siro Gibeonko, mu Mizpako Kerü Lutsatie ahng chükebau ki ketso chü.

⁸ Uko sie Harhaia nuou Uziel, suna rükreiu mha ketso lashü. Puo sie rei Hanania, tier re kethengu chüyakezha mia puoe chü, mu unie-e Jerusalem nunu vo Dahou Kemeyau ketso pfhe kemeteishü.

⁹ Unie sie Hur nuou Refaia, Jerusalem ketou puo kekhayakezhaue mha ketso lashü.

¹⁰ Mu uko sie Harumaf nuou Jedaiae puo ki petsou kebako chü. Mu puo sie Hashabneia nuou Hatush-e mhachü lashü.

¹¹ Harim nuou Malkija, mu Pahat-moab nuou Hashub unie-e thechü huo mu miphuko tsiepfheu chü.

¹² Mu puo sie Halohesh nuou Shalum, Jerusalem tietsapuo kekhayakezhaue puo mu puo nuopfüko sa di mhachü.

¹³ Hanun mu Zanoa nu kelhoukoe Razha Kharuu chü; ukoe süu chü pesieshü mu süu kikhako, tsiu puo kekhako cahouko chüshülie, mu Kerhu Kharu ketso thu nyie puo ketso chü lashülie.

¹⁴ Rekab nuou Malkija, Bet-hakerem kijü tietsa puo kekhayakezhau, Kerhu Kharuu ketsoshü, puoe süu chüshü di süu kikhako, kekhako, siro cahouko chüshü.

¹⁵ Mu Kol-hoz nuou Shalum, Mizpa kijü kekhayakezhau, Dzüluo Kharuu ketsoshü di puo kewhe chüwa di süu kikhako, kekhako, mu cahouko chüshülie, siro Shela Rüzie tsiepfheu kediu zie khieki kebau, mu David nadiu nunu tuo keke kheyako ketso chü lashü.

¹⁶ Puo sie Azbuk nuou Nehemia, Bet-zur kijü tietsapuo kekhayakezhau, David mekhru kepetsouu nunu vo rüzie thiekelieu ketso chüshü, mu terhümiavimia kiu ketso chü lashü.

¹⁷ Puo sie Levimiako mha ketso la; Bani nuou Rehum, puo sie Hashabia, Keila kijü tietsapuo kekhayakezhau Hashabia, puo kijü zanu puo yau chüshü.

¹⁸ Puo sie puo siezedzürieko chü lashü. Henadad nuou Binui, Keila kijü tietsapuo kekhayakezhau puo sie chü.

¹⁹ Mu puo sie Jeshua nuou Ezer, Mizpa kijü kekhayakezhau, Dahou keu nunu terhü rünyie khapie zhüyakezha nu keke kepetsou ki thechü huo ketso lashü.

²⁰ Puo sie Zabai nuou Baruk kekreitsatie chü lashü. Dahou keu nunu vo Eliashib zievo-u kikha ketso chü.

²¹ Puo sie Koz nuo Uria nuou Meremot nuou bu Eliashib kikha nunu vo Eliashib kitho kekreitsatie ketso chü lashü.

²² Mu puo sie zievoko, mu zanuoki keba themiakoe mhachü lashü.

²³ Puo sie Benjamin mu Hashub unie-e unie ki kepetsouu chü. Puo sie Anania nuo Maseia nuou Azariae puo ki khieki kebako chü.

²⁴ Puo sie Henadad nuou Binui-e Azaria kiki nu vo Dahou keu ketso chü.

²⁵ Uzai nuou Palal bu Dahou keu petsou keba nu vo kediu ki, kerükrieu gei keba tsiepfheu, süu kediu kepfheko kiluozha nu keba ketso chü lashü. Puo sie Parosh nuou Pedaia,

²⁶ mu rüsuokiu kethekeko Ofel nu lhoukebakoe niathutsatie Dzü Kharu petsou keba dahou pfhepie kebau ketso chü.

²⁷ Puo sie Tekomiako kekreitsatie chü, Dahou Kezhau pfhepie kebau petsou kebau, Ofel Dahou ketso rei chü.

²⁸ Zievokoe Kier Kharu mhotsatie ketsoshü, mia puopuokecü puo ki kepetsouu chü phre.

²⁹ Uko sie Imer nuou Zadok-e puo ki petsou kebau chü lashü. Puo sie Shekania nuou Shemaia niathutsa kharu kepfheu chü.

³⁰ Puo sie Shelemia nuou Hanania mu Zalaf nuo sorouu Hanun-e kekrei puo chüshü. Puo sie Berekia nuou Meshulam puo kibou petsou kebau chü lashü.

³¹ Puo sie Malkija, suna rükreimia puo ru puo rüsuoki thekeko tsiu lhithoko ki mu Mifka Care petsou kebau ki peso gei siro puo ke nu kekho ketso chü lashü.

³² Siro puo ke nu kekho ki peso gei tsiu Tekuo Kharu donu suna rükreiyakezhako mu lhithokoe chü lashü.