Nehemia 2 - Angami Naga CL (Re-edited) Bible (BSI)

Nehemia Ketsepie Jerusalem nu Keshü

¹ Süsie Nisan-u khrü, kediu Artaxerxes kedi chükelie teicie mepfü cie, khubezu puo tsütuoü kesie ki, ae khubezu chü pielie di süu pie kediu tsüshü. Hamhodzü puo mhodzünu a thesuoshü mo zoluo.

² Sitse kediu sie a ki, “Kiüdi n zie ngu pesuota ga? No mhachü ba mo ze! Hau thenou kesuo puo la zo mecie.” Sitse a michiepie mhapuochüta.

³ Sidi sie kediu ki, “Kediu bu rhei kechau chücie! Kiüdi a zie ngu pesuo motuo mu? Nadiu, a puonuoko kekhru chü, ruo zhüte mu kharuko mi bu the pesuowate.”

⁴ Sitse kediu sie a ki, “Siliro no kedipuo chaya ga?” Süla a teigei keba Kepenuopfü ki chashü.

⁵ Sidi a sie kediu ki, “Kediu bu puo medo üliro, mu n kituou n mhodzüki n nei chülie üro, no a ketsepie Juda nu shücie, a puonuoko mekhru chü kezhü nadiu nu, sidi a bu süu chü lacie.”

⁶ Sitse kediu sie, a ki: (Kedipfü rei puo khieki ba.) “No kichiepuo tuotata mu no kedikechükipuo la vorlie ta?” Sidi kediue a ketsekeshü puo medolie, mu a puotei chiepie puo tsüshü.

⁷ Sizomoü a sie kediu ki, “Kediu bu puo medo üro, leshü thupie Kerü khie Lutsa keba ahngko tsüketuo pie a dzie nu shücie, siliro a Juda tsolie kemochie ukoe a bu volieketuo la.

⁸ Siro leshü puo pie kediu tsa pfheyakezhau Asaf kediu ki shücie, silie tse puoe sei khashü di rüsuokiu kharu kiprü, nadiu kuda, siro a baketuo kiu chülietuo.” Ru Ukepenuopfüe u ngukemezhie dzieu a gei ketuo mhiei, kediue a kecha chüshü.

⁹ Sitse a Kerü khie Lutsa kijü nu ahngko ki volie, sidi kediu leshüu pie uko tsüshü, süki kediue chüpahi mhokezhau, kierkesemia mu a sa di ketseshülie.

¹⁰ Derei Horonmia Sanbalat mu Ammonmia kezhau Tobiae süu silie, tsiu Israel nuonuoko dzevi pfhütuo ücü la mia puo votaücü silie tse uko nei mo phita.

Nehemia Dahouko Riekecü

¹¹ Süla a Jerusalem nu vorlie, di sünu zha se bata.

¹² Süsie a teizei zenu sielie, a mia huo ze salie, mu a mia puo ki rei a Kepenuopfüe a bu Jerusalem chülieketuo la mha kicüpuo pie a nou shü shicü pu mo. Siro a puo gei ketuo khunuou zo kemosie khunuo kekrei rei ze sa mo.

¹³ A theva ze Razha Kharu chau ze pra, sidi Tinyhü Dzüluotsa vo di Kerhu Kharu nu volie, sidi Jerusalem kudako rie voshü, süko me zhüta, mu sünu kharuko mi bu thewata.

¹⁴ Süsie a Dzüluo Kharu nu Kediu Zie ketso voshü; derei sünu a toupfü ketuo khunuou bu cie voketuo puorei ba mota.

¹⁵ Süsie a theva geinu razhau ze kho di kudau mehoshü, di rürei la Razha Kharuu nu lelie, sidi la vorta.

¹⁶ Sirei kezhakoe a kirapuo vo shi, morei a kedipuo chü shikecü si mo, morei a süki rei süu pie Judamiako, zievoko, pehüko, kezhako mu kekreimia keze mhachüketuoko ki puwa moluo.

Dahouko Chüketuo Pepikelie

¹⁷ Süsie a uko ki, “Úko kedithedepuo kemezhiekecü nu ba shikecü niekoe ngu ba, Jerusalem bie peruopie zhüte, siro puo kharuko mi pie thewate. Vorlie, sidi úko Jerusalem dahouu pfhe la khe, silie tse mia u pesekecü chü salie lho.”

¹⁸ Süki a uko ki a Kepenuopfü dzie a gei vikeshüu dze pu, siro kediu se a ki pukeshü dieko rei pushü, sitse ukoe sie, “Úko sielie di chü khe.” Sütuoi di ukoe mhatho kevi hau chütuoü uko dzie meteilie.

¹⁹ Derei Horonmia Sanbalat mu Ammonmia kezhau Tobia, mu Arabmia Geshem ukoe süu silie tse, uko hie kre mu hie ngumecüta di, “Nieko chü keba hau kedipuo ga? Nieko sie kediu petsoutieya me?”

²⁰ Sitse a sie uko ki, “Teigei ketuo Kepenuopfü, Puo hieko khruoshütuo; süla hie puo kituoko sie di chütuo; derei nieko we Jerusalem nu nie ya, nie mezhü, morei nie dzeüse puorei tuo mo.”